Read Patamona Yeunossak kon Wotokoyi 11 Bible Online

Yeunossak kon Wotokoyi 11 - Patamona bible

Yeunossak kon Wotokoyi 11

¹Yeunossak kon molopai ailon tawonnan Jesus pàk Judea yawolon kon uya yetappù Jew yamùk pen uya nàlà Katù Maimu yanùnsak.

²Peter utàsak Jerusalem pona yau, mùkyamlo Jew yamùk yattàtok yeselu yawàlà Jew yamùk pen yattà pàk ailon tawonnan uya Peter mottùnpappù,

³“Jew yamùk yeselu yawà yattàsak pen, Jew pen kaklamu pe mettai molopai nàlà mata'lettàtai tok pokonpe!” tukaik.

⁴Màlàpàk Peter uya tamù'nawàlà iwekkussak lùppù yekamappù iwepyattàppù motapai.

⁵“Wàpùlema pàk wettai Joppa po, molopai we'neppà'nàtok walai tentai. Yà'là lànan uttà tentai eke lùmà assan walai ichensak, inuttà asakùlà'nan ipana'mu pàk epùn poi, molopai neleutatai upyau.

⁶Tentai yak mei pùla molopai asakùlà'na'nan kon itta kamo yamùk molopai kamo pen àsà ton ene yamùk tentai, tùusasan, tùwe'wolokasan molopai tolon yamùk.

⁷Màlàyau mayin uya upàk, ‘E'wuluukakà Peter, ànwàkà molopai ata'lettàkà!’ te tetatai.

⁸Tùse, ‘Kane, Uyepulu! Ànù'là ene là, àli là yannài pen Iulà, iwewonsak untak pùla iwechi màlà,’ ukatai.

⁹Mayin nùselupatu'matai upokon pe kau pai, ‘Yà'làlà Katù nùkolùkappù pàk àli wapùla ene kùkai,’ tukaik.

¹⁰Sàlà nekkuttai àsolùwau itekkwa, molopai màlà tùpo màlà yanù'nùttu'ma nettai kakàik epùn pona.

¹¹Màlà yattai kulu àsolùwawon kon kàyik yamùk yeunossak kon upyak Caesarea poi nelepantai tapùi itau wettok tak.

¹²Wakù Akkwalù nekamatai upàk utàtoppe tok ya'là tùusenalippaik pùla. Pùsamlo 6 pan kon kàyik yamùk kùtonpa kon yamùk nàlà nùtàtai uya'là Caesarea pona, molopai ina newontai itùwùk tak.

¹³Inchelù yeneppù tùuya satippe tùwùk satippe tùwùk tau yekamatai ina pàk, mùkkàlà uya, ‘Kappon yeunokkà Joppa pona kàyik kà'mase itesek Simon Peter,’ teppù tùpàk nùkatai.

¹⁴‘Itekale yekama ya màlà àpàk àmàlà molopai tamù'nawàlà àyùwùk tawon kon wepùikattàtok iwinà pe,’ teppù ya.

¹⁵Uselupa pàk wepyattàsak yau, Wakù Akkwalù nuttàtai tok pona, kùpona'nokon iwuttàppù kasa iwepyattà pe.

¹⁶Màlàyau tùttutai Itepulu Jesus uya, ‘John mùkkàlà enpataukanài tuna ke, tùse eyenpatauka kon màlà Wakù Akkwalù ke!’ teppù lùppù.

¹⁷Katù uya mùkyamlo Jew yamùk pen lepasak man, ailon te kùuya'nokon Jesus Christ pàk yau kùlepappù tùuya lùppù ke; ànùk ken uchi Iulà Katù yeleutanùttoppe uya?” tukaik.

¹⁸Sàlà yetasak tùuya'nokon yau, tok uya pokonomantok tùuya'nokon yeleutanùpùppù, molopai Katù yapulàppù tok uya, “Katù uya nàlàichi Jew yamùk pen lepasak man, tok welattàtok tùmakuyi kon winàpai Katù winàkàik yattai ke molopai tok wematoppe!” tukaik.

¹⁹Ailon tawonnan wetta'nùssak wechippù màlà talumattàntok Stephen wànà yattaino lùppù winà. Tùulon kon utàppù mei Phoenicia tepose, Cyprus molopai Antioch yawàlà itekale yekama pe Jew yamùk pàk neken.

²⁰Tùse tùulon kon ailon tawonnan, Cyprus molopai Cyrene pon kon utàppù Antioch pona, molopai tok uya Jesus yekale yekamappù Jew yamùk pen pàk nàlà.

²¹Itepulu yapàikketù wechippù tok ya'là, molopai tukke kappon yamùk uya ailon teppù molopai tok welattàppù Itepulu Jesus winàkàik.

²²Sàlà yekale uya Jerusalem po sochi yepoloppù màlàpàk tok uya Barnabas yeunokoppù Antioch pona.

²³Tùwelepansak yau molopai Katù wettok wakù pe yensak tùuya yau itauchinpappù, molopai tamù'nawàlà tok panamappù ya, ailon pe tok wettoppe Itepulu Jesus pàk tamù'nawàlà tewan kon ke.

²⁴Barnabas wechippù màlà wakù pe, iwanùssak wechippù Wakù Akkwalù ke molopai ailon tetok ke. Tukke kappon yamùk nepùppù màlà Itepulu Jesus piyak.

²⁵Màlàyau Barnabas utàppù Tarsus pona Saul iwase.

²⁶Yeposak tùuya yau, inepùppù ya Antioch pona. Tewin kilichimochi pùsamlo asa'lon kon wessepopàtùppù sochi tawon kon pokonpe, molopai tukkan kon kappon yamùk yenupappù tok uya. Antioch po màlà wapiya kulu ailon tawonnan yesatùppù Christ ponalok kon tukaik.

²⁷Màlà yattai Katù Maimu yenpoikannan utàppù màlà Jerusalem poi Antioch pona.

²⁸Tok tonpa Agabus itesek, wà'mùssakkappù molopai Wakù Akkwalù meluntàlù winà eke kulu iwan uyàpù tamù'nawàlà non pona, winàkàik iwechi yekamappù ya. Iyàpùppù màlà Claudius wechi itepulu pe yattai.

²⁹Jesus ya'lon wekkupùppù tamù'nawolon kon uya lepantok yeunoko pàk, yeunottok tùuya'nokon yawàlà lùkkwà là tùtonpa kon Judea po tùwemassan pùikattànài pe.

³⁰Sàlà kupùppù tok uya màlà molopai tok uya pùlayatta yeunokoppù ailon tawonnan yepulu yamùk piyak Barnabas molopai Saul tawonnan winà.