Read Patamona Luke 13 Bible Online

Luke 13 - Patamona bible

Luke 13

¹Màlà yattai tùulon kon kappon yamùk wechippù màlà molo, mùkyamlo uya Jesus pàk Galilee pon kon Pilate nùwànàssan Katù yemyak tùntùlù kon tùlù tok uya tùse, yekamappù.

²Jesus uya tok yeikuppù, “ Pùsamlo na' Galilee pon wechippù àli pe kulu imakuyippù pe tùulon kon Galilee pon kon yentai pe mùttuyatàu. Masapùla màlà kasa tok wettalumattàsak pàk?

³Kane! Tekamayaik àpàkù'nokon. Amakuyi kon winàpai ewelattà kon pùla iwechi yau, màlà kasa nàlà aumatta kon màlà tamù'nawàlà,” teppù Jesus uya.

⁴“Wa pùla mùkyamlo 18 pan kon Siloam po kusan tapùi, pata yene yùwùk wekkawai'masak tok pona nùwànàssan wechippù na' àli pe kulu tùulon kon kappon yamùk Jerusalem po tùwemassan yentai pe mùttuyatàu?

⁵Kane! Tekamayaik àpàkù'nokon. Amakuyi kon winàpai ewelattà kon pùla iwechi yau, màlà kasa nàlà aumatta kon màlà tamù'nawàlà,” teppù Jesus uya.

⁶Màlàyau nen uchi Jesus uya sàlà panton yekamappù. “Kàyik tumà yau fig yek pànsak wechippù. Iitàppù itepelu iwase tùse yepoloppù ya pen màlà.

⁷Màlàpàk tù'mà mainanpanài pàk, ‘Yenkà, àsolùwau kilichimochi kaichalà uyàppàtù pàk wessa'man yei yepelu iwase sàlà yei pàk, tùse yepolo uya pùla. Yattàkà! Yà'là pe ken iwechi pàk non yapulà pàk iwechi?’ teppù ya.

⁸Tùse umà mainanpanài uya, ‘Tàwà nechii, Itepulu, tewin kilichimochi lùppù neken nà, non yaka uya màlà iwoi molopai ipo'mayi tùlù uya màlà yak.

⁹Molopai iwepetasak nùyàssai'nùk kilichimochi yattai yau, wakù pe iwechi màlà, iwepetasak pùla iwechi yau, yattà làichi auya màlà,’ teppù ya,” teppù Jesus uya.

¹⁰Jew yamùk wàlàkkattok yattai Jesus uya kappon yamùk yenupappù wepili'nàtok itak tau.

¹¹Nossan wechippù màlà molo, àli akkwalù nùtalumattàppù 18 pe kilichimochi. Tàmui pe neken iwechippù, iwettossalonokka pùla kulu.

¹²Yensak tùuya yau, Jesus uya yekamappoppù, “Nossan, eye'netù yapai ewennasak man!” teppù ya.

¹³Temyatù nonkappù ya ipona. Màlàyau asse'ne màlà yattai iwettossalonokkappù molopai Katù yapulàppù ya.

¹⁴Eke, wepili'nàtok itak yepulu we'naikasak wechippù màlà Jesus uya ipittàsak Jew yamùk wàlàkkattok yattai pàk. Màlàpàk tùuselupa pàk iwessamolùkappù molopai kappon yamùk pàk, “6 pan màlà wei we'wotokoman weyu. Màlàpàk màittàik màlà yamùk wei yattai echipittàse tùse Jew yamùk wàlàkkattok yattai pùla!” teppù ya.

¹⁵Itepulu uya yeikuppù, “Tùusennakasan amyamlo! Ànù'là ken na' àklottawon' nokon tùkùn paka wapùla tonki yeukanài itùwùk tapai pen, molopai yenpakkanài pen na' iwoppase Jew wàlàkkattok yattai.

¹⁶Talàichi man Abraham pa lùppù Settan nachippù lùppù pe 18 pe kilichimochi. Imokka pen ken na' uchi màlà yachitok yapai Jew yamùk wàlàkkattok yattai?” tukaik.

¹⁷Yeittok ya uya tamù'nawàlà iteyaton non kuli'mappù, tamù'nawolon kon kappon yamùk utauchinpa wakù ton Jesus nùkupùppù pàk tùse.

¹⁸Jesus uya wateppù, “Yà'là yekkwa ken màlà Katù wettok itepulu pe? Yà'là kasa iwechi màlà te uya ken?

¹⁹Pùmùi yenappà walai mustard itesek kasa iwechi màlà, kàyik nalàppù molopai inpàmàppù tù'mà yau kasa. Ipàsak wattappù molopai yei pe iwenappù, molopai tolon yamùk uya tùpon kon kapùppù ipanta yamùk po,” teppù ya.

²⁰Molopai tu'ma Jesus uya tok yekamappoppù, “Yà'là yekkwa màlà Katù wettok itepulu pe, te uya ken?

²¹Yapuluwetanù'nài nossan nùtùlù pùlomù yak molopai yoi'ma ya tàwà tamù'nawàlà iwapuluweta ponalà. Màlà kasa iwechi màlà,” teppù ya.

²²Jesus utàppù màlà eke ton molopai echikili ton pata yamùk yawàlà, kappon yamùk yenupa pe molopai Jerusalem pona tùutà pe.

²³Kappon uya yekamappoppù, “Itepulu, tukkan kon kulu pen ken na' wepùikattàsak wechi?” tukaik. Jesus uya tok yeikuppù.

²⁴“Wakù pe ànùttu kon ikuttàk kon ettakkù manatta yai ewewomù kon pa. Masapùla tukkan kon kappon yamùk wechi màlà tùwewomùiche' nokon tùse tok wewomù pen màlà, ukayaik àpàkù'nokon.”

²⁵“Tapùi yesak we'wuluuka màlà manatta yakkose. Màlà yattai polopo satippe ewechi kon màlàyau manatta wànà auya'nokon. ‘Manatta yakkokakà ina wewon toppe, ina yepulu,’ te auya'nokon. Màlàyau eyeiku kon ya màlà, ‘ I'nailàpai là àuyàssak kon ittu uya pùla man!’ tukaik.

²⁶Màlàyau, ‘Ina uta'lettàppù kutà molopai tùwukukon inchippù ina uya àpokonpe. Molopai kappon yamùk yenupappù auya ina pata yau,’ tukaik yeiku auya'nokon.

²⁷‘Eyittu kon uya pùla man. Inai'là pai là àuyàssak kon ittu uya pùla man, tamùnawàlà amyamlo àli ku'nài nan!’ tukaik tu'ma yeiku ya màlà.

²⁸Molo nen uchi kalannà màlà molopai àkàlàlàikka, Abraham, Isaac, Jacob, molopai tamù'nawolon kon Katù Maimu yenpoikannannùssan yene auya'nokon Katù wettok itepulu pe yattai yau, polopo nen uchi àkupù kon tùse.

²⁹Kappon yamùk uyàpù màlà wei wepakkatok molopai wei wewontok winàpai, kamik winon wei wepakkatok winàpai, molopai kamik pen winon wei wepakkatok winàpai. Molopai tok weleuta kùyali yapon piyau, itepulu pe Katù wettok patassek yau.

³⁰Màlà yattai nen uchi àkàmlàk nainan nùk sàlà pe wechi màlà wapiya. Molopai sàlà pe wapiya nai'nan nùk wechi màlà àkàmlàk,” teppù ya.

³¹Màlà yattai Pharisee yamùk tonpa yamùk uyàpùppù màlà Jesus piyak. Molopai Jesus pàk, “Sàlà motapai itàkà tùulon yailà, masapùla Herod àwàpai man,” teppù tok uya.

³²Jesus uya tok yeikuppù. “Itàkàichi mùkkàlà maikan pàk, ‘Àli akkwalù yamùk yenpakka uya sàlà, molopai kappon yamùk ipittà uya sàlà, sàlà pe. Ewanawà molopai icholùwano wei yattai uwotokoyi yenuka'nùppù uya màlà nùkapàssan katantàk,’ teppù ya.

³³Tùse utà sàlà uye'ma tawà sàlà pe, ewanawà, molopai màlà yewanawà. Ikasa pùla Katù Maimu yekamanài wànà i'nailàlà wechi màlà, tùse Jerusalem po neken,” teppù ya.

³⁴“Jerusalem, Jerusalem! Katù Maimu yenpoikannan wànnan amyamlo, molopai tekale yekamase Katù neunokossan wàn nan amyamlo tàk ke. Yà'là kaichalà là itekkwa uyemekun àntùpai wechippù tamù'nawolon kon kappon yamùk àpon kon woi, kalicho uya tùmunkà yamùk pilipù tapàli yokoik kasa, tùse unulunpappù auya'nokon.

³⁵Sàlà pe apatassek kon nonka uya nen uchi màlà tamù'nawàlà. Uyene auya'nokon pen nen uchi màlà, ‘Tàwà Katù mùkkàlà tùuyàssen Itepulu yesek yau yapulài tetok auya'nokon yattai uyàpù ponalà ukayaik àpàkù'nokon,” teppù Jesus uya. {PSA 118.26}