Read Patamona Luke 14 Bible Online

Luke 14 - Patamona bible

Luke 14

¹Jew yamùk wàlàkkattok yattai Jesus utàppù màlà ata'lettàse eke ton tonpa Pharisee yùwùk tak. Molopai kappon yamùk wechippù itenupàkà kulu.

²Kàyik iwaupàssak ichi yamùk molopai itemekun yamùk tawon uyàpùppù màlà Jesus piyak,

³Jesus uya Law pàk enupan nan molopai Pharisee yamùk tawonnan yekamappoppù, “Law yawàlà ken na' kappon ipittà Jew yamùk wàlàkkattok yattai wechi màlà, wa pùla kane?” tukaik.

⁴Tùse eppana tok iwechippù. Jesus uya kàyik yachippù. Ipittàppù ya molopai yeunokoppù ya.

⁵Màlàyau tok pàk wateppù ya, “Ànù'là mule wapùla itùkùn nà paka wepukasak i'nawon non yakasak yak Jew yamùk wàlàkkattok yattai yau, na' imokka auya'nokon pen eppaino màlà yattai?” teppù ya.

⁶Tùse tok uya yeiku pùla iwechippù màlà.

⁷Jesus uya ikà'masak kon uya wakù kulu patassek yanùmù yeneppù. Màlàpàk sàlà panton yekamappù ya tok pàk.

⁸“Ànù'là uya àkà'masak kon wemali'mansak uta'lettàtok yak yau, wakù kulu patassek yak keleutatàu. Yattai pùla nen tùulon kappon eyentaino iwa kà'masak wechi.

⁹Màlàyau àkà'manàippù'nokon uyàpù nen uchi molopai, ‘Tàwà pùsàlà sàlà patassek yanùmùi,’ te ya àpàkù'nokon. Màlàyau nen uchi ewekuli'ma kon, wakù kulu pen nen uchi patassek yak eweleuta kon.

¹⁰Tùse làkku àkà'masak kon yau, mùtàtàik molopai meleutatàik wakù kulu pen patassek yak, àkà'manàippù'nokon uyàttoppe apyakù'nokon. ‘Utonpa, àikkà, enukkà kakàik palà,’ te toppe ya. Sàlà uya anamatok nepù màlà tamù'nawolon kon ikà'masak kon yemloto po.

¹¹Masapùla ànù'là eke pe tùwekkussen ma màlà àssà'mùla, molopai ànù'là àssà'mùla tùwessen ma màlà eke pe,” teppù Jesus uya.

¹²Molopai Jesus uya tùkà'manàippù uta'lettàntok yak pàk, “Uta'lettàntok koneka auya yau, ewechi yakon non kùkkà'mai, wapùla ayakon non, wapùla àtonpa yamùk, wapùla tukkan nà itemamin ayakontalù kon, masapùla nen tok uya àkà'ma tu'ma màlà molopai eye'makassak pe iwechi màlà.

¹³Uta'lettàntok konekasak auya yau, entuppa'nokon mùkà'maik, sesen pan kon, tùusasan pen molopai enpùnon.

¹⁴Molopai àpùlema kon màlà, masapùla tok uya eye'ma yentai iwechi màlà. Eye'ma nen uchi màlà Katù uya, wakù ton kappon yamùk welichak kon wuluukasak yau,” teppù Jesus uya.

¹⁵Kappon yamùk chichiu pe tùwessan uta'lettàntok yapon motau tonpa uya sàlà yetappù molopai Jesus pàk, “Tùutauchinpasen kulu mùkkàlà uta'lettàntok yapon woi chichiu pe tùwechi woton Katù wettok itepulu pe patassek yau!” teppù.

¹⁶Jesus uya ipàk wateppù, “Molo kàyik wechippù. Eke pe uta'lettàntok konekasak ya. Màlà yak tukkan kon kappon yamùk kà'mappù ya.

¹⁷Màlà yattai tapyoto yamùk yeunokoppù ya tùnkà'massan pàk, ‘Àittàk kon uchi tamù'nawolon wekonekasak man!’ kase.

¹⁸Tùse tok wessa'molùkappù tùutàtok kon pe pùla tùku'nài'nokon yekama pàk, esse'mappù pàk. Wapiyalok uya, ‘Umà ye'masak uya man molopai utà kulu màlà yense, màlàpàk tàwà là umàmuttak,’ teppù.

¹⁹Tùulon uya, ‘10 pe paka yamùk ye'masak uya man, molopai tok ittuse utà sàlà, màlàpàk tàwà là umàmuttak,’ teppù.

²⁰Tùulon uya nàlà, ‘Wemali'masak man sàlà pe kulu màlàpàk uyàpù pùla man,’ teppù.

²¹Apyoto wennapoppù molopai tamù'nawàlà sàlà yamùk yekamappù ya tepulu pàk. Màlàyau tapùi yesak we'naikasak kulu wechippù. Molopai tapyoto pàk, ‘Asse'ne itàkà, eke asantak molopai tapùi yapowino'nan molopai tapùi yakkletawo'nan asanta yamùk lùkkà tawà. Entuppa'nokon inetta, sesen pan kon, enpùnon, molopai tùusasan pen inetta,’ teppù ya.

²²Màlàyau apyoto uya, ‘Euselupatok kussak là man, Uyepulu, tùse patassek lùppù molo man,’ teppù.

²³Màlàpàk itepulu uya tapyoto pàk, ‘Itàkà, Pata ye'ma yamùk eke ton tawàlà, molopai echikili ton àlitta kùlottawolon asanta tawàlà, molopai tok mewonnùpùik uyùwùk wanùttoppe.

²⁴Ànùk yan nà ikà'masak kon tùse iyàssak kon pen, uya uyeipa yonpa pen màlà,’ teppù,” tukaik.

²⁵Tukke kulu kappon yamùk utàppù màlà Jesus ya'là, iwelattàppù tok winàkàik molopai tok pàk wateppù ya.

²⁶“Ànù'là wechi unenupa pe pen màlà, tùkàipùnù, tùsan, tùnoppù, tùmunkà yamùk, takon non, tùpachi ton molopai tùwemapù yeselu pùnùnmai'ma, u'nùnma tùuya yentai.

²⁷Ànù'là tùtalumattàtok pulusuk yanài pen molopai uya'là tùuyàssen pen wechi màlà unenupa pe pùla.

²⁸“Yattai pùla tewinan nà àkklottawon'nokon wekkupù kusan tapùi, pata yentok ipoi yamù pàk yau, iweleuta màlà wapiya, yà'là kaichalà là pùlayatta iche iwechi ittuse, màlà wotoko yenuka'nù'nài yek pe iwechi yense.

²⁹Màlà kupù ya pùla iwessak yau, yenuka'nùppù ya pen màlà, yamùtok ipo kukkassak ya lànen tùse. Molopai tamù'nawolon kon iwekkussak lùppù yennài nanùssan wàkklà màlà ipàk.

³⁰‘Pùsàlà kusan tapùi yamù pàk nepyattàtai, tùse yenuka'nùppù ya pùla man,’ te tok uya màlà.

³¹“Kin utà epanta'mase uya 10,000 pan kon kappon yamùk yalà ta'là, tùwinàkàik tùuyàssen uyàpù 20,000 pan kon pokonpe yau. Iweleuta màlà wapiya meluntà pe là tùwechi ittuse tùulon kin yenpatak tùutà toppe.

³²Meluntà pe pùla tùwechi yau, tùmaimu yekaman nan yeunoko ya màlà tùulon kin wakkàsse, mei lùppù iwechi tùse echitonpa pe we'nàtok yennase ipàk.

³³Màlà kasa làma ànù'là tamù'nawolon itesak pe tùwettok nonkasak ya pùla nai'nùk wechi unenupa pe pen màlà,” teppù Jesus uya.

³⁴“Pan màlà wakù. Tùse ine'nek pe pùla iwenasak yau, yà'là kasa là ine'nek pe tu'ma imatok pùla iwechi màlà.

³⁵Wakù pe là non pona iwechi pen màlà, wapùla non po'mayi pe là wakù pe iwechi pen, tenu'masen màlà. Yetatàk kon tùpana ke ewechi kon yau!” teppù Jesus uya.