Read Patamona Luke 1 Bible Online

Luke 1 - Patamona bible

Luke 1

¹Tùnamasen Theophilus! Tukkan kon uya tùnùttu kon kussak man màlà yamùk iwekkussak lùppù kùklottau'nokon yekale menuka pàk.

²Tok uya yekamasak lùppù ina pàk menukappù màlà mùkyamlo sàlà yamùk yennài nan nùssan iweppyattà motapai molopai itekale yekaman nan nùssan uya.

³Màlàpàk Theophilus, masapùla wakù pe kulu tamù'nawàlà sàlà yamùk pàk usenupasak iweppyattàtok motapai pàk, usenumenkasak man wakù pe, iwekussak lùppù menuka uya pàk.

⁴Sàlà kupù uya sàlà, ailon ittu pa màlà yamùk eyenupappù lùssan pàk.

⁵Herod wechi Judea po kin pe yattai, molo iwechippù màlà paatele, Zechariah itesek Abijah yamùk tonpa. Inoppù Elizabeth wechippù màlà Aaron pa pe nàlà.

⁶Asakklàma tok wemapùppù màlà wakù pe Katù yenu yau, molopai tok uya tamù'nawàlà Katù uya enupantok kupùppù màlà. Molopai tok wechippù yawàlà.

⁷Tùse imunkà pùla tok wechippù màlà masapùla Elizabeth uya mule yepolo pùla iwechi pàk, kokko pe wechippù molopai Zechariah wechippù nàlà amoko pe.

⁸Tewin wei yattai Zechariah wechippù màlà tùwotokoyi kupù pàk, Katù yùwùk tau, tùwotokoyi kuttok ya yattai pe iwechippù.

⁹Paatele yamùk yeselu yawàlà yanùnsak wechippù màlà, Itepulu yùwùk tak apoi'nan pottàse iità toppe. Màlàpàk iitàppù màlà, tukkan kon kappon yamùk wàpùlemappù polopo apoi'nan uyatù tùse.

¹⁰

¹¹Katù inchelùyi, usenpoikappù màlà ipyak, satippe kamik pen apoi'nan pottàtok patassek latoi winà.

¹²Yensak tùuya yau Zechariah utaimelunpasak wechippù molopai iichenalippappù.

¹³Tùse Inchelù uya, “Kesenalippai, Zechariah! Katù uya àwàpùlema yetasak man molopai ànoppù Elizabeth wentu màlà walawok pe. Mesettàik John pe,” teppù ipàk.

¹⁴“Autauchinpa kulu màlà, molopai tukkan kon utauchinpa màlà mule wentusak yau.

¹⁵Masapùla eke pe iwechi màlà Itepulu yenu yau. Meluntà tinchisen inchi tak. Iwentu motapai Wakù Akkwalù ke iwanùssak wechi màlà.

¹⁶Tukkan kon kappon yamùk Israel payan mùnappo ya màlà Itepulu tok Katùyi piyak.

¹⁷Katù yekale yekamanài pe iità màlà iwapiya, meluntà pe molopai apàikkek pe Katù Maimu yekamanài Elijah kasa. Papai yamùk molopai imunkà yamùk mùnappo ya màlà echippyak. Katù Maimu yawolon kon pen lattà ya màlà wakù iwalai pàk neken usenumenkantok yak. Itepulu ponalok kon kappon yamùk kupù ya màlà tok wekoneka toppe iponalok pe,” teppù ya.

¹⁸Zechariah uya inchelù pàk, “Yà'là kasa ken uchi sàlà wechi wa ittu uya? Amoko pe nen wessaik, molopai unoppù nàlà kokko pe man,” teppù.

¹⁹“Gabriel mà Iulà tà,” tukaik inchelù uya yeikuppù. “Katù yemloto po tùwessen Iulà, uyeunossak ya sàlà eyelupase, sàlà wakù itekale yekamase àpàk.

²⁰Tùse unekama pàk ailon tesak auya pùla man, màlà tùwekkupù woton iweyu yattai pàk. Wa iwechi pàk, euselupa pen màlà, sàlà àpàk tekamapàssai'nùk wekkukkapù ponalà,” teppù ya.

²¹Màlà yattai kappon yamùk wechippù màlà Zechariah màmuku pàk. Tok usenumenkappù, “Yà'là pe lùssa'uchi iwechi pàk tachin pe kulu Katù yùwùk tau nai ko?” tukaik.

²²Tùwepakkasak yau tok yelupa ya pùla iwechippù. Màlàpàk Katù yùwùk tau we'neppà'nàtok walai yeneppù ya pe tok uya ittuppù. Molopai tùuselupa pùla iwechi pàk, ittutok tok uya ipàkàlà woton kupùppù ya màlà temyatù ke.

²³Tùwe'wotokomatok Katù yùwùk tau weyu wenukassak yau, Zechariah wemeikuppù màlà.

²⁴Màlà tùpo inoppù Elizabeth wenappù monok pe, molopai tùwùk nàmàppù ya pen màlà mùyak etoiken kaichalà kapùi.

²⁵“Wakù pe kulu Itepulu Katù upàk man molopai upùikattàsak ya man. Wekuli'matok kappon yamùk yemloto po mokkappù ya man uwinàpai,” teppù Elizabeth uya.

²⁶6 pe kapùi Elizabeth wechi monok pe yattai Katù uya inchelù Gabriel, yeunokoppù pata Galilee pon Nazareth pona.

²⁷Kàyik ittunàippù pen ema'non Mary itesek piyak, Joseph itesek kàyik, Kin David pa, yak tùwemali'ma woton piyak.

²⁸Inchelù uyàpùppù màlà ipyak molopai, “Atauchinpakà, molopai Itepulu apyau man!” teppù ya.

²⁹Mary usenumenkappù kulu màlà inchelù nekamappù pàk, “Yà'là te ya là lùssa'uchi màlà ko?” tukaik.

³⁰Inchelù uya ipàk, “Kettalipai, Mary, masapùla Katù wessak wakù pe kulu man àpàk.

³¹Monok pe ewena màlà molopai walawok pe ewentu màlà, yesettà auya màlà Jesus pe.

³²Eke pe iwechi màlà molopai, ‘ Eke Katù Mumu,’ tukaik yesatù màlà. Itepulu Katù uya màlà eke pata yesappe ima, itamo David wechippù kasa.

³³Molopai Jacob payan yesappe iwechi màlà tàwàlàlà. Itepulu pe iwettok wenukapù pen màlà!” teppù.

³⁴Mary uya inchelù pàk, “Kàyik ittunàippù pen uchi Iulà. Yà'là kasa ken uchi sàlà wechi wa?” teppù.

³⁵Inchelù uya yeikuppù, “Wakù Akkwalù, molopai Katù yapàikketù, uyàpù màlà àpona. Màlà pàk, pùsàlà wakù mule, yesatù màlà Katù Mumu, tukaik” teppù ya.

³⁶Àtonpa nàlà Elizabeth tùwentusen pen uya mule yepolo màlà, kokko pe lànen echii'ma, 6 pe kapùi monok pe man.

³⁷Masapùla yà'làlà Katù nùkupù pen woton pùla iwechi màlà,” teppù inchelù uya Mary pàk.

³⁸“Itepulu yapyoto Iulà, tàwàichi nekkupùi upàk mekamapàssai'nùk kasa,” teppù Mary uya. Molopai inchelù uya inàmàppù.

³⁹Màlà ye'mappùtak Mary wessalattàppù molopai tùusemittàpaik iitàppù wùk kùlottawon pata yak, pata Judea yak.

⁴⁰Iitàppù Zechariah yùwùk tak molopai, “Talà na' messan?” teppù ya Elizabeth pàk.

⁴¹Wa te Mary uya yetasak ya yau, Elizabeth mule welaikappù ilotta yau. Molopai iwanùpùppù Wakù Akkwalù ke.

⁴²Molopai ichelupappù eke pe, “Ipùlemasak àmàlà nossan yamùk kùlottau! Ipùlemasak mùkkàlà mule ewentutok ike woton!

⁴³Yà'là pe kulu sa' uchi iwechi pàk sàlà eke wekkuppù uwinàkàik ko, Uyepulu yan uya ukakklanpasa' lù?

⁴⁴Masapùla asse'ne amaimu yeta uya yau, mule ulotta yau nai'nùk nelaikai tùutauchinpaik.

⁴⁵Tùutauchinpasen mà mùkkàlà ailon tawon tà Itepulu yekale wekkupù ailon pe pàk,” tukaik.

⁴⁶Mary uya, “Itepulu yapulàyan uyewan,” teppù.

⁴⁷“Uyakkwalù nùtauchinpayan, Katù wechi upùikattànài pe pàk.

⁴⁸Entuppa'no sa'ne tapyoto ittusak ya pàk! Molopai sàlà motapai tamù'nawolon kon kappon yamùk uya uyesatù màlà, ‘Ipùlemasak,’ tukaik.

⁴⁹Masapùla apàikkek Katù uya eke ton kussak uponalok pe pàk, itesek màlà wakù esukenan.

⁵⁰Tùusentuppasen mùkkàlà tamù'nawolon kon tùnaman nan pàk, sàlà yattai nokon kappon yamùk molopai ewanawolok kon pàk.

⁵¹Eke meluntà temyatù yenkanài mùkkàlà molopai tùtonpa kon yentai tùwekkussan ta'nù'nài tamu'nawàlà ikupù pàk tok wekkutok pokonpe.

⁵²Eke ton, kin yamùk, nuttàppù ya tok yapon poi, molopai entuppa'nokon yanùmùppù ya.

⁵³Iwan ton yewetùppù ya wakù ton ke molopai tukkan itemamin ton yeunokoppù ya itemyawon pùla.

⁵⁴Ikupù tùuya teppù tùuya kùtamo kon pàk kupùppù ya. Molopai iyàpùppù tapyoto Israel pùikattàse.

⁵⁵Molopai tùusentupatok yenpoikatok tùuya Abraham pàk ittuppù ya, molopai tamù'nawolon kon ipayan yamùk pàk tàwàlàlà! Kùkàipùnù kon pàk wa teppù tùuya kasa,” teppù ya.

⁵⁶Mary uko'mamùppù Elizabeth piyau àsolùwau kapùi kaichalà, molopai nen uchi iwemeikuppù.

⁵⁷Elizabeth wentutok yattai uyàpùppù màlà, molopai iwentuppù walawok pe.

⁵⁸Itonpa yamùk uya wakù pe Itepulu Katù uya ipùlemasak yekale yetappù, molopai tamù'nawàlà tok utauchinpappù ipokonpe.

⁵⁹Mule wechi 8 pe wei iwentu tùpo yau, tok uyàpùppù yattàse, Jew yamùk usattàtok yeselu yawàlà. Tok uya yesettàtok yattai pe iwechippù màlà Zechariah tukaik, ikàipùnù yesek yau.

⁶⁰Tùse ichan uya, “Kane! Itesek wechi màlà John pe,” teppù.

⁶¹“Tùse ànù'là àtonpa pùla man John itesek!” teppù tok uya ipàk.

⁶²Màlàyau yentok ipàkàlà ikàipùnù uya woton kupùppù tok uya yekamappo pe, ànùk pe walawok yesek wechi iche iwechi.

⁶³Zechariah uya kaleta yennappù molopai imenukappù ya, “John màlà itesek,” tukaik. Tok usenumenkasak kulu wechippù màlà.

⁶⁴Màlà yattai là Zechariah maimu wennapoppù màlà, molopai Katù yapulà pàk iwepyattàppù.

⁶⁵Tok tonpa yamùk usenalipappù kulu màlà, molopai sàlà yekale usetappù màlà wùk kùlottawolon pata Judea pon kon yawà.

⁶⁶Tamù'nawolon kon sàlà yetan nan nùssan usenumenkappù ipàk molopai tok usekamappopàtùppù, “Ànùk pe ken uchi pùsàlà mule wechi kupù màlà?” tukaik. Masapùla wakù pe Itepulu Katù meluntàlù wechi yau useneppù kulu màlà.

⁶⁷Ikàipùnù Zechariah wanùssak wechippù Wakù Akkwalù ke molopai Katù Maimu yenpoikappù ya.

⁶⁸“Itepulu yapulàpai'nokon man, Israel Katùyi! Masapùla iyàssak man kappon yamùk tùponalok kon pùikattàse.

⁶⁹Meluntà pùikattàn woton yeunossak ya man kùponalok kon pe, tapyoto David pa pe.

⁷⁰Wa teppù tùuya kasa penalok kon wakù ton tùmaimu yenpoikannan winà.

⁷¹Wepùikattàntoppe kùyeyaton kon winàpai, molopai tamù'nawolon kon kùyeya'noman nan meluntàlù winàpai.

⁷²Tùusentuppatok yenpoikase kùtamo kon pàk, molopai emennak “Ikupù uya màlà” teppù ya ittuse.

⁷³Ailon pe ikupù uya teppù ya kùtamo kon Abraham pàk. Kùyeyaton kon winàpai kùmokkakon ya màlà. Molopai kùkuppù kon ya tùusenalippaik pùla we'wotokomantoppe. Wakù pe molopai ikasa we'nàtoppe itemlotopo tàwàlàlà wema'nà yawàlà.

⁷⁴

⁷⁵

⁷⁶Àmàlà umle, yesatù màlà Eke Tùnamasen Katù Maimu yenpoikanài tukaik, Itepulu wapiya àutà màlà ite'ma konekaik iponaloppe.

⁷⁷Iponalok kon kappon yamùk pàk tok wepùikatàtok yekama auya màlà, tok makuyi pàk ichentuppatok winà.

⁷⁸Masapùla Katù usentupassak pàkànsau wei ulenpansak wechi màlà kau pai kùponalok kon pe.

⁷⁹Molopai ilenpamù màlà ewalupàttau tùwemassan pona molopai weli'nàtok yewalupàyi yawon kon pona. Kùtta yanài pe wakù pe echitonpa pe we'nàtok yeselu yawà,” tukaik.

⁸⁰Mule usemokappù molopai meluntà pe iwenappù takkwalù yau, iwemapùppù wontaik yau tùusenpoikatok Israel yamùk piyak weyu wessepolo ponalà.