Read Patamona John 3 Bible Online

John 3 - Patamona bible

John 3

¹Molo iwechippù kàyik Pharisee yamùk tonpa, Nicodemus itesek, Jew yamùk yepulu tonpa.

²Pùsàlà uyàpùppù Jesus piyak ewalupàttau, “Ticha, ina nùttuyan enupanài pe ewechi Katù neunokopù pe. Ànù'là kappon ànkupù yekkwa kupù pen, tùse Katù wechi neken ipokonpe yau,” teppù ya Jesus pàk.

³“Ailon kulu sàlà, tùwentutu'maik pùla echii'ma ànù'là uya Katù wettok itepulu yene pen màlà,” teppù Jesus uya.

⁴“Yà'là kasa ken uchi kàyik wentutu'ma amoko pe là echii'ma? Tùsan lotta yak ken na' iwennappo yakon itekkwa pe tùwentukkatoppe?” teppù Nicodemus uya.

⁵Jesus uya imaimu yeikuppù, “Ailon kulu sàlà, ànù'là tuna yai, molopai Wakù Akkwalù yai iwentusak pen wewomù Katù wettok itepulu pe yak pen màlà teuya sàlà.

⁶“Kappon yai iwentusak mùkkàlà kappon, tùse Akkwalù yai iwentusak mùkkàlà Akkwalù winàpaino.

⁷‘Yà'là kasa ken sa' uchi ko,’ kùkai, masapùla ewentutukka kon màlà,’ te uya pàk.

⁸Assetun tasse'nùnsen mailàlà. Itàwù yetanài àmàlà, tùse i'nai motapai là iyàpù wapùla iità ittu auya pen. Màlà kasa ànù'là Akkwalù yai iwentusak lùppù wechi màlà.”

⁹Nicodemus uya yekamappoppù, “Yà'là kasa ken uchi iwechi sàlà?” tukaik.

¹⁰Jesus uya imaimu yeikuppù, “Àmàlà mùkkàlà Israel yamùk yenupanài, tùse ken na' uchi sàlà ittu auya pùla nai?” tukaik.

¹¹“Ailon kulu sàlà, ina uselupa màlà tùnùttu kon pàk, molopai tùneneppù kon yekama ina uya, tùse màlà ina nekama yanùmù auya'nokon pùla lùppù man.

¹²Sàlà non pon kon yekama uya pàk là ailon te auya'nokon pùla man. Yà'là kasa nen ken uchi ailon te auya'nokon epùn pon yekama uya pàk?

¹³Ànù'là kappon utàsak epùn pona pùla man tùse Kàyik Mumu neken iyàssak lùppù epùn poi,” tukaik.

¹⁴Moses uya àkài kalukuli konekasak pùmùssakappù yei pàk, wontaik yau. Màlà kasa làma Kàyik Mumu pùmùsakka màlà pulusuk pona.

¹⁵Màlàpàk tamù'nawolon kon ailon tawonnan ipàk wechi màlà wema'nàtok yesappe tàwàlàlà.

¹⁶Tù'nùn pe kulu kappon yamùk sàlà wolù pon kon kupù tùuya pàk Katù uya tewinan tù'nùn kulu tùmu tùlùppù ànù'là ailon tawon ipàk umatta pen, tùse tàwàlàlà iwemapù.

¹⁷Masapùla sàlà wolù pon kon kappon yamùk talumattàik Katù uya Tùmu yeunokoppù pen màlà, tùse tok wepùikattà toppe làkku yai.

¹⁸Ànù'là ailon tawon ipàk talumattàsak pen màlà, tùse ànù'là ailon tawon pen ipàk talumattàkasak màlà. Masapùla tewinan molopai i'nùn kulu Katù Mumu yesek pàk ailon tesak ya pùla iwechi pàk.

¹⁹Sà kasa iwechi pàk wettalumattàn màlà. Akkwa uyàssak man sàlà non pona, tùse kappon yamùk tù'nùn kon pe ewalupà kussan akkwa yentai, masapùla àli pe teselu kon wechi pàk.

²⁰Mùkyamlo àli ku'nài nan uya akkwa kupù màlà tewanma kon pe, akkwa yak iyàpù pen, masapùla àli teselu usenpoika tukaik.

²¹Tùse ànù'là ailon pe tùwessen mùkkàlà tùuyàssen akkwa yak, tùwotokoyi kusak tùuya Katù yai yenpoikase yentoppe.

²²Sàlà tùpo Jesus utàppù tùnenupa ton pokonpe Judea pona. Molo iwechippù tok piyau malalà molopai kappon yamùk yenpataukappù ya.

²³John nàlà uya kappon yamùk yenpataukappù Aenon po, Salim piyau, masapùla molo eke pe tuna wechippù. Màlàpàk kappon yamùk uyàpùppù esenpataukaik.

²⁴(Masa patikichi tak John tùlùppù pùla iwechippù màlà.)

²⁵John nenupa ton pokonpe tewinnan nà Jew usàulàmappù wekolùkantok yeselu Katù nanùmù yeppe pàk.

²⁶John nenupa ton uyàpùppù ipyak, “Ticha, mùkkàlà kàyik ipokonpe mettainùk Jordan latoi po, wakù pe ipàk meselupatainùk, talà kappon yamùk yenpatauka yan. Tamù'nawolon kon nepilichan ipyak!” teppù tok uya.

²⁷John uya tok maimu yeikuppù, “Kappon uya yà'làlà yepotok pùla man, tùse epùn poi neken Katù uya ilepasak yau.

²⁸Mùttuyatàik, ‘Christ itesek pen Iulà, tùse iwapiya yeunossak Iulà,’ teppù uya.

²⁹Tùwemali'masen umoine ponalok mùkkàlà ema'non. Umoine wechi yakon wechi màlà ipyau yeta pàk, molopai itauchinpa tùwechi yakon maimu yeta tùuya yau. Màlàpàk utauchinpayaik eke pe tùwemali'masen wechi yakon utauchinpa kasa.

³⁰Mùkkàlà wena màlà eke pe kulu, eke pe ma'le wena tùse,” teppù John uya.

³¹Mùkkàlà epùn poi iyàssak wechi màlà tamù'nawolon yentai. Mùkkàlà non poi iyàssak mùkkàlà non ponalok, molopai ichelupa màlà non pon kasa. Mùkkàlà epùn poi iyàssak wechi màlà tamù'nawolon kon yentai kulu.

³²Tùneneppù pàk molopai tùnetappù pàk ichelupa, tùse ànù'là uya inekama yanùmù pùla iwechi.

³³Ànù'là uya ichelupatok yanùnsak yau, ailon pe Katù wechi yekama ya màlà.

³⁴Mùkkàlà Katù neunokoppù uya màlà Katù Maimu yekama, masapùla ipùkkù pùn Wakù Akkwalù ke Katù uya ilepasak màlà.

³⁵Ikàipùnù uya Tùmu pùnùnma màlà, molopai tamù'nawolon tùsak ya màlà itemyak.

³⁶Ànù'là Imu pàk ailon tawon uya, tàwàlàlà wema'nàtok yepolo màlà. Tùse ànù'là Imu nulunpanài uya wema'nàtok yene pen màlà, tùse Katù we'naikatok wechi ipo tàwàlàlà.