Read Patamona Mark 6 Bible Online

Mark 6 - Patamona bible

Mark 6

¹Màlà tùpo Jesus wennappoppù màlà pata yapai tùpatasek Nazareth pona.Inenupa ton wechippù ya'là.

²Wàlàkka'nà weyu yattai, Jesus uya tok yenupappù synagogue tau. Tukke kappon yamùk wechippù màlà molo. Molopai yetasak tùuya'nokon yau tok usenumenkappù kulu màlà. “I'nai motau là ken uchi tamù'nawolon sàlà yamùk yepotai?” teppù tok uya. “Yà'là yekkwa ken uchi sàlà ittutok ke ilepasak nai'nùk? Tensan yekkwa pen nà kuttoppe ya,” teppù tok uya.

³“Mùkkàlà ken na' tapùi yamù pàk tùwessen pen, Mary mule, James, Joseph, Judas, molopai Simon yamùk lui pen ken na' mùkkàlà? Iwàlichi ton pen ken na' mùkyamlo talà nai'nannùk?” tukaik tok usekamappopàtùppù. Màlàpàk tok uya inulunpappù.

⁴Màlàyau Jesus uya, “Katù Maimu yenpoikanài mùkkàlà tùnamasen pata yamùk yawàlà, tùse ipata yau pùla, molopai itonpa yamùk kùlottau pùla, molopai itùwùk tawon kon kùlottau pùla nàlà,” teppù.

⁵Yà'làlà eke ton Katù yapàikketù yenpoikappù ya pen. Tùse tukke pùla e'nek ton ipittàpàtùppù ya temyatù tùnonkase tok pona.

⁶Ichenumenkappù kulu màlà ailon tetok pùla tok wechi pàk. Tùpata woinokon pata yamùk yawàlà kappon yamùk yenupa pàk Jesus usalàppù.

⁷Tùnenupassan kà'mappù ya tùpyak, molopai tok yeunokoppù ya asa'là'ne. Àli akkwalù yentaikanài apàikek ke tok lepappù ya.

⁸Màlàyau tok yelupappù ya, “Yà'làlà kùsatàu àutà kon yau, tùwenantu ke kùtàtàu, enkui paikiyi kùsatàu molopai pùlayatta kùsatàu apakittiyi kon yau, etekessemu kon neken matàik.

⁹“Àutà kon màlà attassa kon yau neken molopai, asa'là là àpon pùloppon kùsatàu,” teppù ya.

¹⁰Tok yelupatukkappù ya “Pata yak àuyàssak kon yau Ànù'là uya tùwùk tak eyewonnùssak kon yau, molo mettàik àutàtok kon màlà pata yapai uya eyepolo kon ponalà.

¹¹Ewelepansak kon pata yak yanùmù kappon yamùk uya pùla iwechi yau wapùla euselupa kon yeta tok uya pùla iwechi yau màlà pata mùnàntàik, inonù mùtu'metàik ata kon poi. Sàlà wechi màlà tok yekamappotok pe,” teppù Jesus uya tok pàk.

¹²Tok utàppù Wakù Itekale yekamaik tùmakuyi kon winàpai kappon yamùk welatà toppe.

¹³Tukkan kon làichi yapai àli akkwalù yamùk yenpakkapàtùppù tok uya màlà. Molopai e'nek ton kalapaimapàtùppù tok uya, molopai tok ipittàpàtùppù tok uya.

¹⁴Kin Herod uya yetappù, masapùla wakù kupù Jesus uya usekaletàppù pata yamùk yawàlà. Tùulon kon uya, “John Enpataukanài we'wuluukasak tùwuluwachi yapai pe iwechi màlà! Wa iwechi pàk wakù kuttok ya yapùiketù yesappe iwechi nai'nùk,” teppù màlà.

¹⁵Tùse tùulon kon uya, “Elijah pe nen iwechi màlà,” teppù. Molopai tùulon kon uya, “Katù Maimu yenpoikanài pe nen iwechi màlà penalok kon kasa iwechi,” teppù.

¹⁶Yetasak tùuya pàk Herod uya, “John Enpataukanài mùkkàlà. Ippai yattàtoppe unkupùppù lùppù, tùse iwennappokasak màlà pàli'yau iwechi,” teppù.

¹⁷Herod uya tàmàlà pe kàyik yamùk yeunokoppù màlà John yachiik. Tok uya yaulonpàtùppù, molopai tok uya itùlùppù patikichi tak. Herod uya sàlà kupùppù màlà, Herodias pàkànsau. Herod uya màlà Herodias mali'mappù Philip, takon noppù pe là nen iwechi tùse.

¹⁸John Enpataukanài uya Herod yelupa ko'mankappù màlà, “Ikasa pùla nen man, ayakon noppù yak ewessak, ima'li'massak auya.” tukaik.

¹⁹Màlà wenai Herodias uya John kupùppù tewamma pe. Ànwàpai iwechippù màlà, tùse Herod wechippù imaimu yawàlà pùla.

²⁰Herod uya John namappù masapùla wakù pe, molopai ikasa iwechi pàk. Tùse yachichak ya neken nen wechippù màlà. John uselupa enetapai iweppàtùppù taimelunpa ya lànen ittu tùuya tùse, ichelupa yetappù ya tùwakùli pe.

²¹Màlà yattai Herodias weyu woton uyàpùppù màlà. Herod wentuppù lùppù weyu pe iwechippù tùuta'letàtok kon pe tok uya ikonekappù tamù'nawolon kon eke ton nà itepulu yamùk, soicha yepulu yamùk, molopai Galilee pon kon yepulu yamùk pokonpe.

²²Herodias mule ulichan uyàpùppù màlà amanùnse. Imananùppù màlà, màlàyau Herod molopai ikaklamu yamùk là yauchinpappù ya tùmananù ke. Màlàyau Kin uya, “Yà'là là iche ewettok yekamappokà upàk molopai elepa uya màlà ike,” teppù

²³“Ailon pe wa te uya sàlà, ukaseita pen. Elepa uya yà'làlà yekamaposak auya upàk yau, itesappe wessai'nàk upata latoi ke là,” teppù Herod uya ipàk.

²⁴Ulichan wepakkappù tùsan yekamappoik, “Yà'là yenna uya lùk uchi sàlà?” tukaik. “John Enpataukanài ippai iche wessaik, kakkà,” teppù ichan uya.

²⁵Asse'ne iwennapoppù kin Herod piyak. “Ulepa auya iche wessaik talà sàlà pe, John Enpataukanài ippaippù ke palipi po,” teppù ya.

²⁶Kin usewankono'mappù kulu màlà “Kane,” te ya yentai iwechipàk inulunpa ya pùla masapùla, “Ailon pe wa te uya sàlà, ukaseita pen,” te tùuya yetasak kappon yamùk uya pàk.

²⁷Màlàyau asse'ne màlà Herod uya pata yelasu yeunokoppù, John ipaippù nesse. Patikichi tak iitàppù molopai John ippai yattàppù ya.

²⁸Inepùppù ya palapi po molopai ulichan yemyak itùlùppù ya, mùkkàlà uya nen uchi tùsan yemyak itùlùppù.

²⁹Màlà yetasak tùuya'nokon yau, John nenupassan utàppù itàkàpù u'nattàik.

³⁰Yeunossak kon nùssan wennapposak wessepoloppù Jesus pokonpe, molopai Jesus pàk tamù'nawàlà tùnkupùppù kon lùppù yekamappù tok uya molopai kappon yamùk yenupappù tùuya'nokon lùppù là yekamappù tok uya.

³¹Tukke kappon yamùk uyàpùppù essentak, Jesus molopai inenupa ton uta'lettàtok là yattai pùla. Màlàyau tok pàk, “Utànpai'nokon iwalàwannà esse, molo àwàlàkapù kon pa,” teppù ya.

³²Tok utàppù kanau yau tùmyamlo pe neken tùkkenan pata yak.

³³Màlà tùse tukkan kon kappon yamùk uya tok utà yeneppù. Mùkyamlo pe tok ituppù tok uya. Màlà yattai tamù'nawàlà pata yapai tok wakkàse tok utàppù paluppolo aitun pe, tok wapiya tok welepamùppù.

³⁴Tùwepalùka pe Jesus uya ilinà pe kappon yamùk yeneppù, màlàpàk Jesus usentupappù tok pàk, masapùla itesak pùnon kalinilu yamùk kasa tok wechi pàk. Tok yenupa pàk iwepyattàppù, tukkan yà'là yekkwa ton nà pàk.

³⁵Pata uko'mamù yau inenupa ton uyàpùppù ipyak, “Pata uko'mansak man molopai sàlà nàlà màlà tùkkenan pata.

³⁶Kappon yamùk yeunokkà pata yamùk meyon kon pen umà yamùk molopai pata yamùk yak tùyiwalà teipa kon woton ye'ma toppe tok uya,” teppù tok uya Jesus pàk.

³⁷“Amyamlo'nokon pe là tok ilepatàk kon tok yeipa ke,” tukaik Jesus uya tok maimu yeikuppù. Tok uya yekamappoppù, “Ina utà ken na' iche messan, 200 kaichalon pùlayatta pun ke pùlomù pusak ye'maik tok ya'lettà toppe?” tukaik.

³⁸Màlàyau, “Yà'là kaichalà ken uchi pùlomù pusak lùkwà nai? Imasa yentantàk kon,” teppù Jesus uya tok pàk. Màlàyau ittuppù tok uya, “5 pe kaichalà neken man, molopai asa'là neken molok yamùk man” teppù tok uya.

³⁹Jesus uya tùnenupa ton uya tamùkke'ne kappon yamùk weleuta toppe tok kuttoppe yekamappù.

⁴⁰Màlàpàk tok weleutappù tamùkke'ne, 100 pe'ne, molopai 50 pe'ne.

⁴¹Jesus uya pùlomù pusak yanùmùppù molopai asa'lon kon molok yamùk, tenu tùlùppù ya epùn winàkàik tenki teppù ya Katù pàk. Pùlomù pusak pilipàtùppù ya molopai tùnenupa ton yemyak itùlùppù ya kappon yamùk lepapàttoppe tok uya. Asa'lon kon neken làma molok yamùk yekamùppù ya tok yemyak.

⁴²Tamù'nawolon kon uta'lettàppù màlà iche tùwettok kon yawàlà.

⁴³Inenupa ton uya pùlomù pusak molopai molok tompappù pilipùppù 12 pe kaichalà eketon walicha.

⁴⁴Yewessak kon nùssan wechippù màlà 5000 pe kàyik yamùk.

⁴⁵Tewinanpa, Jesus uya tùnenupa ton yeunokoppù kanau yau tùwapiya Bethsaida pona, palau latoi pona, ilinà kappon yamùk utàpàttoppe yekamai'ma.

⁴⁶Tamù'nawolon kon pàk utàpà'nàpai'nokon te tùpo iitàppù wùk pona àpùlemaik.

⁴⁷Pata wewalumansak pe kanau wechippù màlà palau yapploppo Jesus wechi a'mun po tewincha tùse.

⁴⁸Tùnenupa ton wechi tùkanwa kon yuklaiche yeneppù ya, masapùla assetun utasse'mappù màlà tok winàkàik. Màlàyau pata wemapù pe iyàpùppù tuna polo. Tok wenailà iitàppù.

⁴⁹Tùse tuna polo iiyàpù yeneppù tok uya, “Wolo'yan là nen mùkkàlà,” tukaik, tùsenumenka kon yau tok wentaimepàtùppù.

⁵⁰Tok wettalipasak kulu wechippù yensak tùuya'nokon yau. Tùse tewinanpa Jesus uya tok yekamappoppù, “Meluntà pe eyewan kon yau ettàk kon. Iulà Mùkkàlà Jesus. Kesenalipatàu!” teppù ya.

⁵¹Tok piyak iwenukuppù kanau yak molopai assetun wàttù'nàppù màlà. Inenupa ton usenumenkappù kulu màlà, ichelupa pùla tùwenaik.

⁵²Masapùla yà'là yekamasak 5000 pan kon yewessak uya ituppù tok uya pùla lùppù iwechippù, tok usenumenkatok uya yachi pùla iwechippù.

⁵³Tok ukklàtùppù màlàyau tok welepamùppù Gennesaret pona, molo tùkanwa kon yewattàppù tok uya.

⁵⁴Màlà kanau yapai tok wepalùka pe kulu kappon yamùk uya Jesus ituppù.

⁵⁵Tok utàppù pata yamùk yawàlà yekamaik. Molopai i'nai motau là iwechi yetasak tùuya'nokon yau, e'nek neppàtùppù tok uya tok yapon po.

⁵⁶I'nailàlà Jesus utàsak yau, pata yamùk lùkwà pona wapùla eke pata yak, wapùla umà yak là yau, kappon yamùk uya e'nek ton nepùppù màlà, yà'làlà chilanmatok molopai yà'làlà ye'matok motak. Molopai Jesus pawanatàppù tok uya ipon yeppi neken nà yappàttoppe tok uya iku toppe ya. Molopai tamù'nawolon kon ipon yeppi yappà'nài nan nùssan uchipittàppù màlà.