Read Patamona John 18 Bible Online

John 18 - Patamona bible

John 18

¹Tùwàpùlemakapù tùpo, Jesus utàppù tùnenupa ton pokonpe, tok ukklàtùppù Kidron ya'moppakùyi latoi pona. Umà wechippù màlà molo. Màlà yak iitàppù tùnenupa ton pokonpe.

²Judas, Jesus yeimipponàippù uya màlà patassek ittuppù, masapùla màlà motau Jesus uya tùnenupa ton yepopàssek pàk.

³Màlàyau Judas uyàpùppù umà yak sousa yamùk molopai paatele yamùk yennàinan molopai Pharisee yamùk neunokossan nepùppù ya. Tepu pàk apok yalàppù tok uya, lanppu yamùk molopai kasupala yamùk là.

⁴Jesus uya màlà tamù'nawolon yà'là pe là tùkuttok ittuppù. Iitàppù tok piyak molopai tok pàk, “Ànùk yeneiche messatàu?” teppù ya.

⁵Tok uya imaimu yeikuppù, “Jesus Nazareth pon,” tukaik. Jesus uya, “Iulà mùkkàlà,” teppù tok pàk. Judas nàlà yeimipponàippù wechippù satippe tok piyau.

⁶“Iulà mùkkàlà,” tesak Jesus uya yau, tok utàppù tùnpoi kon winà, molopai tok wekkawai'mappù non pona.

⁷Màlàyau Jesus uya tok yekamappotu'mappù, “Ànùk mùwayatàu?” tukaik. Tok uya, “Jesus Nazareth pon,” teppù.

⁸Jesus uya tok maimu yeikuppù, “Iulà mùkkàlà ukai kuichi àpàkù'nokon tà, uyiwa auya'nokon yau, tàwà pùsamo nùtài,” teppù ya.

⁹Sàlà wekkupùppù màlà iichelupappù lùppù wekkutoppe “Tewin nà ulepatok kon auya tonpa lachima uya pùn,” tawon.

¹⁰Màlàyau Simon Peter, kasupala walai yesak uya imokkappù molopai eke kulu paatele yamùk yepulu yapyoto wànàppù ya, molopai ipana latoi laittan winon yattàppù ya. Itapyoto yesek wechippù Malchus pe.

¹¹Màlàyau Jesus uya Peter pàk, “Akasupalayi yemaikakà iten yak! Ukàipùnù uya na' ulepatok kok yawon inchi uya pen sàlà?” teppù.

¹²Màlàyau sousa yamùk molopai tok yepulu, molopai Jew yamùk yennài nan uya Jesus yachippù molopai tok uya yaulonpàtùppù.

¹³Molopai tok uya yalàppù wapiya Annas piyak, Caiaphas noppù kàipùnù pe iwechippù mùkkàlà wechippù màlà eke paatele yamùk yepulu pe màlà yattai.

¹⁴Caiaphas mùkkàlà Jew yamùk yelupanàippù, “Wakù pe iwechi màlà tewin nà kàyik welikù kappon yamùk ponaloppe yau,” tukaik.

¹⁵Simon Peter molopai tùulon Jesus nenupa uya iwenaimappù. Masapùla pùsàlà inenupa wechippù màlà eke kulu paatele yamùk yepulu nùttu pe màlàpàk iitàppù Jesus ye'mappù pàk eke kulu paatele yamùk yepulu patassek yak.

¹⁶Tùse Peter wechippù satippe polopo pata we'na mùlatta po. Màlàyau tùulon Jesus nenupa ton tonpa Eke kulu paatele yamùk yepulu nùttu wennappoppù, molopai ulichan manata yennài yelupappù ya, molopai Peter yewonnùpùppù ya.

¹⁷Màlàyau ulichan manata yennài uya Peter pàk, “Àmàlà ken na' pùsàlà kàyik nenupa ton tonpa pen?” teppù. “Kane ku, Iulà pen nen mùkkàlà,” tukaik yeikuppù ya.

¹⁸Iko pe iwechippù màlàpàk apyoto yamùk molopai ennàinan uya apok pottàppù, molopai tok wechippù satippe iwoi, tùwa'no kon pàk. Peter wechippù nàlà satippe tok piyau tùwa'no pàk.

¹⁹Màlà yattai eke kulu paatele yamùk yepulu uya Jesus yekamappoppù inenupa ton pàk, molopai enupantok ya pàk.

²⁰Jesus uya imaimu yeikuppù, “Uselupasak man ayupo wolù uya yeta tùse. Tàwàlàlà tok yenupappù uya màlà Jew yamùk wepilittok itak tau. Molopai Katù yùwùk tau, tamù'nawàlà Jew yamùk wepilittok yau, molopai uselupasak man amak yai pùla.

²¹Yà'là pe iwechi pàk uyekamappo auya màlà? Mùkyamlo yekamappokà uyetannan nùssan. Tok uya sàlà yà'là teppù uya là ittu,” tukaik.

²²Jesus uya wa tesak yau, tewinan nà ennàinan tonpa uya Jesus mùta'moppù, “Màlà kasa ken na' uchi Eke kulu paatele yamùk yepulu maimu yeiku auya màlà?” tei'ma.

²³Jesus uya imaimu yeikuppù, “Ikasa pùla pe uselupasak yau, ikasa pùla man kakkà, tùse ailon pe iwechi yau, yà'là pe iwechi pàk kùnta'moi?” tukaik.

²⁴Màlàyau Annas uya yeunokoppù yaulonpàssak pe lùppù, Eke kulu paatele yamùk yepulu Caiaphas piyak.

²⁵Peter wechi molo satippe tùwa'no pàk tùse. Kappon uya yekamappoppù, “Àmàlà nàlà ku mùkkàlà ya'lon nà, ewaik na'?” tukaik. Peter uya yeikuppù, “Kane, Iulà pen,” tukaik.

²⁶Màlàyau Eke kulu paatele yamùk yepulu yapyoto, Peter nùpanalùkàtùppù lùppù tonpa uya ipàk, “Umà yau ken na' eyene uya pùn mùkkàlà pokonpe?” teppù.

²⁷Peter uya tu'ma yeikuppù, “Kane,” tukaik. Molopai màlà yattai kalicho tàwùppù.

²⁸Màlàyau Jew yamùk uya Jesus yalàppù Caiaphas piyapai Roman Kopùnayi pata yak. Ko'làma iwechippù màlà, Jew yamùk wewomùppù tapùi tak pen màlà, masapùla wakù pe teselu kon yawà eppai tok wechippù Usentaka'nàppà yattai Uta'lettàntok pàk tùuta'lettàtok kon pe.

²⁹Màlàpàk Pilate wepakkappù tok piyak molopai, “Yà'là mùkayatàu ken àli pe pùsàlà kàyik winàkàik?” teppù ya.

³⁰Màlàyau tok uya ipàk, “Àli ku'nàippù pe pùla iwessak yau, ina uya sàlà apyak inepùppù pen eppaino,” teppù.

³¹Màlàyau Pilate uya tok pàk, “Yatàk kon eyiwalà'nokon àmàlà'nokon Law winà ittutantàk kon,” teppù. Jew yamùk uya ipàk, “Tùse ànù'là tùtoppe ina uya iwelittok yak ikussak pùla man,” teppù.

³²Sàlà wekupùppù màlà yà'là yekkwa là weli'nàtok yau tùwelittok yekamappù Jesus uya kasa iwekkuttoppe.

³³Màlàyau Pilate wewontukkappù tapùi tak, Jesus kà'mappù ya molopai yekamappoppù ya, “Jew yamùk kinù na' àmàlà?” tukaik.

³⁴“Eyiwalà na' wa te auya màlà wapùla ka' tùulon kon upàk eyelupai lù?” tukaik Jesus uya yekamappoppù.

³⁵Pilate uya imaimu yeikuppù, “Jew na' Iulà?” tukaik. “Atonpa yamùk molopai paatele yamùk yepulu yamùk uya màlà uyemyak àtùsak. Yà'là mùkuttai?” tukaik.

³⁶Jesus uya “Itepulu pe wettok màlà sàlà wolù ponalok pen. Wa iwechi yau, Jew yamùk uya uyachi tukaik uyapyoto ton wepanta'mappù sàlà uwenai eppaino. Tùse sàlà pe itepulu pe wettok wechi màlà tùulon pata winàpaino pe,” teppù.

³⁷Màlàpàk Pilate uya ipàk, “Màlàyau ken na' kin àmàlà?” teppù. Jesus uya yeikuppù “Kin àmàlà mùkayaik làkku. Wentusak màlà sàlà wolù yak molopai uyàpùppù sàlà pàkànsau, ailon pàk eselupaik. Tamù'nawolon kon ailon winon kon umaimu yetannan,” teppù Jesus uya Pilate pàk.

³⁸Pilate uya Jesus yekamappoppù, “Yà'là ken màlà ailon?” tukaik. Wa te tùpo Pilate wepakkatu'mappù Jew yamùk piyak, molopai tok pàk, “Italumattàtok uya iwenai woton yà'làlà àli yepolo uya pùla man.

³⁹Tùse eyeselu kon màlà tewin nà yachisak lùppù yenpakka uya apyakù'nokon Usentaka'nàppà pàk Uta'lettàntok yattai. ‘Jew yamùk kinù’ yenpakka uya na' iche messatàu?” teppù Pilate uya tok pàk.

⁴⁰Màlàyau tamù'nawàlà tok wentaimeppù, “Kane, mùkkàlà pen! Barabbas làkku iche ina man,” tukaik. (Barabbas wechippù màlà Roman yamùk yepulu yentaikanàippù pe.)