Read Patamona John 11 Bible Online

John 11 - Patamona bible

John 11

¹Molo kàyik wechippù màlà Lazarus itesek, e'nek pe iwechippù Bethany po. Mary molopai yakon Martha tawonnan patassek màlà.

²Pùsàlà mùkkàlà Mary Jesus pùta kalapaimanàippù kalapa ke molopai itta ya'munakanàippù tùnsek ke. Mùkkàlà lui, Lazarus wechippù e'nek pe.

³Màlàpàk iwàlichi ton uya Jesus piyak tùmaimu kon yeunokoppù, “Uyepulu, mùkkàlà à'nùn pe ànkupù e'nek pe man,” tukaik.

⁴Yetasak tùuya yau, Jesus uya, “Lazarus e'nek pe man, tùse iwelittok pe iwenukapù pen màlà. Sàlà wechi màlà Katù yapulàtok iwinà pe, molopai Katù Mumu yapulàtok yai pe,” teppù.

⁵Jesus pùnùn pe Martha, molopai Mary, molopai Lazarus tawonnan wechippù màlà.

⁶Walà tùse e'nek pe Lazarus wechi yekale yeta tùpo, molo iiko'mamùppù asa'là wei tu'ma màlà lùppù pata po.

⁷Màlà tùpo Jesus uya tùnenupa ton pàk, “Utànpai'nokon tu'ma Judea pona,” teppù.

⁸Inenupa ton uya ipàk, “Ticha, ko'manyakù'ne, kuichi, Jew yamùk ku tàk ke àwànàiche nettai, tùse ken na' uchi màlà motak àutà tukka màlà?” teppù.

⁹Jesus uya tok maimu yeikuppù, “Ko'làma motapai ku ko'man pe tepose akkwa pe tùwessen, ewaik na'? Ànù'là kappon usalà weinai yau iwekkawai'ma pen màlà, masapùla akkwa yau yene tùuya pàk.

¹⁰Tùse ewalupàttau iichalà yau iwekkawai'mapàtù, masapùla iweyu pùla iwechi pàk,” tukaik.

¹¹Wate tùpo Jesus uya tok pàk, “Kùwechiyakon Lazarus we'nùnsak man, tùse utà sàlà miyalà yenpakaik,” teppù.

¹²Inenupa ton uya tu'ma, “Ina yepulu, iwetun pe iwechi yau, ichipittà là màlà,” teppù.

¹³Jesus uselupapù màlà Lazarus welichak pàk, tùse iwe'nùnsak pàk neken wateya pe inenupa ton uya yekamappù.

¹⁴Màlàyau nen uchi Jesus uya tok pàk yekamakappù wakù pe, “Lazarus welichak man,” tukaik.

¹⁵“Utauchinpayaik àpàkànsau'nokon molo wessak pùla iwechi pàk, ailon te kon pa. Tùse ipyak utànpai'nokon,” teppù Jesus uya.

¹⁶Màlàyau Thomas munuik tukaik tesassen uya tùulon kon inenupa ton pàk, “Utànpai'nokon ipokonpe weli'nàtok kon pe,” teppù.

¹⁷Tùwelepankasak yau Lazarus wu'nattàkassak asakùlà'ne wei iiko'mansak yepoloppù Jesus uya.

¹⁸Bethany wechippù màlà mei kulu pùla là 2 miles Jerusalem poi.

¹⁹Molopai tukkan kon Jew yamùk uyàssak wechippù Martha, Mary tawonnan piyak, tok yewan ipittàik tok lui welichak pàk.

²⁰Màlàyau Jesus uyàpù yekale yetasak tùuya yau, Martha utàppù iwakkàsse, tùse Mary wà'nàmàppù pata po.

²¹Màlàyau Martha uya Jesus pàk, “Uyepulu, talà ewessak yau upi welitok pan pen!

²²Tùse tùttuyaik sàlà pe là yà'làlà yekamappo auya tùpàk yau, Katù uya elepa,” teppù.

²³Jesus uya Martha pàk, “Àlui we'wuluuka tu'ma màlà,” teppù.

²⁴Martha uya Jesus pàk, “Tùttuyaik iwe'wuluuka tu'ma tewinanùppù wei, we'wuluukantok weyu yattai,” teppù.

²⁵Jesus uya ipàk, “Iulà mùkkàlà we'wuluukantok molopai wema'nàtok. Ànù'là ailon nùkayai'nùk upàk wemapù màlà tùwelichak là nen tùse.

²⁶molopai ànù'là nemassai'nùk molopai ailon nùkayai'nùk upàk welikù pen màlà. Ailon mùkayan na' sàlà pàk?” teppù.

²⁷Martha uya Jesus pàk, “Ewaik, Uyepulu, ailon ukayaik àpàk! Àmàlà Mùkkàlà Christ, Katù Mumu, wolù yak tùuyàpù woton teppù ipàk lùppù,” teppù.

²⁸Molopai wate tùpo, Martha wennappoppù molopai takon Mary kà'mappù ya miya molopai yetaleupappù ya, “Ticha uyàssak man, eyekamappopàssan,” tukaik.

²⁹Yetasak tùuya yau Mary we'wuluukappù asse'ne molopai iitàppù ipyak.

³⁰Masa Jesus welepankassak pata yak pùla lùppù. Martha uya tepoloppù motau iwechippù.

³¹Jew yamùk Mary piyau tapùi tau itewan ipik pe tùwessan uya asse'ne iwe'wuluuka molopai iwepakka yensak yau, tok utàppù ya'là. Uluwaik pona akalanse iità pe yekamappù tok uya.

³²Mary welepamùppù Jesus piyak. Yensak tùuya yau tese'mu yok iwenappù iita piyau. “Uyepulu, talà ewessak yau, ului welittok pan pen,” teppù ya.

³³Jesus uya Mary kalawù molopai Jew yamùk nàlà ya'là iyàssak kon kalawù yeneppù, iipokoitappù ipla takkwalù yau molopai iitaimelupappù.

³⁴“I'nai yailà ken uchi mùwu'nattàtantàu?” teppù ya. “Itepulu, àikkà yense,” teppù tok uya.

³⁵Jesus kalawùppù.

³⁶Màlàyau “Masa yenkà, tù'nùn pe kulu ikupù ya!” teppù Jew yamùk uya.

³⁷Tùse tùulon kon uya, “Pùsàlà uya ku enpùn kàyik yenu yakkokappù, màlà kasa ken na' iwelikù tukaik Lazarus kupùppù ya pen sàlà epaino?” teppù.

³⁸Jesus usewankono'ma tukkappù ipla tewan yau molopai uluwaik motak iitàppù. Uluwaik wechippù tàk yeuta yau, molopai tàk wechippù imlatta po.

³⁹“Tàk yamatàk imlatta poi,” teppù ya. Tùse Martha, iwelichak wàlichi lùppù uya Jesus pàk, “Itepulu, ikà pe nen iwenkassak sàlà, masapùla asakùlà'ne wei iwelichak uko'mansak màlà!” teppù.

⁴⁰Jesus uya Martha pàk, “Àpàk uchi yekama uya pùn, ailon te auya yau Katù yapulàtok yene auya màlà te uya pùn na?” teppù.

⁴¹Màlàyau tok uya tàk yamappù uluwaik poi. Jesus uya tenu tùlùppù kakàik, molopai iwàpùlemappù “Ukàipùnù, tenki ukayaik àpàk, umaimu yetappù auya pàk,” teppù.

⁴²“Tùttutai tàwàlàlà umaimu yetanài àmàlà, tùse wa te uya sàlà pùsamo upyau satippe nai'nannùk uya ailon te toppe uyeunossak auya pàk,” teppù Jesus uya.

⁴³Molopai wa tekapù tùpo iwentaimeppù eke pe, “Lazarus, epakkakà!” tukaik.

⁴⁴Màlàyau iwelichak lùppù kàyik wepakkapù uluwaik yapai. Itemyatù yamùk molopai itta yamùk wontàsak wechippù linen ke. Molopai itenpata wontàsak kuyalikku ke, Jesus uya tok pàk, “Iponkatàk kon uluwaik yau we'nà pon yapai, molopai tàwà nùtài,” teppù.

⁴⁵Màlàyau tukkan kon Jew yamùk Mary piyak iyàssak kon uya Jesus uya tùwotokoyi kupù yeneppù molopai ailon teppù tok uya ipàk.

⁴⁶Tùse tùulon kon utàppù Pharisee yamùk piyak, Jesus uya tùwotokoyi kussak yekamaik tok pàk.

⁴⁷Màlàyau paatele yamùk yennài nan molopai Pharisee yamùk uya Jew yamùk Yepulu ton pilipùppù, molopai tok pàk tok uya “Yà'là kupù'nokon sàlà? Pùsàlà kàyik tukke ittutok ipàkàlà woton kon kussan.

⁴⁸Sàlà yamùk kupù ya tùse we'nà'nokon yau, tamù'nawolon kon uya màlà ailon te ipàk, molopai nen uchi Roman yamùk uyàpù màlà Katù yùwùk kùponalok kon molopai kùpata kon mokaik!” teppù.

⁴⁹Tewinannà tok kùlottawon Eke kulu paatele yamùk yennài màlà yattai Caiaphas itesek uya tok pàk, “Yà'làlà ittu auya'nokon pùla kulu man!

⁵⁰Ittu auya'nokon pùla man wakù pe iwa iwechi tewinnà kàyik welikù kappon yamùk ponaloppe yau, tamù'nawolon kon umata tukaik,” teppù.

⁵¹Tùyiwalà wa teppù ya pen màlà tùse Eke kulu paatele yamùk yennài pe tùwechi màlà yattai yau Jesus welikù Jew yamùk ponaloppe tukaik Katù maimu yenpoikappù ya,

⁵²tùse mùkyamlo ponaloppe neken pùla, tùse mùkyamlo nàlà iwetta'nùssak kon Katù munkà yamùk ponaloppe, tok nesse tamùkke tewin tok wettoppe.

⁵³Màlà motapai tok wekkupùppù màlà Jesus wànà pàk.

⁵⁴Màlàpàk ayupo Jew yamùk kùlottawàlà Jesus usalàppù pen. Tùse iitàpù pata wontaik piyawon Ephraim itesek pona, molopai molo iwechippù tùnenupa ton pokonpe.

⁵⁵Molopai Usentaka'nàppà pàk Uta'lettàtok yattai wenappù mei pùla, molopai tukkan kon kappon yamùk utàppù echikili pata yamùk poi Jerusalem pona, Uta'lettàntok Weyu wapiya ekolùkaik wekolùkantok yeselu yawàlà.

⁵⁶Màlàyau tok wechippù Jesus yeneiche molopai tok usekamappopàtùppù tùyiwalà'nokon Katù yùwùk tau echii'ma, “Yà'là tukaik mesenumenkayatàu, Uta'lettàntok yak na' iyàpù pe pùla kulu iwechi màlà?” tukaik.

⁵⁷Paatele yamùk yennài nan molopai Pharisee yamùk uya “Ànù'là, Jesus wechi i'nailàlà ittunài uyàpù màlà ina pàk yekamaik, ina uya yachi toppe,” teppù.