Read Patamona Luke 2 Bible Online

Luke 2 - Patamona bible

Luke 2

¹Màlà yattai Ceasar Augustus uya tùmaimu yeunokoppù màlà tamù'nawolon kon uya tesek kon menuka toppe.

²Wapiyalok esek yamùk menukatok wekkupùppù màlà Quirinius itesek, wechi itepulu pe Syria po yattai.

³Tamù'nawolon kon utàppù màlà tesek kon menukase tùpatassek kon yak.

⁴Joseph utàppù màlà Nazareth, Galilee pon poi Judea pona, pata Bethlehem pona, Kin David pata lùppù yak. Joseph utàppù màlà masapùla David pa pe tùwechi pàk.

⁵Iitàppù màlà tesek menukase Mary pokonpe, imali'ma ya màlà teppù lùppù pokonpe, molopai monok pe iwechippù màlà.

⁶Molo Bethlehem po tok wechi tùse, Mary wentutok yattai pe iwechippù.

⁷Màlàyau wapiyalok walawok tùmle ke iwentuppù paka yamùk yùwùk tau, masapùla patassek pùla iwechi pàk. Molopai iwontappù ya pon pùkkùlùppù ke. Inonkappù ya paka yamùk yeipa yen yak.

⁸Molo kalinilu yamùk mainanpan nan tonpa yamùk wechippù màlà sàlà pata pùkkù yau, tùwe'nùnse pùla kalinilu yamùk yene pàk tùwessan ewalupàttau.

⁹Itepulu inchelùyi, usenpoikappù màlà tok piyak molopai Itepulu yakkwayi ulenpamùppù tok woi. Tok wettalipappù màlà.

¹⁰Tùse inchelù uya tok pàk, “Kettalipatàu! Masapùla wakù Itekale nessak uya sàlà àponalok kon pe. Eke pe utauchinpantok nepù woton tamù'nawolon kon kappon yamùk piyak.

¹¹Sàlà yewalupàyi tau David pata po Eyepulu kon wentusak man, Christ itesek, Itepulu mùkkàlà!

¹²Sàlà uya yekama màlà àpàkù'nokon. Mule yepolo auya'nokon màlà iwontàsak pon pùkkùlùppù ke molopai aitou pe paka yamùk yeipa yen yau,” teppù.

¹³Asse'ne tewinanpa tukkan kon inchelù yamùk usenpoikappù màlà pùsàlà inchelù piyak tùuselenpai'ma'nokon Katù yapulà pe.

¹⁴“Katù epùn pon, yapulà pai! Molopai kappon yamùk uyauchinpan nan non pon kon ponaloppe wàlàkka'nàtok nechii!” tukaik.

¹⁵Inchelù yamùk wennapoppù epùn pona patappù yau, kalinilu yamùk mainanpan nan uya, “Utànpai'nokon Bethlehem pona, sàlà iwekkussak lùppù Itepulu nekamapàssai'nùk yense,” teppù.

¹⁶Màlàyau tùusemittàpaik tok utàppù. Tok uya Mary molopai Joseph tawonnan yepoloppù. Mule nàlà yeneppù tok uya aitou pe paka yamùk yeipa yen yau.

¹⁷Yensak tùuya'nokon yau, kalinilu yamùk mainanpan nan uya, mule yekale inchelù nekamappù tùpàkù'nokon yekamappù tamù'nawolon kon pàk.

¹⁸Molopai mùkyamlo yetan nan nùssan usenumenkappù kulu màlà tok nekamappù pàk.

¹⁹Tùse Mary uya sàlà yamùk kupùppù tewan yau, molopai ichenumenkappù kulu ipàk eke pe.

²⁰Kalinilu yamùk mainanpan nan wennapoppù màlà Katù yapulà pe eke pe, tamù'nawolon tùnetappù kon molopai tùnenepù kon pàk. Inchelù uya yekamappù kasa kulu iwechippù màlà.

²¹8 pe wei tùpo, Jew yamùk usattàtok yattai iwechi yau, yesettàppù màlà Jesus tukaik, esek inchelù uya ilepappù lùppù monok pe Mary wena wapiya lùppù ke.

²²Joseph molopai Mary tawonnan wekolùkatok yattai uyàpùppù, Law Moses winàpaino yawàlà. Màlàpàk tok uya mule yalàppù màlà Jerusalem pona Itepulu Katù yemyak itùse.

²³Sàlàichi màlà iwe'menukasak lùppù, Itepulu winàpaino Law yau. “Tamù'nawàlà wapiyalok pe iwentusak lùppù walawok tùlù màlà Itepulu yemyak,” tawon. {EXO 32.2}

²⁴Tok utàppù nàlà màlà tùntùlù kon tùse, Itepulu winàpaino Law yawàlà, “Asa'là wakokkwa wapùla là asa'là weluchi walai non, ” tawonnan.

²⁵Màlà yattai molo kàyik wechippù tùwemassen Jerusalem po, Simeon itesek. Mùkkàlà wechippù màlà wakù pe molopai Katù namanài pe, molopai Israel wepùikattà màmuku pàk iwechippù. Wakù Akkwalù wechippù màlà ipyau.

²⁶Màlàyau ipàk, “Ewelikù pen màlà yeunoko tùuya tetok Itepulu uya, Christ, yene auya ponalà,” teppù ya.

²⁷Wakù Akkwalù uya Simeon yalàppù Katù Yùwùk tak. Mule Jesus nessak ichan yamùk uya Katù Yùwùk tak, Law wettok ikupù iche kusse yau. Simeon uya mule yekkwatùppù tenak, molopai tenki teppù ya Katù pàk.

²⁸

²⁹“Uyepulu, ‘Ikupù uya,’ teppù lùppù auya, kussak auya man, molopai tàwàichi ayapyoto nùtài wàlàkka'nàtok yau.

³⁰Masapùla uyenu ke wepùikattàntok ewinàpaino tenpàssaik, pùsàlà ànkonekappù tamù'nawolon kon yemloto po.

³¹

³²Eye'ma yekamatok auya Jew yamùk pen pàk weyu. Molopai àponalok kon Israel yamùk pona apulàntok ne'nài,” teppù ya.

³³Mule kàipùnù molopai ichan tawonnan usenumenkappù kulu màlà Simeon uselupappù ipàk lùppù pàk.

³⁴Simeon uya tok pùlemappù, molopai ichan, Mary pàk. “Pùsàlà mule yanùnsak Katù uya màlà, tukkan kon Israel pon kon wettalumattà toppe, tùulon kon wepùikattà toppe, molopai yentok ipàkàlà pe iwinàkàik usàulàman toppe.

³⁵Molopai màlà pàkàlà tok usenumenkatok tewan kon yau, yenpoika ya màlà. Molopai usewankono'mantok yàkek kasupala walai uya eyewan yassokka màlà,” teppù ya.

³⁶Molo nossan, Katù Maimu yenpoikanài wechippù màlà Anna itesek, Phanuel yenchi, Asher kok. Kokko pe kulu iwechippù màlà, tùtayappù ke iwechippù màlà 7 pe neken kilichimochi.

³⁷Tùtayappù welikù tùpo iiko'mamùppù tachin pe, 84 pe ikilichimochiyi wechippù. Katù yùwùk nàmàppù ya pen, wei kaichalà, ewalupàttawà, tùwàpùlema pàk iwechippù tùuta'lettàik pùla.

³⁸Màlà yattai làmà iwelepamùppù màlà, tenki teppù ya Katù pàk, molopai iichelupappù mule pàk Jerusalem wemokkatok màmuku pàk tùwessan yelupappù ya.

³⁹Tamù'nawolon Itepulu winàpaino Law wettok ikupù iche yenuka'nùssak tùuya'nokon yau, tok wennapoppù Galilee pon, tùpata kon Nazareth pona.

⁴⁰Mule usemokkappù, meluntà pe iwenappù. Pukkek pe tùwettok ke iwanùssak wechippù, molopai Katù uya ipùlemappù eke pe.

⁴¹Kilichimochi kaichalà Jesus yan yamùk utàpàtùppù màlà Jerusalem pona Entaka'nàppà yattai Uta'lettàntok yense.

⁴²12 pe ikilimochiyi Jesus wechi yattai tok utàppù uta'lettàntok yense tùwessek kon kasa.

⁴³Uta'lettàntok weyu wenukassak yau tok wemeiku tùse Jesus wà'nàmàppù Jerusalem po. Ichan yamùk uya iwà'nàmàppù ittuppù pen màlà.

⁴⁴Tukkan kon kappon yamùk kùlottau iwechi pe tok uya yekamappù. Màlàpàk tok utàppù tewin wei ipla, màlà tùpo nen uchi tok iwappù, tùtonpa kon yamùk molopai tùwechi yakon non kùlottau.

⁴⁵Tok uya yepolo pùla iwechippù. Màlàpàk tok wennapoppù màlà iwase Jerusalem pona.

⁴⁶Icholùwano wei yattai tok uya Jesus yepoloppù Katù Yùwùk tau, chichiu pe enupannan pokonpe, tok yeta pàk molopai tok yekamappopàtù pàk.

⁴⁷Tamù'nawolon kon yetan nan usenumenkappù kulu màlà ittu ya molopai ikasa mayin yeippàtù ya pàk.

⁴⁸Ichan yamùk usenumenkappù màlà yensak tùuya'nokon yau. Màlàyau ichan uya, “Umle, yà'là peichi iwechi pàk sàlà mùkupùi ina winàkaik? Àkàipùnù molopai Iulà sa'ne tawonnan nen mà nùtaimelunpatai eyiwa pàk tà,” teppù ipàk.

⁴⁹Tok maimu yeikuppù ya, “Yà'là pe ken iwechi pàk kùyiwayatàu? Ukàipùnù yùwùk tau ken na' wettok ittu auya'nokon pùla nai?” tukaik.

⁵⁰Tùse tok uya watesak ya lùppù tùpàkù'nokon ittu pùla iwechippù.

⁵¹Màlàyau Jesus wennapoppù tok ya'là Nazareth pona. Màlà motau tok maimu yawàlà iwechippù. Ichan uya tamù'nawàlà sàlà yamùk kupùppù tewan yau.

⁵²Màlàyau Jesus usemokappù pukkek pe, Katù yewan yailà iwechippù. molopai kappon yamùk yewan yailà nàlà.