Read Patamona Mark 9 Bible Online

Mark 9 - Patamona bible

Mark 9

¹“Ailon kulu sàlà, talà kappon yamùk man tùwelikù woton kon pen Katù wettok itepulu pe uyàpù tapàikketù ke yene tùuya'nokon wapiya,” teppù Jesus uya.

²6 pe wei tùpo Jesus uya Peter, James, John tawonnan yalàppù ta'là kawon wùk pona, tùmàlàpe'nokon neken tùwettokkon pe. Tok wechi itenupàkà tùse iwemyakanmappù tok yemlotopo.

³Ipon wenappù akkwa pe, aimu'ne kulu enkek pe. Ànù'là sàlà wolù yawon uya aimu'ne yà'làlà kukasak yentai.

⁴Màlà motau Elijah molopai Moses tawonnan usenpoikappù molopai tok uselupa Jesus pokonpe yeneppù tok uya.

⁵Peter uya Jesus pàk, “Ticha, wakù pe sa' talà we'nà'nokon man. Tapùi yamùk lùkwà koneka ina uya màlà àsolùwau, àwùk pe molopai Moses yùwùk pe molopai Elijah yùwùk pe tukaik,” teppù.

⁶Yà'là tetok tùuya ittu ya pùla iwechippù màlà masapùla tok wettapalipasak kulu wechippù.

⁷Màlà pe katuppluk uya tok waputtàppù. molopai mayin usetappù nen uchi katuppluk kùlottau, “Pùsàlà mùkkàlà u'nùn kulu Umu. Yetatàk kon,” tukaik.

⁸Màlà yattai là inenupa ton uya tenu kon pininpappù tùse ànù'là yeneppù tok uya pen, Jesus neken nen uchi wechippù tok piyau.

⁹Wùk poi tùwuttà kon yau tok panamappù ya àsà pe, “Eneneppù kon kùsekamatàu, Kàyik Mumu we'wuluukasak tùwelikù tùpo ponalà,” tukaik.

¹⁰Tok wechippù imaimu yawàlà, tùse tok uselupappù tùyiwalà'nokon, “Yà'là te ken uchi ‘Weli'nà tùppo we'wuluukan’ tawon uya màlà?” tukaik

¹¹Tok uya Jesus yekamappoppù, “Yà'là peichi iwechi pàk Law pàk enupannan uya màlà Elijah uyàpù màlà wapiya te?” tukaik.

¹²Jesus uya tok maimu yeikuppù, “Elijah uyàpù nen màlà wapiya tamù'nawolon yà'làlà konekaik. Walà tùse yà'là pe ken uchi iwechi pàk màlà iwe'menukasak, ‘Kàyik Mumu wettalumattà màlà eke pe molopai inulunpa,’ tukaik uchi?”

¹³“Yekama uya sàlà àpàkù'nokon, Elijah uyàkkassak nen màlà, molopai yà'làlà iche tùwettok kon kussak tok uya man iwinàkàik Katù Maimu yau iwe'menukasak ipàk kasa,” teppù Jesus uya tok pàk.

¹⁴Ta'lon kon piyak tùwelepansak kon yau, tukkan kon kappon yamùk wechi tok woi yeneppù tok uya. Molopai Law pàk enupan nan usàulàma tok pàk.

¹⁵Màlà yattai Jesus yensak tùuya'nokon yau tok utapulàppù kulu, molopai tok utàppù aitun pe “Màichan na',” tei'ma.

¹⁶“Yà'là pàk àusàulàma kon màlà tok pokonpe?” tukaik Jesus uya tùnenupa ton yekamappoppù.

¹⁷Tewinnà kàyik uya kappon yamùk kùlottapai imaimu yeikuppù, “Enupanài, umu nessak uya sàlà apyak. Àli akkwalù wechi yau pàk molopai ichelupa pùla ikupù ya pàk,” tukaik.

¹⁸“Yeposak ya yattai'ne, ikawai'manài non pona. Molopai iwentakklonpita, tùyà kàlàlài'ma ya, molopai iicha'manta. Màlàpàk enenupa ton tekamappoi yenpe toppe tok uya, tùse tok uya ikuttok meluntàlù pùla nechii,” tukaik.

¹⁹Jesus uya tok maimu yeikuppù, “Ailon tetok ya pùnon amyamlo! Yà'là pàkàlà ken uchi apyau'nokon wechi molopai uko'mamù àpàlika kon pàk? Walawok muleppù inettàk kon upyak,” tukaik.

²⁰Tok uya walawok muleppù nepùppù Jesus piyak. Màlà yatta là Jesus yensak tùuya yau Àli akkwalù uya walawok muleppù sa'mantanùpùppù. Iwekkawai'mappù non pona. Iwepelenpàtùppù molopai iwentakklonpitappù.

²¹“Yà'là motapai ken uchi sàlà kasa nettai?” teppù Jesus uya ikàipùnù pàk. “Elekwà motapai,” teppù ya.

²²“Tukke itekkwa yenu'mapàssak ya màlà apok yak molopai tuna kak, imatanùpùiche. Ina pàk tàwà esentuppakà molopai ina ipùikattàkà ikuttok auya wechi molo yau,” teppù walawok kàipùnù uya.

²³“Ikupù auya yau, tamù'nawolon wekkupù mà màlà tà, ailon tawon ponaloppe,” teppù Jesus uya.

²⁴Màlà yattai walawok kàippùnù wentaimeppù, “Ailon ukayaik là. Kùpùikattàkà tàwà, ailon te toppe uya i'napailàiwa,” tukaik.

²⁵Tukke kappon yamùk uyàpù yene tùuya yau, Jesus uya àsà pe àli akkwalù pàk, “Àmàlà tùuselupasen pen molopai panattàppan akkwalù, àpàk wa ukayaik. Epakkakà mùkkàlà yapai, molopai kewontukkai walawok yak,” teppù.

²⁶Àli akkwalù wentaimeppù. Màlà tùpo walawok sa'mantanùpùppù ya molopai iwepakkappù. Màlàyau walawok wechippù iwelichak kasa. “Iwelichak man,” teppù tamù'nawolon kon uya.

²⁷Tùse Jesus uya walawok yemyatù pàk tachiik yanùmùppù màlàyau iwe'wuluukappù.

²⁸Molopai Jesus wewonsak tapùi tak yau, inenupa ton uya yekamappoppù tewincha iwechi yau, “Yà'là pe iwechi pàk ina uya àli yakkwalù yenpakka pùla iwechi màlà?” tukaik.

²⁹“Wàpùlemantok uya neken sàlà yekkwa akkwalù yenpakka màlà molopai tùulon nà pùla man” teppù Jesus uya tok pàk.

³⁰Màlà pata nàmàppù Jesus molopai inenupa ton uya molopai tok utàppù Galilee yawàlà. Ànù'là uya yà'là yailà tùwechi ittu iche pùla Jesus wechippù màlà,

³¹masapùla tùnenupa ton yenupa pàk iwechippù. “Kàyik Mumu tùlù màlà kappon yamùk yemyak. Tok uya iwànà màlà, tùse kan àsolùwau wei tùpo iwe'wuluuka màlà tà,” tukaik.

³²Tùse inenupa ton uya ichelupasak ittu pùla iwechippù, tùse tok usenalippappù enekamappopai pùla.

³³Capernaum pona tùwelepansak kon yau, Jesus uya tùnenupa ton yekamappoppù tapùi tau, “Yà'là pàk ken euselupa kon nechii nàk asantawàlà àuyàpù kon yau?” tukaik.

³⁴Tùse eppana tok wechippù masapùla asantawàlà tùuyàpù kon yau, “Ànùk wechi ken eke peiwa kulu kùkklottau'nokon pe iwechi màlà?” tukaik, tùuselupasak kon pàk.

³⁵Jesus weleutappù molopai 12 pan kon tùnenupa ton kà'mappù ya. “Ànù'là wapiya eppaino wechi màlà àkàmlàk molopai tamù'nawolon kon yapyoto pe nechii,” teppù ya.

³⁶Mule yanùmùppù ya molopai tok yemloto pona inonkappù ya satippe. Yanùmùi'ma temekun pona tok pàk,

³⁷“Ànù'là pùsàlà yekkwa mule, yanùnnài uyesek yau, uya uyanùmù màlà. Uyanùmù ya neken pen tùse uyeuno'nàippù yanùmù ya nàlà,” teppù ya.

³⁸John uya Jesus pàk, “Enupanài, kàyik uya àli akkwalù yenpakka eyesek yau yentai ina. Màlàyau ina, ‘Kùkkupùi,’ nùkatai ipàk, masapùla enenupa ton yekkwa pe pùla iwechi pàk,” teppù.

³⁹“Kùkkupùi, kùkatàu” teppù Jesus uya. “Ànù'là tensen yekkwa pen ku'nàippù uyesek yau, uselupa asse'ne là àli pe upàk pen màlà ikupù tùuya tùpo.

⁴⁰Màlàpàk mùkkàlà kùpokonomanài pen wechi màlà kùponalok kon pe.

⁴¹Màlàpàk ailon kulu sàlà. Ànù'là àwoppanàippù tuna ke lùkkwà là masapùla uponaloppe ewechi pàk, uya tepeppù yepolo màlà,” teppù Jesus uya tùnenupa ton pàk.

⁴²“Ànù'là pùsamlo yekkwa ton lùkwà ailon tawonnan upàk wemakuimatoppe iku'nàippù wechi yau, wakù peiwa sa' iwechi eppaino eke tàk yewattàsak i'mù pàk yau, molopai tuna kak yenu'matoppe.

⁴³Molopai eyemyatù winà ewemakuima yau, yattàkà! Wakù peiwa iwechi màlà tewin itemyatù ewemapù talà yau, asa'là itemyatù apok tùusà'nùssen pen yak àutà yentai.

⁴⁴Apok yau tok weluweyi welikù pen molopai apok usà'nùppù pen.

⁴⁵Molopai ata winà ewemakuima yau, yattàkà! Wakù pe lùiwa iwechi màlà tewin itta ewemapù talà yau, asa'là itta apok tùusà'nùssen pen yak àutà yentai.

⁴⁶Apok yau tok weluweyi welikù pen molopai apok usà'nùpù pen.

⁴⁷Molopai eyenu uya uwinàpai ewelatà toppe àkupù yau, imokkakà! Wakù pe lùiwa iwechi màlà tewin itenu Katù wettok itepulu pe yau ewechi talà yau, asa'là itenu apok tùusa'nùssen pen yak àutà yentai.

⁴⁸Molo tok yannài nan weluwe yamùk welikù pen molopai apok tok pottànài usà'nùpù pen.

⁴⁹“Apok wechi màlà tok pàk pan tùsak kùyali pona kasa.

⁵⁰Pan màlà wakù. Tùse ine'neppe tùwettok pùla iwenasak yau, yà'là kasa ken ine'neppe tukka ima auya'nokon? Ene'mayi kon pan ayau'nokon nechii, molopai echitonpa pe ettàk kon àsà pe pùla,” teppù Jesus uya tok pàk.