Read Patamona Luke 21 Bible Online

Luke 21 - Patamona bible

Luke 21

¹Yene tùuya yau Jesus uya mamin yesak ton uya tùwe'lepatok kon tùlù pùlayatta yen yak yeneppù.

²Molopai nàlà, itayappù iwelichak lùppù, yà'làlà pùn sa'ne uya asa'lon nùkkwà kalukuli pun nonka yeneppù ya.

³“Ailon kulu sàlà, pùsàlà sa'ne itayappù iwelichak lùppù eke peiwa nùtùpàssan tùulon kon yentai.

⁴Masapùla tùulon kon tùwe'lepatok kon tùlùi tukkan temamin kon kùlottapai tùse mùkkàlà sa'ne ipla echii'ma tùwemattok ipàk tùlùi tamù'nawàlà,” teppù ya.

⁵Tùulon kon uselupappù màlà Katù yùwùk konekasak wakù ton tàk yamùk ke molopai lepantok itùsak lùssan Katù yemyak ke pàk.Tùse Jesus uya,

⁶“Sàlà yamùk menyatàik, pata weyu uyàpù màlà tewinnà tàk wà'nàntok tùulon po yattai pen, tamù'nawàlà iwettùlùkkwa màlà,” teppù.

⁷“Enupanài, yà'là yattai ken sàlà yamùk wechi? Molopai yà'là wechi ken màlà yentok ipàkàlà pe, iwekkuttok yattai uyàssak yekamanài pe?” tukaik tok uya yekamappoppù.

⁸Jesus uya wateppù, “Enpen ettàk kon eyennaka kon kùsettak! Masapùla tukkan kon uyàpù màlà uyesek yau, ‘Iulàichi mùkkàlà Christ!’ molopai, ‘Pata weyu uyàssak uchi man!’ tei'ma. Tùse tok ya'là kùtàtàu.

⁹Kettalipatàu wepanta'mantok molopai mùkyamlo tùpatà kon yesak yenu'maiche man te yeta auya'nokon yau, sàlà yamùk wekkupù màlà wapiya, tùse màlà uya iwenukattok wechi mei pùla yekama pen màlà.

¹⁰Pata uya tùulon pata panta'ma màlà, kin yesappe nai'nùk pata uya tùulon kin yesak làma pata yeya'noma màlà.

¹¹Àsà tùlùpùnù wechi màlà molo, iwan pe we'nà màlà, àsà ton palan wechi màlà i'nailàlà, nalik ton wechi màlà molo, molopai eke ton tensan yekkwa ton pen wechi màlà kak yau,” teppù ya.

¹²“Sàlà yamùk wekkupù wapiya ayachi kon màlà molopai atalumattà kon. Àtùlù kon màlà eyittu tok kon pe Jew yamùk wepili'nàtok itak tak, molopai patikichi tak, Kin yamùk molopai kopùna yamùk yemlotopona enepù kon màlà upàkànsau.

¹³Sàlà wechi màlà Wakù Itekale yekamatok auya'nokon yattai pe.

¹⁴Esenumenkatàk kon màlà wapiya ewenai ewechi kon pàk autaimelunpa kon tukaik.

¹⁵Masapùla elepa kon uya màlà amaimu kon ke molopai pukkek ke, eyeyaton kon yamùk uya euselupatok kon nulunpa wapùla ailon pen màlà te tukaik.

¹⁶Àkàipùnù kon nà molopai asan kon uya là àtùlù kon màlà, àlunan kon uya là, àtonpa kon yamùk uya là, ewechi yakon non uya là àtùlù kon màlà, molopai iwelittok yak àtonpa kon yamùk tùlù tok uya màlà.

¹⁷Tamù'nawolon kon uya eyeya'noma kon màlà uwenai.

¹⁸Tùse tewin nà appai kon pùpok wessenu'ma appai kon poi pen màlà.

¹⁹Meluntà pe ettàk kon, masapùla sàlà kasa ewepùikattà kon màlà, ” teppù Jesus uya.

²⁰“Tùwepanta'masan uya Jerusalem woinottàsak yene auya yau, imattatok winàkàik iwechi ittu auya'nokon màlà.

²¹Màlàyau Judea pon kon nepeik wùk yamùk pona. Tàwà eke pata yau tùwessan nùnàmài molopai elekkwà pata yau tùwessan kùttàtak eke pata yak.

²²Masapùla sàlàichi màlà talumattàntok wekkuttok yattai tamù'nawàlà Katù Maimu yau iwe'menukasak lùppù.

²³Àsà pe kulu iwechi màlà, màlà yamùk wei wechi nossan yamùk monok ton pona. Molopai mule yan yamùk ichikili ton imunkà pona! Àsà pe kulu wettalumattàntok uyàpù màlà sàlà pata pona, molopai Katù we'naikatok wechi màlà pùsamlo kappon yamùk winàkàik.

²⁴Kasupala ke tok wànà màlà, molopai yachisak kon pe tamù'nawolon pata yamùk yak tok yalà, Jew yamùk pen uya Jerusalem wasappàtù màlà tùweyu kon wenukapù ponalà,” teppù ya.

²⁵“Yentok ipàkàlà wechi màlà wei yau, kapùi molopai chilùkà yamùk yau. Non po, tamù'nawolon pata yamùk wechi màlà usewankono'mantok yau, palau tàwù molopai meluntà chipachipa tawon uya tok yenalippa màlà.

²⁶Kappon yamùk wenpulumanpàtù màlà tùusenalippa kon ke. Tamù'nawolon non pona nùyàssai'nan nùk màmuku tùuya'nokon yau. Masapùla epùn yapàikketù utattù'ma màlà.

²⁷Màlà yattai nen uchi Kàyik Mumu usenpoika màlà. Iyàpù màlà katuppluk yau meluntà pe molopai tapulàtok yau.

²⁸Sàlà yamùk weppyattà tùwekkupù kon pàk yau, mà'mùssakkatàik molopai appai kon manùntàik kakàik, masapùla ewepùikattàtok kon mei pùla man,” teppù Jesus uya.

²⁹Màlàyau Jesus uya sàlà panton yekamappù màlà tok pàk. “Fig yek yentàk kon, molopai tùulon kon yei yamùk.

³⁰Yale yamùk usenpoika yau, wei wenna winàkàik iwechi pe ittun nan amyamlo.

³¹Màlà kasa làmaichi sàlà yamùk wekkupù yene auya'nokon yau, Katù wettok itepulu pe weyu iwechi mei pùla ittu auya'nokon màlà.

³²“Ailon kulu sàlà, tamù'nawàlà sàlà yamùk wekkupù màlà kappon yamùk nemassai'nannùk welikù tamù'nawàlà wapiya.

³³Epùn molopai non tawonnan utà màlà tùse umaimu utà pen màlà,” teppù Jesus uya.

³⁴“Enpen uchi ettàk kon! Eke pe uta'lettàntok molopai wetùnnàtok pàk kettàu, molopai salà motau wema'nàtok pàk utaimelunpantok ke kanùttàu, yattai pùla màlà wei uyàpù màlà àpona'nokon asse'ne ittu auya'nokon pùla male kasa.

³⁵Iyàpù màlà tamù'nawolon kon kappon yamùk sàlà non pon kon pona.

³⁶Enpen ettàk kon molopai àpùlematàk kon tàwàlà, meluntà pe ewechi kon pa sàlà yamùk wekkupù yawàlà àutà kon yau, molopai Kàyik Mumu yemloto po àwà'mùssakka kon pa,” teppù Jesus uya.

³⁷Jesus uko'manpàtùppù màlà Katù yùwùk tau kappon yamùk yenupa pàk, molopai ko'man pe iwenasak yau iitàpàtùppù Olives Tùpù pona, molo esse ewalupàttau.

³⁸Tamù'nawàlà kappon yamùk utàpàtùppù Katù yùwùk tak ko'làma'ne ichelupa yetase.