Read Patamona John 5 Bible Online

John 5 - Patamona bible

John 5

¹Màlà tùpo Jew yamùk uta'lettàtok yattai wechippù, màlàpàk Jesus utàppù Jerusalem pona.

²Molo Jerusalem po, tuna wechippù màlà Kalinilu Mùlatta piyau, Hebrew Maimu yau, Bethesda tukaik tesassen. 5 pe wewonnàtok yai wechippù màlà tùwapu ke'nan.

³Màlà motau tukke e'nek ton wechippù enpùnon, tùusasan pen, molopai iitokkassak kon. [Tuna welaika màmuku pàk tok wechippù.

⁴Masapùla tùulon yattai'ne là Itepulu inchelùyi uttàpàtùppù màlà tunappai kak tuna laikapàsse. Mùkkàlà wapiya ilaikasak tùpo ikak iitàsak lùppù uchipittàppù màlà i'nai yekkwa pe là iwechi tepalan yapai.]

⁵Molo kàyik wechippù tachin pe 38 pe kilichimochi e'neppe iwessak lùppù.

⁶Molo aittoupe iwechi yene tùuya yau Jesus uya tachin pe màlà kasa molo iwechippù pe ittuppù. Màlàyau, “Echipittàpai na' messan?” teppù ya ipàk.

⁷E'nek kàyik uya imaimu yeikuppù, “itepulu, ànù'là upùikattà woton pùla man, tuna laikasak kùlottau ikak unonka woton. Utàiche wechi tùse tùulonnà mùkkàlà uwapiyakkanài,” tukaik.

⁸Màlàyau Jesus uya ipàk, “E'wuluukakà, ayapon yanùnkà molopai itàkà,” teppù.

⁹Màlàpàk asse'ne kulu kàyik uchipittàppù, tapon yanùmùppù ya molopai iitàppù. Sàlà kupùppù ya màlà Jew yamùk wàlàkkattok weyu yattai.

¹⁰Jew yamùk uya mùkkàlà kàyik iichipittàsak lùppù pàk, “Wàlàkka'nà weyu sàlà. Law yawàlà pùla ayapon yalà auya wàlàkkattok weyu yattai wechi màlà,” teppù.

¹¹Tùse tok yeikuppù ya, “Kàyik nen uyipittànàippù, ‘Ayapon yanùnkà molopai itàkà,’ nùkai upàk,” tukaik.

¹²Tok uya yekamappoppù, “Ànùk ken uchi mùkkàlà kàyik, ‘Ayapon yanùnkà molopai itàkà,’ tawonùppù àpàk?” tukaik.

¹³Tùse kàyik iichipittàsak lùppù uya ànùk pe ittu pùla iwechippù, masapùla Jesus utàppù wechippù màlà asse'ne tukkan kon kappon yamùk molo tùwessan kùlottak.

¹⁴Màlà tùpo Jesus uya yepoloppù Katù yùwùk tau, molopai ipàk, “Masa yenkà! Ewennasak man. Àli kùkkupùi sàlà yentak, yattai pùla màlà yentaino wekkupù àpàk,” teppù ya.

¹⁵Kàyik utàppù molopai Jew yamùk pàk Jesus pe tipittànàippù wechi yekamappù ya.

¹⁶Màlà wenai Jew yamùk yepulu yamùk wessa'molùkappù Jesus talumattà pàk, masapùla màlà kussak ya Jew yamùk Wàlàkkattok yattai pàk.

¹⁷Tùse Jesus uya tok pàk, “Ukàipùnù mùkkàlà tùwe'wotokomasen tàwàlàlà, màlàpàk Iulà nàlà we'wotokoma màlà,” tukaik.

¹⁸Màlà uya tùsa'molùkaik ànwàkappai tok wenappù màlà, Jew yamùk wàlàkkattok weyu ikkwàssak ya pàk neken pùla, tùse Tùkàipùnù pe kulu Katù yekama ya molopai Katù kaichalà iwekkupù pàk.

¹⁹Jesus uya tok maimu yeikuppù, “Ailon kulu sàlà, Imu uya yà'làlà kupù tùyiwalà pen, tùse Tùkàipùnù uya neken ikupù yene tùuya yau ikupù ya. Yà'làlà Tùkàipùnù nùkupù ku'nài nàlà mùkkàlà Imu.

²⁰Masapùla Ikàipùnù uya màlà Tùmu pùnùnma molopai tamù'nawàlà tùnkupù yenpoikasak ya itemyak. Molopai sàlà yentaino kon lùiwa yenpoika ya màlà ikuttoppe ya, màlàpàk eusenumenka pa.

²¹Ikàipùnù uya iwelichak wuluuka molopai iwemattok ke tok lepa ya, kasa làma màlà Imu uya wema'nàtok ke mùkyamlo enlepapai tùwettok kon lepa.

²²Masapùla Ikàipùnù mùkkàlà sà kasa messaik, wapùla sà kasa pùla messaik tawon pen ànù'là pàk, tùse ittuntok tùsak ya màlà tamù'nawàlà tùmu yemyak.

²³Tamù'nawolon kon uya Imu nama toppe, Ikàipùnù nama tùuya'nokon kasa. Ànù'là Imu namanài pen uya Ikàipùnù yeuno'nàippù nama pe pùla iwechi màlà.

²⁴“Ailon kulu sàlà, mùkkàlà umaimu yetayai'nùk molopai ailon nùkayai'nùk uyeuno'nàippù pàk wechi màlà tàwàlàlà wema'nàtok yesappe. Italumattàtok yak itùlù pen màlà, tùse weli'nàtok yentakasak ya màlà wema'nàtok yak.

²⁵Ailon pe kulu àpàkù'nokon yekama uya sàlà, pata weyu nùyàssan, iyàkkassak man, mùkyamlo iwelichak kon uya Katù Mumu maimu yeta màlà, molopai mùkyamlo yetannan wemapù màlà.

²⁶Ikàipùnù yau wema'nàtok wechi kasa làma màlà Tùmu kussak ya wema'nàtok wettoppe yau.

²⁷Molopai ilepasak ya màlà kappon yamùk ittutok ya yapàikketù ke, masapùla Kàyik Mumu pe iwechi pàk.

²⁸Kesenumenkatàu kulu sàlà pàk, pata weyu nùyàssan, tamù'nawàlà uluwaik yawon kon uya imaimu yetatok yattai.

²⁹Molopai tok we'wuluuka màlà uluwaik yapai, mùkyamlo wakù ku'nàinan nùssan we'wuluuka màlà wema'nàtok yak. Molopai mùkyamlo àli ku'nàinan nùssan we'wuluuka màlà wettalumattàntok yak,” teppù Jesus uya.

³⁰“Uyiwalà yà'làlà kupù uya pen màlà. Katù uya neken yekama yeta uya pàkàlà màlà ittu uya, màlàpàk ittuntok uya wechi màlà ailon pe. Masapùla uyiwalà iche wettok kupù uya pen sàlà, tùse Ukàipùnù uyeuno'nàippù yeselu kupù uya.

³¹“Upàk uselupa yau, ailon tetok uselupatok pàk pùla iwechi màlà.

³²Tùse tùulon molo man tùuselupasen upàk, molopai ailon pe upàk ichelupatok wechi ittunài Iulà.

³³John piyak amaimu kon yekaman nan yeunokoppù auya'nokon, molopai ailon pàk ichelupappù.

³⁴Kappon yamùk wechi uyekamannan pe iche kulu pùla wessaik, tùse sàlà yekama uya sàlà ewepùikattà kon pa.

³⁵John wechippù màlà lanppu uyatù kasa akkwa pe, màlà yattai iweyu yau autauchinpa kon pàk alikyek pe ewechippù tachinpe là pùla.

³⁶Tùse uponalok pe yekamanài yesappe wessaik, John yentaino. Màlà kulu wotoko ukàipùnù uya ulepatok yenuka'nùtoppe uya, tùkussai'nùk uya yekama màlà ukàipùnù uya uyeunossak pe.

³⁷Molopai Ukàipùnù uyeuno'nàippù uya uyekamasak màlà tùmàlà pe. Tùse imaimu yetasak là auya'nokon pùla man, intenpata yensak là auya'nokon pùla.

³⁸Wapùla Imaimu wemapù là ayau'nokon pùla, masapùla ailon te auya'nokon mùkkàlà ineunokoppù pàk pùla iwechi pàk.

³⁹Wakù pe Katù Maimu pàk eusenupa kon, masapùla màlà winà là tàwàlàlà wema'nàtok yepolo auya'nokon yeselùkek ittu auya'nokon pàk. Molopai sàlà yamùk Katù Maimu uselupasak màlà upàk.

⁴⁰Tùse upyak àuyàpù kon pùla man wema'nàtok yepolo kon pa.

⁴¹“Kappon yamùk uya apulàntok iwa uya pen sàlà.

⁴²Tùse eyittuyatàu Iulà, Katù pùnùnmatok pùla eyewan kon yau ewechi kon tùttuyaik.

⁴³Uyàssak man Ukàipùnù yesek yau, tùse uyanùmù auya'nokon pùla man. Tùse ànù'là uyàssak tùyiwalà tesek yau yanùmù nen uchi auya'nokon màlà.

⁴⁴Essentak atapulàpainokon amyamlo, tùse Katù winàpaino neken apulàntok yepoloiche ewechi kon pen. Yà'là kasa ken ailon te auya'nokon?

⁴⁵Ukàipùnù yemlotopo atalumattà kon pe uselupa pe kùsekamatàu. Moses nen mùkkàlà tùuselupasen àli pe àpàkù'nokon. Mùkkàlà enpen ipàk ewechippù kon nùppù.

⁴⁶Moses pàk ailon tesak auya'nokon yau, upàk ailon tetok auya'nokon pan. Masapùla uyekale menukappù ya màlà.

⁴⁷Tùse inmenukappù pàk ailon tei'ma'nokon pùla, yà'là kasa nen ken uchi ailon te auya'nokon uselupatok pàk?” teppù nàlà Jesus.