Read Patamona Luke 18 Bible Online

Luke 18 - Patamona bible

Luke 18

¹Jesus uya tok pàk sàlà panton yekamappù màlà, tok yenupatoppe tùuya tàwàlà là tok wàpùlematoppe, molopai ailon tetok tùuya'nokon nonka tok uya tukaik.

²“Kottù yawon ittunài wechippù màlà pata yau Katù namanài pen molopai kappon yamùk ittuiche tùwessen pen.

³Molopai nossan itayappù iwelichak lùppù wechippù molo, màlà lùppù pata yau, tùuyàppàtù pàk tùwessen ipyak, ipawanattàse ‘Kùpùikattàkà tàwà uyeyaton non winàpai!’ tukaik.

⁴Tachin pe ittunài wechippù màlà ànkuppai pùla, molopai nen uchi tùpàk, ‘Katù namanài pe pùla lànen wechi tùse wapùla kappon yamùk nama uya pùla là tùse,

⁵Masa yene uya ipùikattàtoppe uya, masapùla uyaimelunpa ya pàk molopai tùuyàppàtù ke uyetaka ya tukaik,’ teppù ya.

⁶Molopai Itepulu uya, “Ailon pen ittunài uya wa teppù yetatàk kon.

⁷Katù uya ken na' tùnanùmùssan kalawù tùpàk weinai, molopai ewalupàttau, tùse italumattànàippù tùtalumattàse pùla iwechi?

⁸Tekamayaik àpàkù'nokon italumattànàippù talumattà ya màlà asse'ne. Walà tùse Kàyik Mumu uyàpù yau na', ailon tawonnan tùpàk kappon yamùk yepolo ya ailon tettok tùuya'nokon yau lùppù sàlà non po?” teppù ya.

⁹Jesus uya tu'ma sàlà panton yekamappù màlà kappon yamùk wakù pe tùuchittusan tùyiwalà'nokon, tùse tamù'nawolon kon iche pùla tùwessan pàk.

¹⁰“Asa'lon kon kàyik yamùk utàppù màlà Katù yùwùk tak àpùlemase. Tewinan wechippù màlà Pharisee pe, yakon wechippù pùlayatta pili'nài pe.

¹¹Pharisee we'wuluukappù molopai iwàpùlemappù, ‘Tenki ukayaik àpàk, Katù, tùulon yemamin iche tùwessen pe pùla wechi pàk, kasei pe pùla wechi pàk, wapùla àli pe tùwelaikasen pe pùla wapùla àli ku'nài pe pùla wechi pàk, tamù'nawolon kon kasa pùla wechi pàk. Tenki ukayaik àpàk mùkkàlà pùlayatta pili'nài kasa pùla wechi pàk.

¹²Asa'là wei Suntayakka yau tùuta'lettàik pùla tùwàpùlemasen Iulà, molopai tewin, 10 pan uye'matok yapai elepanài Iulà,’ tukaik.

¹³“Tùse pùlayatta pili'nài wechippù satippe mei. Molopai tenpata tùlù ya Epùn winàkàik pùla kulu iwechippù, tùse tùplopo wàpàtùppù ya neken, molopai, ‘Katù, upàk tàwà esentuppakà, Iulà sa'ne, umakuyi yawon!’ tei'ma.

¹⁴“Tekamayaik àpàkù'nokon, pùsàlà kàyik, pùlayatta pili'nài, wemeichak wechippù màlà ikasa Katù pokonpe iwekonekasak pe. Tùse tùulon wechippù màlà iwekonekappù pùla. Masapùla tamù'nawolon kon eke pe tùwekkussan ma màlà àssà'mùla, molopai tamù'nawolon kon àssà'mùla tùwessan ma màlà eke pe,” teppù Jesus uya.

¹⁵Tùulon kon kappon yamùk uya màlà tùmunkà kon nepùppù Jesus piyak temyatù tùtoppe ya tok pona. Tùse Jesus ya'lon kon uya tok yeneppù molopai kappon yamùk yàulàmappù tok uya màlà kupù tok uya pàk.

¹⁶Tùse Jesus uya mule yamùk kà'mappù tùpyak molopai, “Tàwà mule yamùk nùyàpùi upyak! Tok kùseleutanùttàu, masapùla Katù wettok itepulu pe màlà pùsamlo yekkwa ton ponalok.

¹⁷Ailon kulu sàlà, ànù'là Katù wettok Itepulu pe yanùnnài pen mule uya yanùmù kasa, wewomù yak pen màlà,” teppù Jesus uya.

¹⁸Jew yamùk yesak uya Jesus yekamappoppù, “Wakù Enupanài, yà'là kupù uya ken tàwàlà là wema'nàtok yepotoppe uya?” tukaik.

¹⁹“Yà'là peichi iwechi pàk uyesatù auya màlà wakù tukaik? Wakù pùla nen iwechi màlà tùse Katù neken,” tukaik Jesus uya yeikuppù.

²⁰“ Law ittunài àmàlà. ‘Anmali'mappù pen pokonpe kechii, kappon kù'wànài, amak pe kechii, kasei pe kechii, àkàipùnù molopai asan tawonnan inamakà,’ tawon,” teppù Jesus uya.

²¹Kàyik uya yeikuppù, “Mulek wechippù motapai tamù'nawàlà sàlà yamùk enupantok maimu yawàlà wessak man,” tukaik.

²²Sàlà yetasak tùuya yau, Jesus uya ipàk wateppù, “Tewinan nùppù là ànkupù molo man. Tamù'nawàlà itesak pe ewettok ichilanmakà molopai pùlayatta itùkà entuppa'nokon yemyak, molopai mamin yesappe ewechi màlà Epùn po. Molopai àikkà uya'là,” teppù ya.

²³Tùse sàlà yetasak tùuya yau, kàyik uwankono'mappù kulu màlà masapùla tukke kulu mamin yesappe iwechippù màlà.

²⁴Jesus uya ichewankono'masak yeneppù màlà molopai, “Sa'man pe kulu mamin yesak ton kappon yamùk wewomù Katù wettok Itepulu pe yak wechi màlà.

²⁵Sa'man peiwa mamin yesak kappon wewomù Katù wettok Itepulu pe yak wechi màlà paka walai camel wepakka akkussa yenu yeuta yai yentai,” teppù ya.

²⁶Kappon yamùk yetan nan nùssan uya yekamappoppù, “Ànùk ken uchi wepùikattà màlà?” tukaik.

²⁷Jesus uya tok yeikuppù, “Yà'làlà sa'man pe iwekkupù yentai kappon nùttuyai'nùk wechi màlà sa'man pe pùla Katù pona,” tukaik.

²⁸Màlàyau Peter uya, “Masa yenkà! Ina uya tùpata kon nànsa'man, aya'là tùwettok kon pe,” teppù.

²⁹“Ewaik, ailon kulu sàlà, ànù'là tùpata nànnài wapùla tùnoppù, wapùla tùtonpa yamùk, wapùla tùkàipùnù molopai tùsan tawonnan, wapùla tùmunkà yamùk nànnài, Katù wettok Itepulu pe pàkànsau uya

³⁰eke peiwa yepolo màlà sàlà pe, molopai tàwàlàlà nen uchi wema'nàtok yepolo ya màlà nùyàssai'nùk pata weyu yau,” teppù Jesus uya tok pàk.

³¹esus uya 12 pan kon ta'lon kon yamappù molopai tok pàk, “Yetatàk kon! Utànnokon sàlà Jerusalem pona tamù'nawolon Katù Maimu yenpoikannan nùmenkappù Kàyik Mumu pàk wekkutok ailon pe yak.

³²Jew yamùk pen yemyak itùlù màlà. Mùkyamlo wàkklà màlà italumattà pe. Imotùnpa tok uya màlà, molopai tok wetattapàtù màlà ipona.

³³Tok uya ippoppàtù màlà molopai iwànà màlà, tùse icholùwano wei yattai iwuluuka màlà,” teppù.

³⁴Ya'lon kon uya sàlà yamùk ittu pùla iwechippù màlà. Iichelupatok nekama yonansak wechippù màlà tok winàpai, molopai Jesus uselupatok ipàk ittuppù tok uya pùla iwechippù.

³⁵Jesus uyàpùppù màlà mei pùla Jericho winàkàik, molopai enpùn kàyik wechippù màlà chichiu pe asanta yena po enkui pe tùwechi pàk.

³⁶Tukkan kon kappon yamùk utà yeta tùuya yau, kàyik uya tok yekamappoppù, “Yà'là ken nai'nùk?” tukaik.

³⁷“Jesus, Nazareth pon, pata yentakayan,” teppù tok uya ipàk.

³⁸Iwentaimeppù eke pe, “Jesus! David mumu, upàk tàwà esentuppakà!” tukaik.

³⁹Kappon yamùk itemloto pon kon uya yàulàmappù, “Eppana ekkà,” teppù tok uya ipàk. Tùse iwentaimeppù eke peiwa nen uchi, “David Mumu! Upàk tàwà esentuppakà!” tukaik.

⁴⁰Màlàpàk Jesus weleutappù molopai, enpùn nettoppe tok uya tùppyak yekamappù ya. Mei pùla iyàssak yau, Jesus uya yekamappoppù,

⁴¹“Yà'là kupù uya iche messan àponalok pe?” tukaik. “Itepulu, pata enenpai tu'ma wessaik,” tukaik yeikuppù ya.

⁴²Jesus uya ipàk, “Yenkà! Ailon tetok auya uya eyipittàsak màlà,” teppù.

⁴³Màlà yattai asse'ne yeneppù ya màlà molopai Jesus ya'là iitàppù, tenki te pe Katù pàk. Yensak tùuya'nokon yau, tamù'nawàlà tukkan kon kappon yamùk uya Katù yapulàppù màlà.