Read Patamona Mark 13 Bible Online

Mark 13 - Patamona bible

Mark 13

¹Jesus uyàpù Katù yùwùk tapai yau, inenupa ton tonpa uya Jesus pàk, “Masa yenkà, Enupanài, eke ton tàk molopai wakù ton kulu tapùi yamùk!” teppù.

²Jesus uya imaimu yeukuppù, “Sàlà yamùk ku eke ton tapùi yamùk menyaik? Tewin nà tùpatassek yau tàk usene pen màlà. Tamù'nawàlà iwettùlùkkwa woton màlà,” teppù.

³Jesus wechippù màlà chichiu pe Olive Wùpù itesek po, Katù yùwùk yessumla, màlà yattai Peter, James John, molopai Andrew tawonnan uya yekamappoppù tùkkenan yai.

⁴“Masa yekamakà ina pàk, yà'là yattai ken sàlà yamùk wechi molopai yà'là wechi yentok ipàkàlà pe sàlà yamùk wekkupù yau?” teppù tok uya.

⁵Màlàyau Jesus uya tok pàk, “Enpen ettàk kon, ànù'là uya kasei pàk eyenkuttà kon tukaik, tukaik.

⁶“Tukkan kon kappon yamùk uyàpù màlà uyesek yau, màlàyau tok uya màlà, ‘Mùkkàlà Iulà!’ te, molopai tukkan kon kappon yamùk yenkuttà tok uya.

⁷Tùwepanta'masan wechi mei pùla molopai mei tùwepanta'masan pàk tùuselupasan yeta auya'nokon yau kesenalippatàu. Màlà yekkwa ton nà wekkupù màlà, tùse masa lùppù iwenukattok wechi màlà.

⁸Pata uya màlà tùulon pata panta'ma, molopai pata yesak wepanta'ma màlà tùulon kon pata yesak pokonpe. Tùlùppùnù wechi màlà molo pata yamùk yawàlà, molopai iwan pe pata wechi. Tùwentusen wechi'mosak wapiya kulu kasa sàlà yamùk wechi màlà.

⁹“Tùse amyamlo enpen ettàk kon, ayachi kon màlà. Molopai eyippoppàtù kon màlà kappon yamùk wepilittok motau. Kappon yamùk yesak yamùk yemloto pona asalattà kon màlà upàkànsau, molopai kin yamùk yemloto pona tok pàk Wakù Itekale yekama kon pa.

¹⁰Wenuka'nàtok wapiya Wakù Itekale usekamatok wechi màlà tamù'nawàlà pata yawon kon kappon yamùk pàk.

¹¹Molopai ayachichak kon tùpo ayasak kon usekamappopà'nàtok yak yau, kataimelunpatàu, yà'là tetok auya'nokon ittuiche, euselupatok yatai pe iwechi yau eyelupatok ke eselupatàk kon. Màlà yattai màlà ewinàpaino pe pùla màlà euselupa, tùse Wakù Akkwalù winàpaino ke.

¹²Walawotichi yamùk uya màlà takon kon wapùla tùlui kon tùlù iwàtoppe. Tok kàippùnù uya màlà tùmunkà tùlù tok wà toppe. Molopai imunkà yamùk welattà màlà tùsan kon tùkàipùnù kon winàkàik, tok wàtoppe.

¹³Kappon yamùk uya màlà tùtalumayi kon pe àkupù kon upàkànsau. Tùse mùkkàlà tùwemattok yawàlà tùwettalumatàtok pàlikanàippù tùwematok wenukappù tepose pùikattà Katù uya màlà,” tukaik.

¹⁴“Katù yewanma pe nai'nùk Mattantok ku'nài yene auya'nokon yau tùpatassek pen yau, tàwà Katù Maimu yennài nùttui. Molopai mùkyamlo Judea po tùwessan nepeik wùk yamùk pona.

¹⁵Molopai mùkkàlà tùwùk nakata po nai'nùk uttà tùwùk tak tùnalà woton yepose pen màlà.

¹⁶Molopai kàyik tù'mà yau nai'nùk wennappo tùwùk tak tùpon yepose pen.

¹⁷Molopai àsà pe kulu iwechi màlà monok yamùk pona molopai echikili ton kulu imunkà yamùk pona màlà yattai.

¹⁸Àpùlematàk kon Katù pàk sàlà wekkupù iko yattai tukaik!

¹⁹Wettalumattàntok wechi màlà màlà yattai àsà pe kulu wettalumattà'nàppà wapiya sàlà wolù yau yentai, sàlà wei ponalà.

²⁰Tùse Itepulu uya wettalumattàntok weyu kussak man tukke pùla iwa. Ikussak ya pùla iwechi yau, ànù'là wepùikattàppù pen eppaino sàlà. Tùse mùkyamlo tùnanùmùssan pàkànsau pata weyu yamùk kupùppù ya màlà tukke pùla.

²¹“Ànù'là uya, ‘Masa yenkà, Christ pùsàlà,’ wapùla tùulon uya, ‘Imasa yenka, mailà man!’ te yau, ailon kùkatàu ipàk.

²²Masapùla Christ pe tukaik, molopai Katù Maimu yenpoikannan pe tukaik tùusennakasan ailon ton pen uyàpù màlà molopai yentok ipàkàlà woton, eke ton enumenkanài molopai enalippanài kupù tok uya màlà. Ikupù tùuya'nokon yau Katù nanùmùssan yennakaiche tok wechi màlà.

²³Enpen ettàk kon! Tamù'nawolon tekamapàssaik iwekkupù wapiya,” teppù Jesus uya.

²⁴“Wettalumattàntok tùpo wei wewalumamù màlà molopai kapùi ulenpamù pen màlà.

²⁵Chilùkà yamùk wessoloka màlà kak poi, molopai kak meluntàlù utalo'ma màlà.

²⁶Kàyik Mumu usenpoika màlà katuppluk yau. Iyàppù eke pe tùmeluntàlù ke molopai tùyakkwayi yau.

²⁷Tùyinchelùyi yamùk yeunoko ya màlà i'nailàlà non yawàlà Katù ponalok kon kappon yamùk piliche tamù'nawolon pata yamùk yapai, wei wepaka motapai wei wewomù motak,” teppù Jesus uya tok pàk.

²⁸“Fig yek pàk esenupatàk kon. Mùttuyatàik ipanta waleta yau wàpànùsak wattatok yattai pe iwena ittu nan amyamlo.

²⁹Màlàpàk sàlà yamùk wekkupù yene auya'nokon yau màlà, ittu auya'nokon màlà pata weyu wechi mei pùla, iwepyattà winàkàik.

³⁰Ailon kulu sàlà, tàmù'nawàlà sàlà yamùk wekkupù màlà, sàlà pe nulà nai'nannùk welikù wapiya.

³¹Kak molopai non tawon waliwomù màlà, tùse Umaimu wenukappù pen màlà,” teppù Jesus uya tok pàk.

³²“Tùse ànù'là uya màlà yamùk wekkupù weyu ittu pùla iwechi màlà. Inchelù yamùk là epùn pon kon uya. Wa pùla Katù Mumu là uya ittu pùla iwechi màlà. Tùse Ukàippùnù neken uya ittu màlà.

³³Enpen ettàk kon, masapùla yà'là yattai là màlà weyu uyàpà ittu auya'nokon pùla iwechi màlà.

³⁴Sàlà wechi màlà kàyik utà mei te'ma tawà kasa. Tùpata nàmà tùuya yau tùpoitolù ton nàmà ya màlà tùpata mainanpanài pe. Tùpoitolù ton lepa ya tok wotokoyi ke. Molopai manatta yesak pàk, ‘Enpen mechik,’ teppù ya.

³⁵Enpen uchi ettàk kon, masapùla ittu auya'nokon pùla tapùi yesak uyàpù màlà. Ko'man pe wapùla anomlak, wapùla kalicho tàwù yattai, wapùla ko'làma là.

³⁶Tewinanpa asse'ne iyàssak yau, ewe'nànsak kon yepotak.

³⁷Tekamayai'nàk àpàkù'nokon, yekama uya nàlà màlà tamù'nawolon kon pàk, ‘Enpen ettàk kon!’ te uya,” teppù Jesus uya tok pàk.