Read Patamona Luke 11 Bible Online

Luke 11 - Patamona bible

Luke 11

¹Tewin wei yattai Jesus wechippù tùwàpùlema pàk pata yau. Iwenukassak yau ya'lon kon tonpa uya ipàk, “Ityepulu, ina yenupakà wàpùlemantok pàk, John uya ta'lon kon yenupappù kasa,” teppù.

²Jesus uya tok pàk, “Àwàpùlema kon yau sà kasa mùkatàik,” teppù, ‘Ina Kàipùnù, tàwà wakù pe kulu tùkussen pe eyesek nechii, tàwà Itepulu pe ewettok nùyàpùi.

³Ina yekyali ke, ina ilepakà wei kaichalà.

⁴Ina makuyi pàk esentuppakà ina pàk, masapùla tamù'nawolon kon ina winàkàik iwemakuimasak kon nùssan pàk nàlà ina nùssentupayan. Molopai ina kùsalài sa'man ittuntok yak [tùse ina ikukkà Ene Makui winàpai].

⁵Molopai Jesus uya ta'lon kon pàk wateppù, “Tewinannà àtonpa kon utà tùwechi yakon piyak eppaino anomlak, molopai ipàk, ‘Utonpa, masa àsolùwau pùlomù pusak ke kùlepakà.

⁶Uwechi yakon welepansak man sàlà pe kulu uyùwùk tak, molopai yà'là là ilepatok uya woton pùla man!’ te yau.

⁷Itonpa uya yeiku tapùi tapai, ‘Kùwanittàpai! Manatta yakkokassak man. Umunkà yamùk pokonpe usapontàkassak man, we'wuluuka elepase yà'là là ke yentai wessaik,’ te ya.

⁸Tekamayaik àpàkù'nokon, ilepase lànen e'wuluukapai pùla iwechi tùse, iwechi yakon pe tùwechi pàk, iwe'wuluuka màlà tamù'nawolon iche iwettok ke ilepase, masapùla iwe'namatok pùla iwechi pàk,” teppù Jesus uya.

⁹“Màlàpàk tekamayaik àpàkù'nokon, Yennakà, eyemyak itùlù màlà, iwakà molopai yepolo auya màlà. Tei'tei kakkà manatta utakkoka màlà eyemyak.

¹⁰Masapùla tamù'nawolon yennan nan uya yepolo màlà, molopai iwannan uya yepolo màlà, molopai manatta utakkoka màlà tei'tei tawon yemyak.

¹¹Ànùk uya ken tùmu lepa àkài ke, molok yenna ya tùse?

¹²Wapùla malità ke là kalicho pùmoi yenna ya tùse?

¹³Àli pe là ewechii'ma'nokon wakù ton tùlù auya'nokon àmunkà kon yemyak ittun nan amyamlo. Màlà yentai nen uchi màlà Ukàipùnù epùn pon uya, mùkyamlo Wakù Akkwalù yennan nan lepa,” teppù Jesus uya.

¹⁴Jesus uya tùuselupassen pen àli akkwalù yenpakkappù màlà. Iwepakkasak yau, kàyik wessa'molùkappù tùuselupa pàk. Tukkan kon kappon yamùk usenumenkasak wechippù.

¹⁵Tùse tùulon kon uya, “Beelzebul, àli akkwalù yamùk yepulu, mùkkàlà winà àli akkwalù yamùk yenpakkayan,” teppù.

¹⁶Tùulon kon wechippù anachipai. Màlàpàk tok uya yekamappoppù, tensen yekkwa pen wotoko kuttoppe ya. Katù yeselu pe iwechi yekamanài pe.

¹⁷Tùse Jesus uya tok usenumenkatok ittuppù màlà. Molopai tok pàk, “I'nai yekkwa là pata wepantakasak epata'maik tùyiwalà yau iimatta màlà. Molopai tapùi tawon kon wepantakasak yau tok uko'mamù tamùkke tachin pe pen màlà.

¹⁸Settan wepantakasak tùyiwalà yau yà'là kasa ken meluntà pe iwechi? Wa te uya sàlà masapùla Àli akkwalù yenpakkayan Beelzebul winà mùkayatàik.

¹⁹Sàlà kasa tok yenpakka uya yau, yà'là kasa ken uchi aya'lon kon tok yenpakkan nan? Aya'lon kon nànen mà ikasa pùla kulu lànen ewechi kon yekamayan tà!

²⁰Kane, Katù meluntàlù winà làkku àli akkwalù yamùk yenpakka uya màlà, màlà uya Katù wettok itepulu pe uyàkkassak apyakù'nokon yekama màlà.

²¹“Meluntà kàyik, iwekonekasak tamù'nawàlà tùple ke, mùkkàlà tùwùk yelasu, itemamin yamùk wechi màlà molo wakù pe.

²²Tùse meluntà iwa kàyik uya yachisak molopai yentaikasak yau, tamù'nawolon iple enpen ipàk iwettok yalà ya màlà, molopai tùnonamùppù yekamù ya.

²³“Ànù'là uponalok pe pùla nai'nùk mùkkàlà uyeya'nomanài. Ànù'là upùikattànài pen ipilipù pàk mùkkàlà ita'nù'nài,” teppù Jesus uya.

²⁴“Tùwepakkasak kappon yapai yau, àli akkwalù utà màlà a'mun pata yawàlà tùwàlàkkapù patassek woton iwa pàk. Yepolo tùuya pùla iwechi yau tùyiwalà ichelupa màlà, ‘Uyùwùk tak wennapo unnàmàppù tak,’ tawon mùkkàlà.

²⁵Màlàyau iwennapo màlà, tùwùk yepolo ya wakù pe, tamù'nawàlà yakolokasak.

²⁶Iità tu'ma màlà molopai 7 pan kon àli akkwalù yamùk nepù ya ta'là, àli ton kulu nen uchi tentaino kon. Tok uyàpù màlà molo emasse. Wa iwessak yau kappon wechi màlà àli pe kulu nen uchi, wapiya tùwechippù yentai,” teppù Jesus uya.

²⁷Jesus uya wate tùpo, nossan uselupappù tukkan kon kappon yamùk kùlottapai. Molopai ipàk, “Tùutauchinpasen mùkkàlà nossan eyentunù'nàippù molopai tùmanatù pàk àku'nàippù!” teppù ya.

²⁸Tùse Jesus uya yeikuppù, “Wapùla làkku mà, tùutauchinpasan mùkyamlo Katù Maimu yetan nan molopai yawàlà tùwessan tà!” tukaik.

²⁹Tùwoi kappon yamùk wepilichak tùse Jesus uya, “Àli pe kulu sàlà yattai nokon kappon yamùk man! Tensen yekkwa pen wekkuttoppe yà'làlà yekamanài pe yekamappon nan mùkyamlo, tùse tok lepa pen màlà, Jonah yekale neken yekama,” teppù ya.

³⁰“Katù Maimu yenpoikanài Jonah wechippù màlà Nineveh pon kon kappon yamùk uya yentok ipàkàlà pe. Màlà kasa làma, Kàyik Mumu wechi màlà sàlà yattai nokon uya yentok ipàkàlà pe.

³¹Ittuntok Weyu yattai, Kamik pen wei wepakkatok winon pata yapai Kuwin wà'mùssakka màlà, molopai àli pe ichelupa màlà sàlà yattaino kon talumattà pe, masapùla meipai kulu tùutàsak Solomon uya enupantok yetase pàk. Molo man Solomon yentaino talà ukayaik àpàkù'nokon.

³²Ittuntok Weyu yattai Nineveh pon kon wà'mùssakka màlà molopai àli pe tok usàulàma màlà àpàkù'nokon, masapùla tùwelattàsak kon tùmakuyi kon winàpai pàk Jonah uya itekale yekama tetase. Jonah yentaino talà man ukayaik àpàkù'nokon!” teppù Jesus uya.

³³“Ànù'là mùkkàlà lanppu pottànài molopai miya là yonannài pen, wapùla pùsau yokoik là inonkanài pen, tùse yapon pona làkku inonkanài, kappon yamùk uya akkwa yentoppe tùwewomù kon yau.

³⁴Eyenu kon wechi màlà lanppu kasa eyesak pona. Eyenu kon wechi wakù pe yau tamù'nawàlà eyesak wechi màlà akkwa yau. Tùse àli pe iwechi yau, tamù'nawolon eyesak kon wechi màlà ewalupàttau.

³⁵Tùttuseichi ettàk kon ayau'nokon nai'nùk akkwa wechi ewalupà pe tukaik.

³⁶Màlàyau tamù'nawàlà eyesak kon wechi akkwa yau, ipùkkù pe là ewalupàttau tùwessen pùla yau, tamù'nawàlà eyesak kon wechi màlà akkwa yau, lanppu ulenpansak uya eweyuttàsak kon takkwayi ke kasa,” teppù Jesus uya.

³⁷Jesus wenukassak tùuselupa pàk yau, Pharisee uya ikà'mappù tùpyak iita'lettà toppe. Màlàyau iwewomùppù, molopai iweleutappù uta'lettàn yapon piyak.

³⁸Pharisee usenumenkasak wechippù màlà, Jesus uya temyatù kolùka pùla iwechi yensak tùuya yau.

³⁹Màlàpàk Jesus uya ipàk wateppù, “Amyamlo Pharisee yamùk mùkyamlo pùsau molopai palapi kukan nan polo po, tùse ayau'nokon àsà pe molopai àli pe we'nàtok ke awanùssak kon man.

⁴⁰Pakko ton! Katù ken na' polo pon konekanàippù uya nàlà yawon konekappù pen?

⁴¹Tùse itesak pe ewettok kon itùtàk kon entuppa'nokon yemyak molopai tamù'nawolon wechi màlà wakù pe.

⁴²“Àsà pe iwechi màlà àpona'nokon Pharisee yamùk! Katù lepan nan amyamlo tewin'ne, itesak pe ewettok kon yapai kùyali kà'nùnpatok mint ke, rue ke molopai tùulon kon nà là tùkà'nùnsan ke. Tùse wakù pe ikasa Katù pùnùnmatok nulunpan nan amyamlo. Sàlà yamùk làkku ànkupù kon pan itonpa tùnulunpaik pùla tùse.

⁴³“Àsà pe iwechi màlà àpona'nokon Pharisee yamùk! Eke ton yapon pe ikussak iwakùli ton amyamlo wepili'nàtok itak tau. Molopai atta messatàu te ichelok kon anama kon pe, makitti tau.

⁴⁴Àsà pe iwechi màlà àpona'nokon! Ittutok ipàk pùn uluwaik, kappon yamùk usatok ipolo tùttuse pùla màlà walai non amyamlo,” teppù ya.

⁴⁵Law pàk enupan nan tonpa uya Jesus pàk, “Enupanài, wate auya yau, ina pàk nàlà euselupa nai'nùk àli pe!” teppù.

⁴⁶Jesus uya yeikuppù, “Àsà pe nàlà mà iwechi màlà àpona'nokon tà Law pàk Enupan nan! Eme'nek pe kappon yamùk lotùmannan amyamlo yalà tok uya yentai, tùse eyemyatù kon yenkan nan nùkkwà là pen amyamlo tok pùikattàse.

⁴⁷Àsà pe man àpona'nokon! Uluwaik konekan nan amyamlo Katù Maimu yenpoikannan, atamo kon yamùk nùwànàssan uluwachi pe.

⁴⁸Amyamloichi mùkyamlo yekamannan atamo kon yamùk nùkupùppù wechi awakùli kon pe. Masapùla Katù Maimu yenpoikannan wànàppù tok uya molopai tok uluwachi konekappù auya'nokon.

⁴⁹Sàlà wenai Katù uya ittutok tùuya yau, ‘Katù Maimu yenpoikannan yeunoko uya màlà molopai itekale yekamannan. Tok uya tok tonpa yamùk wànà màlà. Tok tonpassan talumattà tok uya màlà,’ tesak màlà.

⁵⁰Kappon yamùk sàlà yattaino kon talumattà màlà tamù'nawolon kon Katù Maimu yenpoikannan wànàppù wolù konekappù motapai wenai,

⁵¹Abel wànàppù motapai Zachariah wànàppù motak, iwàsak lùppù wàpùlemantok patassek molopai wakù kulu, esukenan patassek tawon yakkletau. Ewaik, tekamayaik àpàkù'nokon kappon yamùk sàlà yattaino kon talumattà màlà, tamù'nawolon kon mùkyamlo wenai.

⁵²“Àsà pe man àpona'nokon, Law pàk enupan nan! Ittutok kiyi mokkappù auya'nokon man. Amyamlo là wewoùppù pùla man molopai mùkyamlo tùwewonsan wakkàtùppù auya'nokon man,” teppù Jesus uya.

⁵³Jesus uya pata nànsak yau, Law pàk enupannan molopai Pharisee yamùk wessa'molùkappù italumattà pàk tukke yà'làlà pàk tok uya yekamappopàtùppù.

⁵⁴Yachitok tùuya'nokon iwinà woton yepoloiche, yà'là yekkwa pe là ikasa pùla ichelupasak yau.