Read Patamona Luke 12 Bible Online

Luke 12 - Patamona bible

Luke 12

¹Tukke kappon yamùk wepilichak molopai tok uselemluku echipona tùse, Jesus uya wapiya wateppù ta'lon kon pàk, “Elannek pe ettàk kon Pharisee yamùk so'liyi pàk, tok usennakatok pàk wa te uya màlà,” teppù.

²“Yà'làlà iwaputtàsak lùppù wapukka màlà molopai amak pe tùkussen ittu màlà.

³Màlàpàk uchi yà'làlà pàk euselupappù ewalupàttau useta màlà wei nai, molopai yà'làlà eusetaleupappù kappon pana yau tapùi iwakkàssak yakkosak tau, yekama màlà eke pe tapùi ipu poi,” teppù Jesus uya.

⁴“Utonpa yamùk, tekamayaik àpàkù'nokon, kesenalippatàu esak wàn nan pàk, tùse màlà tùpo yà'làlà àsà ku'nài nan pen pàk.

⁵Usenalipantok ipàk yekama uya sàlà àpàkù'nokon. Katù pàk esenalippatàk kon, wàn tùpo apok yak enu'mantok tùuya yapàikketù yesak pàk. Ewaik, tekamayaik àpàkù'nokon, ipàk esenalippatàk kon!

⁶“5 pan kon palikawak walai non tolon yamùk ken na' tùchilanmasan pen asa'lon pùlayatta pun yepek pe? Tùse tewinan nà puttàkà'nùppù Katù uya tok kùlottau pen.

⁷Appai kon pùpok là ittusak màlà tamù'nawàlà. Màlàpàk uchi kesenalippatàu, tukkan kon palikawak walai non tolon yamùk, yentai lùiwa ewechi kon màlà” teppù Jesus uya.

⁸“Tekamayaik àpàkù'nokon, Ànù'là uponalok pe tùwechi yekamanàippù ayupo, yekama màlà, màlà kasa lùppù Kàyik Mumu uya Katù inchelùyi yamùk yemloto po.

⁹Tùse ànù'là uponalok pe tùwechi yekamanàippù pen, yekama nàlà Kàyik Mumu uya pen màlà, Katù inchelùyi yamùk yemloto po.

¹⁰“Ànù'là àli pe tùuselupasen Kàyik Mumu winàkàik wechi yau, ipàk usentuppan màlà. Tùse ànù'là àli pe tùuselupasen Wakù Akkwalù winàkàik pàk usentuppan pen màlà.

¹¹“Tok uya enessak kon eyittuse'nokon wepili'nàtok itak tak, wapùla eke pata yesak yemlotopona, wapùla epotolù yamùk yemlotopona yau, kataimelunpatàu atta là ewenai'nokon ewechi kon pàk, wapùla yà'là te là auya'nokon pàk.

¹²Masapùla Wakù Akkwalù uya eyenupa kon màlà, màlà yattai yà'là tetok là auya'nokon ke,” teppù Jesus uya.

¹³Kàyik uya tukkan kon kùlottapai Jesus pàk, “Enupanài, ului uya mamin ina kàipùnù nùnàmàppù pantakatoppe yekamakà,” teppù.

¹⁴Jesus uya yeikuppù, “Kàyik, ànùk uya ken ulepappù sà kasa messaik tetoppe uya, wapùla mamin pantakatoppe uya amyamlo asa'lon kon piyak?” tukaik.

¹⁵Molopai iichelupappù, “Yetatàk kon, molopai useka'nonkantok yà'là yamùk là iche winàpài ettàk kon. Masapùla kappon wemattok màlà tukkan itesak pe iwettok pùkkù pen,” teppù ya tamù'nawolon kon pàk.

¹⁶Màlàyau Jesus uya sàlà panton yekamappù, “Mamin yesak kàyik wechippù umà yesak wakù pe kùyali yattanù'nài.

¹⁷Tùusenumenka pàk iwechippù màlà, tùyiwalà ‘Tamù'nawolon uyeipa pilipù uya patassek pùla man te. Yà'là kupù uya sa' ko?’ tukaik.

¹⁸‘Sàlà kupù uya màlà. Kùyali pilittok uya itak yalakka uya màlà molopai eke peiwa yamù toppe uya, màlà tak àlichi walai pilipù uya màlà molopai tamù'nawàlà tùulon kon nà wakù ton nonka uya,’ teppù ya.

¹⁹‘Molopai nen uchi upàk, tamù'nawolon iche ewettok yesappe messaik tukke kilichimochi. Wakù pe emakkà, ata'lettàkà, àwuku inchikà, molopai atauchinpakà,’ te uya màlà.

²⁰Tùse Katù uya ipàk, ‘Pakko àmàlà! Sàlà yewalupàyi tau ayakkwalù uya ànàmà màlà. Màlàyau ànùk uya ken sàlà yamùk ànkupùppù àponalok pe yanùmù?’ teppù.

²¹“Sàlà kasaichi mùkyamlo sàlà motau mamin pilichai'nan nùk tùponalok kon pe wechi màlà, Katù yenu yau itemamin pùla,” teppù Jesus uya.

²²Màlàyau Jesus uya ta'lon kon pàk, “Sàlà kasaichi iwechi pàk tekamayaik àpàkù'nokon, Kataimelunpatàu ewemattok kon pàk, yà'là là napù auya'nokon pàk, wapùla eyesak kon pàk, àpon kon iche ewettok kon pàk.

²³Masapùla wema'nàtok màlà kùyali yentaino kulu, molopai esak màlà pon yentaino iwa.

²⁴Masa tolon yamùk yentàk kon, kùyali yek pànnài nan pen mùkyamlo wapùla kùyali pili'nài nan pen, kùyali nonkatok yak wapùla kùyali yùwùk pùnon. Katù mùkkàlà tok yewe'nài. Tolon yamùk yentaino kon nen amyamlo!

²⁵I'nai ken àklottawon' nokon wemapù tachin peiwa tùutaimelunpa ipàk winà?

²⁶Malalo'nan nùkkwà là kupùi'ma pùla, yà'là pe iwechi pàk tùulon kon pàk autaimelunpa kon màlà?” teppù Jesus uya.

²⁷“Masa yuk wùpùta yentàk kon. Tùwe'wotokomasan pen màlà wapùla pon konekan nan nà pen. Tùse tekamayaik àpàkù'nokon Solomon tukkan nànen itemamin wepontàsak wakù pe sàlà yuk yùpùlù yamùk kasa pùla iwechi màlà.

²⁸Katù mùkkàlà wanak mainanpanài, wanak màlà sàlà pe nulà tùwessen molopai ipla tùwenasen ewanawà, tùpottàsen. Màlà yentai lùiwa ken na' uchi àpontà kon ya pen? Elekkwà pe kulu ailon tetok auya'nokon man!” teppù Jesus uya.

²⁹“Màlàpàk uchi kataimelunpatàu, annapù kon woton molopai eninchi kon woton iwa pàk.

³⁰Masapùla ailon Katù ittun nan pen mùkyamlo tàwàlàlà sàlà yamùk iwan nan! Àkàipùnù kon sàlà yamùk iche ewechi kon ittunài.

³¹Tùse làkku Katù wettok iche ikuttàk kon wapiya molopai sàlà yamùk iche ewettok kon ke elepa kon ya màlà.”

³²“Kesenalippatàu uchi umunkà yamùk lùkkwà! Masapùla Katù Akàipùnù kon utauchinpasak man elepa kon pàk itepulu pe tùwettok ke.

³³Itesak pe ewettok kon ichilanmatàk kon, molopai entuppa'nokon yemyak pùlayatta itùtàk kon. Tùupoippàtasen pen àpùlayattayi kon yen ikonekatàk kon molopai emamin kon ikuttàk kon epùn po. Màlà motau iwu'matù pen màlà, masapùla amak là wewomù pen màlà, molopai ene yamùk uya là yanù pen.

³⁴Masapùla emamin kon yau nai'nùk, yau nàlà, eyewan kon wechi màlà,” teppù Jesus uya.

³⁵“Iwepontàsappe ettàk kon, iwekonekasappe wotoko ponaloppe, molopai tàwà alanppuyi kon tùuyatù pàk nechii.

³⁶Apyoto yamùk tepulu kon wennapo wemali'man tùpo uta'lettàntok yapai màmu'nài nan kasa. Iyàssak yattai nen uchi manatta wànà yau, asse'ne tok uya yakkoka màlà iponaloppe.

³⁷Tùutauchinpasan mùkyamlo apyoto yamùk, tùuyàssak yau itepulu nepolo ton, iipakasappe. Ailon kulu sàlà, iwepokùlùyittà màlà, molopai tok yeleutanùpù ya uta'lettàn yapon piyak, molopai tok yewetù ya màlà.

³⁸Tùutauchinpasan mùkyamlo itepulu nepolo ton iwekonekasak pe tachinpe tùpo là, anomlak wapùla ite'mappùtak là tùuyàssak yau.

³⁹Molopai sàlà mùttutàik! Amak uyàttok yattai ittu tùuya yau tapùi yesak uya, tùwùk tùkwàsse iwewontoppe ikupù pen màlà.

⁴⁰Molopai amyamlo nàlà, tùwekonekaik ettàk kon, masapùla Katù Mumu uyàpù màlà, yà'là yekkwa yattai là ittu auya'nokon pùla” teppù Jesus uya.

⁴¹Peter uya yekamappoppù, “Itepulu, sàlà na' panton yekama auya màlà ina pàk, wapùla ka' tamù'nawolon kon pàk lù?” tukaik.

⁴²Itepulu uya yeikuppù, “Ànùk ken uchi mùkkàlà ailon molopai pukkek apyoto? Mùkkàlà Itepulu nùnonka tapùi yesappe, tapyoto yamùk lepatoppe ya tok yeipa ke itùtok yattai.

⁴³Tùutauchinpasen mùkkàlà apyoto itepotolù wemeichak nepolo tùwotokoyi kupù ya tùse!

⁴⁴Ailon kulu sàlà, itepulu uya mùkkàlà apyoto tùlù màlà tamù'nawolon temamin yennài pe.

⁴⁵Tùse yattai pùla apyoto uya tùyiwàlà wate, ‘Tachin pe Uyepulu uyàpù pùla man te,’ teya, molopai tùulon kon apyoto yamùk ippoppàtù pàk iwessa'molùka, kàyik yamùk molopai nossan yamùk, molopai tùuta'lettà pàk iwechi, tùwuku inchi pàk, molopai tùwetùmù pàk.

⁴⁶Mùkkàlà apyoto yepotolù wennappo màlà yà'là yekkwa yattai là, enpen iwettok yattai pùla, ittu ya pùla. Itepulu uya yattàpàtù màlà echikili pe, molopai ipatassek yak inonka ya ailon tawonnan pen pokonpe.

⁴⁷“Mùkkàlà apyoto tepulu wettok ikupù tùuya iche ittunài tùse ikutoppe tùuya iwekonekasak pen molopai iche iwettok ku'nài pen, ippoppàtù màlà tukke itekkwa.

⁴⁸Tùse mùkkàlà ittunài pen, molopai yà'là là ku'nài màlà wenai tùtalumattàttoppe, ippoppàtù màlà tukke kulu pùla itekkwa. Kappon eke pe ilepasak lùppù, winàpai eke pe iche we'nà màlà. Molopai eke peiwa ilepasak lùppù, winàpai eke peiwa nàlà iche we'nà màlà.”

⁴⁹“Uyàpùppù màlà non pottàse apok ke, molopai ipottàkassappe kulu eppai man.

⁵⁰Usenpataukantok molo man unanùmù, molopai utaimelunpayaik ipàk iwenukapù ponalà.

⁵¹Echitonpa pe na' we'nàtok nessak uya non pona pe mùttuyatàu? Kane, tekamayaik àpàkù'nokon, echitonpa pe we'nàtok pen, tùse wepantapà'nàtok.

⁵²Sàlà motapai tapùi tawon kon, 5 pan kon tamù'nawàlà wepantaka màlà, àsolùwawon kon wechi màlà asa'lon kon winàkàik àsà pe, molopai asa'lon kon wechi màlà àsolùwawon kon winàkàik àsà pe.

⁵³Papai yamùk wechi màlà tùmu winàkàik àsà pe molopai imumu wechi màlà tùkàipùnù winàkàik àsà pe, amai wechi màlà tùmunkà ulichamichi winàkàik àsà pe molopai ulichamichi wechi màlà tùsan winàkàik àsà pe. Ewoppù wechi màlà tùpasse winàkàik àsà pe, molopai ipasse wechi màlà tewoppù winàkàik àsà pe,” teppù Jesus uya.

⁵⁴Jesus uya nàlà kappon yamùk pàk wateppù, “Katuppluk uyàpù wei wewontok winàpai tewinanpa yau, ‘Konok uta pe man,’ tawonnan amyamlo, molopai tùutasen.

⁵⁵Molopai kamik pen wei wepakkatok winon winàpai assetun utasse'nùmù yau, ‘A'nek pe iwechi pe man,’ tawonnan amyamlo, molopai a'nek pe tùwessen.

⁵⁶Tùusennakasan! Yà'là kasa là non molopai kak usentok yekaman nan amyamlo. Yà'là pe ken uchi iwechi pàk yà'là te là sàlà pata weyu uya yekama auya'nokon pùla iwechi màlà?” teppù Jesus uya.

⁵⁷“Yà'là pe ken uchi iwechi pàk eyiwalà' nokon iwalai ittuiche ewechi kon pen màlà?

⁵⁸Kappon uya àkottùmase ayalà ittuntok yak yau, ànùttu yawàlà ikonekakà ipokonpe eye'ma kon tau, ayalà ya ittunài yemlotopona tukaik, molopai achinài yemyak àtùlù ittunài uya molopai achinài uya àtùlù patikichi tak tukaik.

⁵⁹Ewepakka pen màlà, màlà motapai ukayaik, àpàkù'nokon tamù'nawolon ene'ma pe ikussak ye'ma auya ponalà,” tukaik.