Read Patamona Mark 5 Bible Online

Mark 5 - Patamona bible

Mark 5

¹Jesus molopai ya'lon kon welepamùppù Galilee latoi pona Gerasa pon kon kùlottak.

²Kanau yapai Jesus uttà pe, kàyik uya yepoloppù uluwaik kùlottapai. Pùsàlà kàyik yau àli akkwalù wechippù màlà.

³Uluwaik yamùk kùlottau tùwemassen pe iwechippù. Ànù'là uya yaulonpàtù sa'man chin ke là yentai iwechippù.

⁴Tukke itekkwa itta molopai itemyatù yamùk yaulonpàtùppù, tùse echipalà taulonpàttok yattàpàtùppù ya molopai sa'man nà chin yatànài pe iwechippù tùtta ke. Meluntà pe kulu iwechippù ànù'là uya yeleutanùpù yentai.

⁵Tàwàlàlà ewalupàttau molopai weinai tùwentaimepàtù pàk iwechippù màlà uluwaik kùlottau, wùk polo là iwechippù. Tàk ke tùusattàpàtù pàk iwechippù.

⁶Mei lùiwa echi'ma Jesus yensak tùuya yau, ittaitunpappù. Tese'muyok iwenappù itemlotopo.

⁷Màlàyau iwentaimeppù eke pe, “Jesus, Àmàlà Eke Katù Mumu! Yà'là pe ken ukupù auya màlà? Katù ponaloppe tàwà eyekamappo uya sàlà, kùtalumattài!” tukaik.

⁸(Sàlà teppù ya màlà masapùla Jesus uya, “Epakkakà, àli akkwalù, pùsà kàyik yapai!” te pàk.)

⁹Jesus uya yekamapoppù, “Ànùk ken eyesek?” tukaik. Màlàyau yeikuppù ya, “Uyesek màlà Mob, tukke ina wechi pàk!” tukaik.

¹⁰Màlàyau Jesus pawanattà pàk iwechippù, “Tok kùseunokoi sàlà pata yapai,” tukaik.

¹¹Màlà yattai màlà pata piyau puluku yamùk wechippù tùwemo kon pàk wùk pùlakun po.

¹²Màlàyau àli akkwalù yamùk uya ipawanatàppù, “Puluku yamùk kùlottak ina yeunokkà tok yak ina wewontoppe,” tukaik.

¹³“Tàwà tok nepakkai,” teppù ya. Tok wepakkappù kàyik yapai, molopai puluku yamùk yak tok wewomùppù. Puluku yamùk wechippù màlà tukke, 2000 kaichalon kon. Tok utàppù nen uchi asse'ne aitun pe aiko i'nauwon yailà epukaik tuna kak molopai tok unalàppù.

¹⁴Puluku yamùk yennài nan utàppù aitun pe pata pona yekamaik molopai umà yawon kon pàk là yekamaik. Màlàyau kappon yamùk utàppù yà'là pe là iwessak yense.

¹⁵Jesus piyak tùuyàssak kon yau, molo kàyik yeneppù tok uya tukkan kon àli akkwalù yamùk wettok yau. Chichiu pe iwechippù tùpon ke molopai wakù pe ichenumentok. Màlàpàk tok usenalippappù.

¹⁶Yennàinan nùssan uya yà'là kasa àli akkwalù yen lùppù kàyik wechippù yekamappù kappon yamùk pàk molopai puluku yamùk wechi yà'là pe yennài nan nùssan uya yekamappù tok pàk.

¹⁷Màlàyau, “Talà ewechi iche pùla ina man, itàkà,” teppù tok uya Jesus pàk.

¹⁸Kanau yak Jesus wenuku tùse àli akkwalù yenpù lùppù kàyik uya ipawanattàppù, “Aya'là ka' utà lù?” tukaik.

¹⁹Tùse Jesus uya inulunpappù, “Ennappok apata yak àtonpa yamùk kùlottak Itepulu uya àpùikattàsak molopai wakù pe iwessak àpàk yekamata” tei'ma.

²⁰Iitàppù nen uchi màlà ten pan pata yamùk yau yekama pe. Jesus uya tùpùikattàsak yekamappù ya. Yetanài nan nùssan usenumenkappù kulu màlà.

²¹Jesus wennappoppù tuna latoi pona, màlà motau, tukkan kon kappon yamùk wepilittukkappù iwoi.

²²Jairus, synagogue yesak tonpa uyàpùppù molopai Jesus yene tùuya yau itta piyak iwettolùpattàppù.

²³Màlàyau ipawanattàppù ya kulu màlà, “Uyenchi lùkwà tàwà e'neppe kulu man. Asse'neiwa àikkà, eyemyatù itùtanikkà ipona iwenna toppe,” tukaik.

²⁴Jesus utàppù màlà ya'là. Màlàyau tukkan kon wechippù ipàkàlà. Tok wechito'chito'mappù iwinàkàik màwinàpai'ne.

²⁵Molo nàlà nossan wechippù màlà 12 pe kilichimochi, mùn pàk e'neppe ikko'manpàssak.

²⁶Tukkan kon nà tatta yamùk wechippù ipittàiche. Tamù'nawà tùpùlayattayi yu'makappù ya tipik pona, tùse ichipittà pùla iwechippù. Àsà pe nen uchi itepalan wenappù.

²⁷Jesus uya e'nek ton ipittà yeta tùuya pàk, iitàppù ilinà kappon yamùk kùlottawàlà ite'mappù pàk.

²⁸“Ipon neken nà yappàssak uya yau ken, uchipittà kulu ko,” te pàk iwechippù màlà.

²⁹Ipon yappàtùppù ya, màlà yattai là immùntatok wa'munappù. Tùuchipittàsak tù'nau ittuppù ya tùutaimelunpatok yapai nen uchi.

³⁰Asse'ne Jesus uya tapàikketù utà tapai ittuppù. Iwelattàppù ilinà kappon yamùk kùlottau. “Ànùk upon yappàtùi?” teppù ya.

³¹Inenupa ton uya, “ Kappon yamùk là na' uchi uya echito'chito'ma yenei'ma, ‘Ànùk uyappàtùi?’ tawon àmàlà,” teppù ipàk.

³²Tùse tapà'nàippù yeneiche lùppù Jesus welattàpàtùppù ànùk pe là iwechi yeneiche.

³³Mùkkàlà nossan uya yà'là kasa tùwessak ituppù. Màlàyau iyàpùppù tùwetalipaik kùkùkù pe. Tese'mu yok iwenappù itta piyak. Tamù'nawolon tùnkupùppù yekamappù ya ipàk.

³⁴Jesus uya ipàk, “Uyenchi, ailon tetok auya uya eyipittàsak màlà. Itàkà wàlà'ka'nàtok yau, ittaimelunpatok pùla enakà,” teppù.

³⁵Masa Jesus uselupa lùppù tùse, itekale ne'nài nan uyàpùppù Jairus yùwùk tapai. “Eyenchi nelikkappàssan. Yà'là pàk tachin pe là Enupanài wanittàpa pàk messan?” teppù tok uya Jairus pàk.

³⁶Tok uselupa yetapàtùppù Jesus uya i'nùmla, tùse yelupappù ya, “Kesewankono'mai, ailon kakkà neken,” tukaik.

³⁷Ànù'là utà ta'là iche pùla iwechippù tùse Peter, James, molopai yakon John tawonnan neken utàppù ya'là.

³⁸Tok welepansak Jairus yùwùk motak yau Jesus uya utaimelunpan yeneppù, tukkan kon kappon yamùk wentaimepàtù molopai tok kalawù.

³⁹Iwewomùppù molopai, “Yà'là wenai autaimelunpa kon màlà, yà'là pe iwechi pàk makalanyatàu? Mùkkàlà ulichan muleppù welichak pen màlà. Iwetun neken nen màlà,” teppù ya.

⁴⁰Tok wàkklàppù ipàk. Màlàpàk tok yenpakkappù ya. Molopai mule kàippùnù, ichan molopai tùnenupa ton tawonnan neken yewonnùpùppù ya ta'là mule welichak patassek yailà.

⁴¹Ulichan muleppù yemyatù pàk yachippù ya, ‘Talita kumi’, tei'ma, “Ulichan muleppù, e'wuluukakà,” te ya pe màlà iwechi.

⁴²Màlà yattai là asse'ne kulu ulichan muleppù we'wuluukappù molopai ichalàppù. (12 pe ikilichimochiyi màlà ulichan wechippù.) Sàlà wekkusak yau tok usenumenkappù.

⁴³Màlàyau, “Sàlà kùsekamatàu ànù'là pàk,” teppù Jesus uya àsà pe tok pàk. “Iteipa woton ke neken ilepatàk kon,” teppù ya nàlà tok pàk.