Read Patamona Mark 2 Bible Online

Mark 2 - Patamona bible

Mark 2

¹Tachinpe kulu tùpo pùla là (Tukke kulu wei tùpo pùla là) Jesus wennapposak wechippù Capernaum pona. Màlàyau itekale wechippù, “Iwemeichak man tùwùk tak,” tukaik.

²Màlà yattai là kapon yamùk wepilipùppù tukke. Tok patassek woton pùla iwechippù. Manatta yawàlà tok wechippù. Chisek wechippù màlà Katù Maimu yekama pàk tok pàk.

³Asakùlà'nan kon kappon yamùk uya e'nek iitokkassak nepùppù Jesus piyak.

⁴Màlà tùse ipyak tùwena kon pùla tukke kappon yamùk wechi pàk, tapùi ipu mokkappù tok uya Chisek wettok imotau yessumla. Yakkokasak tùuya'nokon yau, tok uya kàyik nuttàppù aitou pe itekkwek tau.

⁵Màlà yattai ailon tetok tok uya yene tùuya pàk, Jesus uya ittokkassak pàk, “Umu, amakuyi pàk usentupayaik,” teppù.

⁶Tùse molo tok wechippù màlà Law pàk enupannan chichiu pe tùusenumenka kon pàk tewan kon yau.

⁷“Yà'là peichi iwechi pàk pùsàlà kàyik uselupa màlà Katù winàkàik tùwe'namaik pùla là? Ànù'là usentupa makui pàk pen màlà, tùse Katù neken,” teppù tok uya.

⁸Màlà yattai Jesus uya amak yai tok usenumenkatok ittuppù. Màlàyau, “Yà'là pe iwechi pàk eusenumenka kon pàk messatàu màlà pàk?” teppù Jesus uya tok pàk.

⁹“Sa'man pe pùlaiwa na' pùsàlà iitokkassak kàyik pàk, ‘Amakuyi pàk usentuppan man,’ te màlà. Wapùla, ‘E'wuluukakà, eyekkwek yanùnkà molopai asakà te ka'lù,’ ” teppù Jesus uya tok pàk.

¹⁰“Ittu kon pa ikupù uya màlà mùkkàlà Kàyik Mumu wechi tapàikketù ke sàlà non po makui pàk tùusentuppa toppe,” teppù Jesus uya tok pàk. Màlàyau Jesus uya iitokkassak kàyik pàk,

¹¹“E'wuluukakà, eyekkwek yanùnkà molopai itàkà àwùk tak te uya sàlà àpàk,” teppù.

¹²Màlà yattai là iwe'wuluukappù, tekkwek yanùmùppù ya, molopai iitàppù tok wapiya. Tok usenumenkappù kulu. Katù yapulàppù tok uya, “Sàlà yekwalà yensak pùla man wapiya,” tukaik.

¹³Jesus wennapo tukkappù Galilee tuna yena pona. Màlàyau tukkan kon wepilipùppù ipyak molopai tok yenupappù ya.

¹⁴Tùutà yau, Levi, yeneppù ya, Alphaeus mumu. Chichiupe tùwotokoyi kupù pàk pùlayatta yekwatù pàk iwechippù. “Uya'là utànpai,” teppù Jesus uya ipàk. Màlàyau iwe'wuluukappù ya'là iitàppù.

¹⁵Màlà tùpo Levi yùwùk tau tùuta'lettà pàk iwechippù. Tukkan kon pùlayatta pili'nài nan molopai àliton nà wechippù màlà molo Jesus pàkàlà. Mùkyamlo tonpa yamùk wechippù Jesus molopai inenupa ton pokonpe tùuta'lettà kon pàk.

¹⁶Law pàk enupanài nan molopai Pharisee yamùk uya iita'lettà yeneppù pùlayatta pili'nài nan molopai àliton pokonpe. Màlàyau tok uya inenupa ton yekamappoppù, “Yà'là pe ken iwechi pàk iita'lettà màlà pùlayatta pili'nài nan molopai àliton pokonpe? tukaik.

¹⁷Yetasak tùuya pàk, Jesus uya, “Mùkyamlo pàli'yau nai'nannùk mùkyamlo ipittànài iche tùwessen pen. Tùse e'neppe neken nen tùwessan mùkyamlo ipittànài iichelok kon. Wakù ton kà'maik uyàssak pen sàlà, tùse àliton nàkku” teppù.

¹⁸John Enpataukanài ya'lon kon molopai Pharisee yamùk ya'lon kon nàlà weppàtùppù tùuta'letàik pùla tùwàpùlemasan pe. Tok uyàpùppù Jesus piyak molopai, “Yà'là peichi iwechi pàk John Empataukanài nenupa ton molopai Pharisee yamùk ya'lon kon weppàtùppù tùuta'letàik pùla tùwàpùlemasan pe, tùse enenupa ton uchi tà wa pùla?” teppù tok uya Jesus pàk.

¹⁹Jesus uya tok maimu yeikuppù, “Mùkyamlo wemali'man tùpo uta'letùntok yak ikà'masak kon wapàkkapù yeselùkek ken na' mùttuyatàu? Kane, wa tok wechi pen. Tùwemali'masen umoine wechi nen molo tùpyau'nokon yau tùuta'letàik pùla tùwessan pen.

²⁰Tùse pata weyu uyàpù màlà tùwemali'masen umoine wemokkatok tok winàpai yatai. Màlàyau làichi tùuta'letàik pùla tok wechi màlà,” teppù Jesus uya.

²¹“Ànù'là emennak kuyalikku pùkkùlùppù yapulànài pen ipoippà pon paachi'ma toppe tùuya. Ikussak ya yau emennak uya màlà ipoippà kalapàtù eke peiwa iwekalasak tùmase, ” teppù Jesus uya.

²²“Molopai ànù'là emennak tinchisen yemaikanài ipoippà wai, kamo pippà konekasak yak pen. Wa ikussak ya yau, tinchisen uya wai i'mo màlà. Asaklàma tichinsen molopai wai umatta màlà. Tùse nen emennak tinchichen yemaika màlà emennak wai yak,” teppù Jesus uya.

²³Jesus utàppù umà a'naik pata yawàlà Wàlàka'nàtok weyu yatai. Màlàyau inenupa ton wessa'molùkappù a'naik kanka pàk.

²⁴Màlàyau Pharisee yamùk uya, “Masa yenkà, ina yenupatok yawàlà pùla enenupa ton man sàlà kupù tok uya yau Wàlàka'nàtok weyu yattai!” teppù Jesus pàk.

²⁵Chisek uya tok maimu yeikuppù “Yennàinan pen uchi amyamlo David wechippù wa iwan pe tùwechi kon yau ta'lon kon pokonpe?

²⁶Iwewomùppù Katù yùwùk tak pùlomù pusak napùppù ya Katù yemloto pona itùsak. Sàlà wechippù màlà Eke kulu paatele Abiathar yattai. Kùyenupatok kon wechi màlà paatele neken nùnapù màlà pùlomù pusak tukaik. Tùse David uya inapùppù molopai ta'lon kon lepappù ya nàlà,” tukaik Jesus uya tok maimu yeikuppù.

²⁷“Katù uya sàlà Wàlàka'nà weyu konekappù màlà kappon yamùk ponaloppe. Wàlàka'nù weyu ponaloppe pùla kappon yamùk konekappù ya,” teppù Jesus uya tok pàk.

²⁸“Màlàpàk Kàyik Mumu nàlà mùkkàlà Wàlàka'nù weyu yepulu,” teppù Jesus uya.