Read Patamona John 6 Bible Online

John 6 - Patamona bible

John 6

¹Tachinpe pùla sàlà tùpo Jesus ukklàtùppù palau Galilee latoi pona, palau Tiberias pe nàlà tùttusen.

²Ilinà kappon yamùk uya iwenaimappù màlà masapùla ittutok ipàkàlà pe palan pokon kon ipittàya yensak tùuya'nokon pàk.

³Jesus wenukuppù wùk pona molo iweleutappù tùnenupa ton pokonpe.

⁴Jew yamùk uta'lettàtok Usentaka'nàppà lùppù pàk winàkàik iwechippù.

⁵Jesus uya tenu tùlùppù, molopai ilinà kappon yamùk uyàpù tùwinàkàik yeneppù ya. Philip pàk, “I'nai motau ken kùyali ye'ma pe nai tamù'nawolon kon pùsamo yewettoppe?” teppù ya.

⁶Ittu pe yekamappoppù ya màlà. Masapùla tùnkupù ittukapù tùuya pàk.

⁷Philip uya imaimu yeikuppù, “200 pe chilùpa pun uya kùyali ye'ma pen ima'le iwechi, tamù'nawolon kon uya yonpatoppe,” tukaik.

⁸Tewinannà inenupa ton Andrew, Simon Peter tonpa uya ipàk,

⁹“Talà walawok muleppù man 5 pan paali yapai ikonekasak pùlomù pusak, molopai asa'lon kon molok yamùk lùkkwà ipyau man, tùse pùsamo kappon yamùk kaichalà pùla iwechi,” teppù.

¹⁰Jesus uya, “Eleutatàk kon, katàk kon tok pàk,” teppù. Ichin pe wanak wechippù, màlà pata yau. Màlàyau kàyik yamùk weleutappù, 5000 yawàlà'ne tok wechippù.

¹¹Jesus uya pùlomù pusak yanùmùppù, tenki teppù ya Katù pàk, molopai tùnenupa ton yemyak itùlùppù ya kappon yamùk lepatoppe tok uya. Màlà kasa lùppù molok kupùppù ya, molopai tamù'nawolon kon uta'lettàppù iche tùwettok kon kasa.

¹²Tok uta'lettàkassak yau, tùnenupa ton pàk, “Ippunuppù ipilittàk kon yà'làlà wessenu'ma tukaik,” teppù.

¹³Màlàyau tok uya ipilipùppù, 12 kaichalà walicha yanùkapù tok uya, 5 pan paali yapai ikonekasak pùlomù pusak punuppù, iita'lettàsak kon nùnàmàppù ke.

¹⁴Jesus uya ittutok ipàkàlà kupù yensak tùuya'nokon yau kappon yamùk uya, “Ailon kulu pùsàlà Katù Maimu Yenpoikanài tùuyàpù woton sàlà wolù yak teppù ipàk lùppù,” teppù.

¹⁵Jesus uya ittuppù tùmàlà teka'nonkaik tepulu kon pe tùkusse tok uyàpù tùpyak. Màlàpàk iitàtu'mappù tok winàpai wùk pona tùmàlà pe neken.

¹⁶Ko'man pe iwenasak yau inenupa ton utàppù palau yena pona.

¹⁷Molo kanau yak tok wenukuppù molopai tok ukklàtùppù palau latoi pona Capernaum winàkàik. Ewalupà pe iwenasak wechippù molopai Jesus wennapposak tok piyak pùla lùppù.

¹⁸Màlà yattai meluntà pe assetun utasse'nùmùppù màlà molopai chipachipa wechippù àsà pe.

¹⁹Mei kanau yukklasak tok uya 3 wapùla 4 miles pàkàlà tùse Jesus uyàpù tuna po kanau winàkàik yeneppù tok uya. Màlàyau tok usenalippasak wechippù.

²⁰Jesus uya tok pàk, “Iulà mùkkàlà, kesenalippatàu!” teppù.

²¹Màlàpàk tok uya alikyek pe yanùmùpù kanau yak. Molopai asse'ne kanau welepamùppù tok utàtok imotak yak.

²²Màlà wemassappe iwà'nànsak kon nùssan ilatoi ilinà kappon yamùk uya tewin neken kanau nànsak yeneppù. Jesus utàppù tùnenupa ton ya'là pe pùla tok uya ittuppù, tùse tùmyamlo pe neken tok utàppù pe ittuppù tok uya.

²³Tiberias poi tùulon kon kanau yamùk uyàpùppù màlà pùlomù pusak napùppù ilinà kappon yamùk uya, tenki te Itepulu Jesus uya tùpo motak.

²⁴Jesus molopai inenupa ton pùla molo ittusak tùuya'nokon yau, tok wenukuppù kanau yamùk yak molopai tok utàppù Capernaum pona Jesus iwase.

²⁵Jesus yeposak tùuya'nokon palau latoi po yau, tok uya ipàk, “Ticha, yà'là yattai ken sàlà motak màittai?” teppù.

²⁶Jesus uya tok pàk, “Ailon kulu sàlà, uyiwappù auya'nokon màlà ittutok ipàkàlà kupù uya yensak auya'nokon pàk pùla, tùse tùwenukasse pùlomù pusak pàk auta'lettàsak kon pàk.

²⁷Eyeipa kon iwa pàk neken ke'wotokomatàu tùumattasen màlà, tùse e'wotokomatàk kùyali tàwàlàlà tùwemassen yepolo kon pa. Kàyik Mumu uya sàlà kùyali ke elepa kon màlà. Masapùla Katù, Ikàipùnù uya sàlà yentok ipàkàlà tùsak màlà yanùnnsak tùuya yenpoikanài pe,” teppù.

²⁸Màlàyau tok uya Ipàk, “Yà'là kupù ken ina uya, Katù wotokoyi kuttoppe ina uya?” teppù.

²⁹Jesus uya tok maimu yeikuppù, “Sàlà màlà Katù wotokoyi, ailon te auya'nokon ineunokoppù pàk,” tukaik.

³⁰Tok uya yekamappoppù, “Yà'là ken uchi ittutok ipàkàlà kupù auya ina uya yentoppe, molopai ailon tetoppe ina uya àpàk? Yà'là ku'nài ken àmàlà?

³¹Ina tamo yamùk uya ‘mana’ itesek napùppù man wontaik yau, Katù Maimu yau iwe'menukasak kasa, ‘Katù uya tok yu ke tok lepappù epùn poi,’ tawon” teppù.

³²Jesus uya tok pàk, “Ailon kulu sàlà, Moses uya epùn poino pùlomù pusak ke elepappù kon pen màlà, tùse Ukàipùnù mùkkàlà elepanài'nokon ailon pùlomù pusak epùn poino ke.

³³Masapùla màlà pùlomù pusak Katù nùtùlù mùkkàlà iyàssak nai'nùk epùn poi, wolù yawon kon kappon yamùk lepase wema'nàtok ke,” teppù.

³⁴Màlàyau tok uya ipàk, “Uyepulu, sàlà motapai tàwàlàlà ina mùlepaik sàlà pùlomù pusak ke,” teppù.

³⁵Jesus uya tok pàk, “Iulà mùkkàlà pùlomù pusak wema'nàtok ke lepanài. Ànù'là uyàssak upyak yau iwapùkkapù pen màlà, molopai ailon tawon upàk we'nakklipa yà'là yattai là pen màlà.

³⁶“Tekamakattai àpàkù'nokon, uyensak auya'nokon man, tùse ailon te auya'nokon pùla lùppù man.

³⁷Tamù'nawàlà Ukàipùnù uya ulepatok kon uyàpù màlà upyak, ànù'là upyak tùuyàsen nulunpa uya pen.

³⁸Masapùla epùn poi iyàssak Iulà uyeselu kusse pùla, tùse mùkkàlà uyeuno'nàippù yeselu kusse.

³⁹Molopai sàlàichi màlà Uyeuno'nàippù yeselu, tamù'nawà ulepatok kon ya lachima uya pen màlà, tùse tamù'nawàlà tok wuluuka uya màlà wema'nàtok yak tewinanùppù wei yattai.

⁴⁰Masapùla Ukàipùnù wechi màlà, tamù'nawolon kon Tùmu yennài molopai ailon tawonnan ipàk uya tàwàlàlà wema'nàtok yepolo iche. Molopai tok wuluuka uya màlà wema'nàtok yak tewinanùppù wei yattai,” teppù.

⁴¹Màlàpàk Jew yamùk wessa'molùkappù tùusàulàma kon pàk masapùla Jesus uya, “Iulà mùkkàlà pùlomù pussak epùn poi iyàssak lùppù,” tesak pàk.

⁴²Tok usekamappopàtùppù, “Joseph mumu ken na' Jesus pen pùsàlà? Ikàipùnù molopai ichan tawonnan ken na' kùnùttu kon pen? Yà'là kasa ken uchi, ‘epùn poi iyàssak Iulà,’ te ya nai'nùk?” tukaik.

⁴³Jesus uya tok pàk, “Kàsàulàmatàu àyiwalà'nokon!

⁴⁴Ànù'là uyàpù upyak pen màlà, tùse Ukàipùnù uyeuno'nàippù uya neken tok nessak yau, tok wuluuka uya màlà wema'nàtok yak tewinanùppù wei yattai.

⁴⁵Tewinannà Katù Maimu yenpoikannan tonpa uya, ‘Tamù'nawolon kon yenupatok Katù uya woton,’ tawon menukappù. Molopai tamù'nawolon kon yetannan nùssan molopai ichenupasak kon Ukàipùnù winà uyàpù màlà upyak.

⁴⁶Ànù'là uya Ukàipùnù yensak pùla iwechi màlà, tùse mùkkàlà neken Katù winàpaino uya màlà yensak.

⁴⁷“Ailon kulu sàlà, mùkkàlà ailon nùkayai'nùk wechi màlà tàwàlàlà wema'nàtok yesappe.

⁴⁸Iulà mùkkàlà pùlomù pusak wema'nàtok ke lepanài,”

⁴⁹“Atamo kon uya manna napùppù wontaik yau, tùse tok welikùppù man.

⁵⁰Tùse sàlà màlà pùlomù pusak epùn poi iyàssak, ànù'là uya inassak yau, iwelikù pen màlà.

⁵¹Iulà mùkkàlà nulànan pùlomù pusak epùn poino. Ànù'là ina'nàippù wemapù màlà tàwàlàlà. Molopai sàlà pùlomù pusak màlà upun untùlù nulà we'nàtok ke lepanài, wolù yawon kon kappon yamùk wemattok ike pe,” teppù nàlà Jesus uya tok pàk.

⁵²Màlàyau Jew yamùk wessa'molùkappù tùusàulàma kon pàk kulu tùyiwalà'nokon, “Atta ken uchi tùpun tùlù ya yantoppe'nokon?” teppù tok uya.

⁵³Jesus uya tok pàk, “Ailon kulu sàlà, Kàyik Mumu pun yannài pe pùla ewechi kon molopai imùnù inchinài pe pùla ewechi kon yau, wema'nàtok pùla iwechi màlà ayau'nokon.

⁵⁴Ànù'là upun yannài molopai umùnù inchinài wechi màlà tàwàlàlà wema'nàtok yesappe, molopai iwuluuka uya màlà wema'nàtok yak tewinanùppù wei yattai.

⁵⁵Masapùla upun màlà kùyali kulu molopai umùnù màlà tinchisen kulu.

⁵⁶Mùkkàlà upun yannài molopai umùnù inchinài wemapù màlà uyau tàwàlà, molopai Iulà nàlà wemapù yau,” teppù Jesus uya.

⁵⁷“Tùwemassen Ukàipùnù uya uyeunossak sàlà, màlàpàk nàlà wemapù sàlà Ukàipùnù pàkànsau. Màlà kasa làma upàk tùuta'lettàsen wemapù màlà upàkànsau.

⁵⁸Sàlà màlà pùlomù pusak epùn poi iyàssak lùppù. Kùtamo kon yamùk nùnapùppù yekkwa pen. Tok welikùppù màlà, tùse mùkkàlà sàlà pùlomù pusak na'nài wemapù màlà tàwàlàlà,” teppù Jesus uya tok pàk.

⁵⁹Wa teppù ya màlà enupan tùuya yau Jew yamùk wepilittok itak tau Capernaum po.

⁶⁰Yeta tùuya'nokon yau tukkan kon inenupa ton uya, “Sa'man pe kulu sàlà enupantok man. Ànùk uya ken yanùmù?” teppù.

⁶¹Tùuselupatok lùppù pàk tùnenupa ton usàulàma ittusak tùuya yau, Jesus uya tok pàk, “Uselupatok na' asakolopayatàu?

⁶²Yà'là pe ken ewechi kon Kàyik Mumu wenuku wapiya yau tùwechippù yak yene auya'nokon yau?

⁶³Akkwalù mùkkàlà wema'nàtok ke lepanài, esak nen màlà yà'là pen. Uselupayai'nùk màlà Akkwalù molopai wema'nàtok ke lepanài.

⁶⁴Tùse attau'nokon tùulon kon uya ailon te pùla lùppù man.” Iweppyattà motapai Jesus uya i'namo uya ailon teppù pùla iwechi, molopai i'nai uya tùwelittok yak tùtùlù ittuppù màlà.

⁶⁵Màlàyau, “Wa iwechi pàk àpàkù'nokon yekama uya nettainùk, ànù'là uyàpù upyak pen tùse Ukàipùnù uya neken iyàttoppe ikussak yau iyàpù, te uya,” teppù ya.

⁶⁶Màlà motapai tukkan kon inenupa ton wennappoppù molopai ya'là tu'ma là tok wechippù pen.

⁶⁷Màlàyau Jesus uya tùnenupa ton 12 pan kon pàk, “Itàpai nàlà na' messatàu?” teppù.

⁶⁸Màlàyau Simon Peter uya imaimu yeikuppù, “Uyepulu, ànùk piyak uchi ina utà? Apyau nen mayin man tàwàlàlà wema'nàtok ke lepanài.

⁶⁹Ailon nùkayan ina, molopai ina nùttuyan wakù kulu àmàlà Katù winàpaino,” tukaik.

⁷⁰Jesus uya tok maimu yeikuppù, “12 pe na' unanùmùssan pen na' amyamlo? Tùse tewin nà àtonpa kon Makui pe man,” tei'ma.

⁷¹Judas pàk ichelupappù, Simon Iscariot mumu pàk, mùkkàlà 12 pan kon tonpa pe là echii'ma iwàtok yak yeimippo woton.