Read Patamona Luke 8 Bible Online

Luke 8 - Patamona bible

Luke 8

¹Mala là tachin pe tùpo Jesus utàppù màlà pata yamùk eke ton molopai echikili ton nà pata yawàlà, Wakù Itekale Katù wettok itepulu pe yekale yekama pe. 12 pan kon ya'lon kon utàppù màlà ya'là.

²Tùulon kon nossan yamùk iichipittàsak kon nùssan àli akkwalù yamùk winàpai molopai palan winàpai, utàppù nàlà màlà ya'là. Mary, Magdalene itesek, utàppù màlà ya'là. 7 pan kon àli akkwalù yamùk yenpakkappù yapai lùppù mùkkàlà.

³Joanna, Chuza noppù, Herod patassek yau tùwe'wotokomasen, Susanna molopai tukke tùulon kon utàppù nàlà. Pùsamlo nossan yamùk, Jesus molopai ya'lon kon yamùk pùikattàn nan nùssan tok yapluli pàk utàppù màlà ya'là.

⁴Kappon yamùk wechippù màlà tùuyàpù kon pàk pata yamùk yapai. Molopai tukke kappon yamùk wepilichak yau, Jesus uya sàlà panton yekamappù.

⁵“Tùwàppànsen kàyik utàppù tùnpàmà pànse. Tùnpàmà soloka ya umà yau tùse, tùulon kon wessolokappù asantawà, usanàtok yawàlà, molopai tolon yamùk uya inapùppù.

⁶Tùulon kon wessolokappù tàk pon non pona, molopai iwenuttasak yau, iwaipùtappù màlà, masapùla non wechi aikku pe pùla pàk.

⁷Tùulon kon wessolokappù àmà’nàttak, iwattappù màlà tùse àlitta uya yeulankappù.

⁸Molopai tùulon kon wessolokappù wakù non yak. Iwattappù molopai iwepetappù 100 pe'ne.” Molopai Jesus uya, “Yetatàk kon uchi, tùpana ke ewechi kon yau!” teppù.

⁹Jesus ya'lon kon uya yà'là te là panton uya pe iwechi yekamappoppù ipàk.

¹⁰Jesus uya yeikuppù, “Katù wettok itepulu pe yau tùttusen pen ittutok auya ke elepasa'man. Tùse tùulon kon uya ittutok uyàpù màlà panton yai, tok uya tenu kon tùtoppe yenei'ma pùla, tok uya yeta toppe ittui'ma pùla,” tukaik. {ISA 6:9}

¹¹“Sàlàichi màlà panton nekama. Tùpànsen màlà Katù Maimu.

¹²Tùpànsen iwessolokasak lùppù asantawà uya yekama màlà, mùkyamlo Katù Maimu yetan nan. Tùse Tepùlù mùkkàlà tùuyàssen molopai itekale mokkanài tok yewan yapai, ailon te tok uya molopai tok wepùikattà tukaik.

¹³Tùpànsen iwepukasak lùppù tàk pon non pona uya yekama nai'nùk, mùkyamlo itekale yetan nan molopai yanùnnài nan tùutauchinpaik tùse ikala pùla tùwessan. Ailon tawonnan tachin pe pùla, molopai tùwelattàsan ailon winàpai ittuntok uyàssak yau.

¹⁴Tùpànsen iwepukasak lùppù àmà’nàttak uya yekama nai'nùk, mùkyamlo Katù Maimu yetan nan. Tùse te'ma kon tawàlà tok utà yau wema'nàtok pàk utaimelunpantok, temamin ke we'nàtok, molopai sàlà motawon pàk utauchinpantok màlà yeulankanài. Tok wepeta pen.

¹⁵Tùpànsen iwepukasak lùppù wakù non yak màlà uya yekama nai'nùk, mùkyamlo itekale yetan nan, iku'nài nan wakù pe, yawolon kon nà tewan kon yau, ailon pe tùwessan tùwepeta kon ponalà,” teppù Jesus uya.

¹⁶“Ànù'là uya lanppu pottàsak tùuya waputtàsak pùsau ke pùla man wapùla we'nùnnà yapon yokkoik là inonkasak pùla. Tùse inonka ya satippe yapon pona làkku, kappon yamùk uya iweyu yentoppe tùwewomù kon yau.

¹⁷Yà'là là yonansak lùppù miya nepù màlà ayupona, molopai yà'làlà iwaputtàsak lùppù yepolo màlà molopai inepù akkwa yak.

¹⁸“Tùttuseichi ettàk kon, yeta auya'nokon yau. Masapùla ànù'là yà'làlà yesak lepa màlà eke peiwa, tùse ànù'là ipla nai'nùk winàpai malalonnà itesak pe tùwechi pe inekama mokka màlà,” teppù Jesus uya.

¹⁹Jesus yan molopai yakon non uyàpùppù màlà ipyak, tùse ipyak tok utà yentai iwechippù màlà, masapùla ilinà pe kappon yamùk wechi pàk.

²⁰Jesus pàk kappon yamùk tonpa uya, “Asan molopai ayakon non satippe man polopo molopai eyenpai tok man,” teppù.

²¹Jesus uya yeikuppù, “Usan mùkkàlà molopai uyakon non nà mùkyamlo Katù Maimu yetan nan molopai yawàlà tùwessan,” tukaik.

²²Tewin wei yattai Jesus wenukuppù kanau yak ta'lon kon pokonpe molopai tok pàk, “Tuna latoi pona ukklà'nàpai' nokon man,” teppù ya. Màlàpàk tok wessalattàppù tùutà kon pàk.

²³Tok utà kanau yau tùse, Jesus we'nùmùppù. Meluntà pe assetun utasse’nùmùppù tuna po, molopai kanau wanùpù piyattàppù tuna ke. Àsà yau tok wechippù màlà.

²⁴Jesus ya'lon kon uyàpùppù màlà ipyak molopai tok uya yenpakappù, “Itepulu, Itepulu! Unanà'nokon pe man!” teppù tok uya. Jesus we'wuluukappù molopai assetun molopai chipachipa tawon weleuta toppe yelupappù ya. Iwàttù'nàppù màlà, tamù'nawolon wàttù'nàsak wechippù.

²⁵Màlàyau Jesus uya ta'lon kon pàk, “I'nai yailà ailon tetok auya'nokon nai?” teppù. Tùse tok usenumenkasak, molopai tok wettalipasak wechippù, molopai tok uya tùtonpa kon pàk “Ànùk ken uchi pùsàlà kàyik? Assetun molopai chipachipa yelupanài, molopai màlà yamùk là wettok imaimu yawàlà,” teppù.

²⁶Tok utàppù màlà kanau yau Gergesenes yawolon pata yak, Galilee poi tùwuklàsse tuna latoi pona.

²⁷Jesus uttà kanau yapai tuna yena pona yau kàyik àli akkwalù yamùk yen uya yepoloppù màlà, màlà pata yau. Ipon pùla iwechippù màlà tachin pe, molopai tùpata po iwechi pùla iwechippù, tùse uluwaik yamùk kùlottau iwemapùppù.

²⁸Jesus yensak tùuya yau iwentaimeppù eke pe, iwekkawai'mappù Jesus yemloto po molopai “Jesus, eke kulu tùnamasen Katù Mumu! Yà'là pe wechi iche messan? Apawanattàyan iulà, kùtalumattài tàwà!” teppù ya.

²⁹Sàlà kasa teppù ya màlà masapùla Jesus uya àli akkwalù wepakka toppe tapai yapyontàsak pàk. Tukke itekkwa màlà yepopàtùppù ya, yachisak pe lànen tùse, itemyatù molopai itta tawon yaulonpàssak chin ke tùse yattàpàtùppù ya, molopai àli akkwalù uya teka'nonkaik yalàppù tùkkenan pata yak.

³⁰Jesus uya yekamappoppù, “Ànùk ken eyesek?” tukaik. “Uyesek màlà Legion,” tukaik, yeikuppù ya, masapùla tukke àli akkwalù yamùk wewonsak wechippù yak.

³¹Jesus pawanattàppù àli akkwalù yamùk uya, i'nawon aiko yak teunoko kon ya tukaik.

³²Tukkan kon puluku yamùk wechippù màlà mei pùla, tùuta'lettà kon pàk wù'lappolo. Àli akkwalù yamùk uya Jesus pawanattàppù tùutà tok kon pe puluku yamùk yak. Màlàyau tok utàtoppe ikupùppù ya.

³³Màlàyau nen uchi àli akkwalù yamùk wepakkappù kàyik yapai molopai tok utàppù puluku yamùk yak. Tamù'nawàlà puluku yamùk utàppù wùk wolo polo tuna kak molopai tok unalàppù.

³⁴Kappon yamùk puluku yamùk mainanpannan uya màlà wekkupù yeneppù. Màlàyau tok utàppù aitun pe molopai tok uya yekamappù pata yawàlà molopai umà yawàlà.

³⁵Kappon yamùk utàppù màlà iwekkussak lùppù yense. Jesus piyak tok uyàpùppù molopai kàyik, àli akkwalù yamùk wepakkappù yapai lùppù yepoloppù tok uya chichiu pe Jesus pùta piyau. Iwepontàsak molopai wakù pe ichenumenkatok, molopai tamù'nawàlà tok wettalipappù màlà.

³⁶Mùkyamlo yennài nan nùssan uya kappon yamùk pàk yà’là kasa là mùkkàlà kàyik uchipittàsak yekamappù.

³⁷Màlàyau tamù'nawolon kon ilinà kappon yamùk Gergesenes yawolon kon uya Jesus yekamappoppù iità toppe, masapùla tamù'nawàlà tok wettalipasak kulu wechippù màlà. Màlàpàk Jesus wenukuppù màlà kanau yak molopai pata nàmàppù ya.

³⁸Kàyik àli akkwalù yamùk wepakkappù yapai lùppù uya Jesus pawanattàppù màlà, “Aya'là ka' utà lù?” tukaik. Tùse Jesus uya yeunokoppù,

³⁹“Ennappokà, emeikkà molopai Katù nùkupùppù àponalok pe yekamata,” teppù ya ipàk. Kàyik utàppù tamù'nawàlà pata polo Jesus nùkupùppù tùponalok yekama pe.

⁴⁰Jesus wennaposak tuna latoi pona yau, tukkan kon uya yanùmùppù tùutauchinpaik, masapùla tamù'nawàlà tok wechippù màlà imàmuku pàk.

⁴¹Màlàyau kàyik Jairus itesek, Jew yamùk wepilittok itak yepulu welepamùppù màlà. Iwettolùpattàppù Jesus pùta piyau molopai ipawanattàppù ya tùpata pona yak iità toppe.

⁴²Masapùla tewinan tenchi 12 pan neken ikilichimochiyi welikù pàk. Jesus utà tùse tukkan kon kappon yamùk wepilipùppù iwoi sà winàpai'ne.

⁴³Nossan wechippù màlà molo 12 pe kaichalà kilichimochi tùwettalumattà pàk iwessak, àsà pe mùn pàk. Tamù'nawàlà tùpùlayattayi yu'makappù ya màlà ipittànnan ye'ma toppe tùuya, tùse ànù'là uya ipittà pùla iwechippù.

⁴⁴Iyàpùppù màlà tukkan kon kappon yamùk kùlottau Jesus mùpoi winà molopai ipon yepi yappàtùppù ya, molopai inmùta weleutappù tewinanpa.

⁴⁵Jesus uya tok yekamappoppù, “Ànùk uyappàtùi?” tukaik. Tamù'nawolon kon uya iulà pen, teppù. Molopai Peter uya, “Itepulu, kappon yamùk àwoi man molopai tok nùselemlussan àpona,” teppù.

⁴⁶Tùse Jesus uya, “Kappon uyappàtùi, tùttui masapùla meluntà wepakka uyapai pàkànsau,” teppù.

⁴⁷Nossan uya tùttusak pe ittuppù. Màlàpàk iyàpùppù, tùplànài'nùmùi’ma, molopai iwettolùpattàppù Jesus pùta piyau. Molo tamù'nawolon kon yemloto po yà'là pe là iwechi pàk yappàtùppù tùuya, molopai tewinanpa tùuchipittàsak màlà yattai là yekamappù ya.

⁴⁸Jesus uya wateppù ipàk, “Uyenchi, ailon tetok auya uya pàli’yau amasak man. Itàkà wàlàkka'nàtok yau,” teppù.

⁴⁹Jesus uya wa te tùse, itekale ne'nài uyàpùppù Jew yamùk wepilittok itak yennài yùwùk tapai. “Eyenchi nelippàssan. Enupanài nen uchi kùsaimelunpai,” teppù ya Jairus pàk.

⁵⁰Tùse Jesus uya yetappù molopai Jairus pàk, “Kettalipai. Ailon kakkà neken molopai pàli’yau iwechi màlà,” teppù.

⁵¹Tùwelepansak yau ànù'là wewomù ta'là tukaik inulunpappù ya tùse Peter, James, John, molopai mule kàipùnù, molopai ichan tawonnan neken.

⁵²Tamù'nawolon kon molon kon nà kalawùppù màlà molopai tok usewankono'mappù mule wenai. Jesus uya, “Kakalantàu, mule welichak pen màlà, iwe'nùmù neken màlà!” teppù.

⁵³Tamù'nawàlà tok wàkklàppù ipàk, masapùla iwelichak ittu tùuya'nokon pàk.

⁵⁴Tùse Jesus uya yachippù itemyatù pàk, “E'wuluukakà mule!” tei'ma.

⁵⁵Yakkwalù wennapoppù molopai iwe'wuluukappù asse'ne kulu. Molopai Jesus uya, “Iteipa ke ilepatàk kon,” teppù.

⁵⁶Ikàipùnù molopai ichan tawonnan usenumenkasak kulu wechippù màlà. Tùse Jesus uya, “Ànù'là pàk sàlà iwekkussak lùppù kùsekamatàu,” teppù.