Read Patamona Yeunossak kon Wotokoyi 17 Bible Online

Yeunossak kon Wotokoyi 17 - Patamona bible

Yeunossak kon Wotokoyi 17

¹Paul molopai Silas tawonnan utàppù màlà Amphipolis molopai Apollonia yawàlà, molopai tok uyàpùppù Thessalonica pona, Jew yamùk wepilittok itak wechippù màlà molo.

²Tùwessek kasa là Paul utàppù màlà wepili'nàtok itak tak. Molo àsolùwau Wàlàkka'nàtok weyu yattai'ne kappon yamùk yekamappopàtù pàk iwechippù màlà Katù Maimu pàk.

³Yekamappù ya molopai yenpoikappù ya ikasa Christ wettalumattàtok molopai iwuluukatok weli'nàtok yapai wechippù. “Pùsàlà Jesus tekamayai'nùk àpàkù'nokon mùkkàlà Christ,” teppù Paul uya.

⁴Tùulon kon uya ailon teppù Paul molopai Silas maimu pàk molopai tok tonpa pe tok wenappù. Molopai nàlà tukke Greek yamùk Katù naman nan, molopai tukke nossan yamùk tùnamasan wenappù Paul molopai Silas tonpa pe.

⁵Tùse Jew yamùk kùlùmàluppù molopai àli ton kappon yamùk pilipùppù tok uya asantapai. Tok uya kappon yamùk yaimelunpappù molopai tok utàppù Jason yùwùk tak asse'ne Paul molopai Silas tawonnan iwase, tok nettoppe tùuya'nokon kappon yamùk piyak.

⁶Tùse tok yeposak tùuya'nokon pùla iwechi yau, Jason wolokappù tok uya molopai tùulon kon ailon tawonnan, tok yalàppù tok uya pata yepulu yamùk yemlotopona molopai tok wentaimeppù: “Pùsamlo kàyik yamùk utaimelunpantok kussan wolù yawàlà. Molopai sàlà pe tok uyàssak man kùpata kon pona.

⁷Molopai Jason uya tok kussak man tùwùk tau. Caesar winàpaino wema'nàtok yawà, yawàlà pùla tok wessak man, tùulon Kin molo man Jesus itesek tesak tok uya man,” tukaik.

⁸Sàlà ke tukkan kon kappon yamùk molopai pata yepulu yamùk yaimelunpappù tok uya man.

⁹Itepulu yamùk uya Jason molopai tùulon kon kupùppù tok use'ma toppe pùlayatta ke tùnonka tok kon pe, molopai nen uchi tàwà tok uttà toppe.

¹⁰Asse'ne ewalupà pe iwenasak yau, ailon tawonnan uya Paul molopai Silas tawonnan yeunokoppù Berea pona. Tùwelepansak kon pe tok utàppù Jew yamùk wepilittok itak tak.

¹¹Molo kappon yamùk wechippù wakù pe ittunnan Thessalonica pon kon yentaino kon. Tok uya itekale yetappù màlà ànùttupai kulu tok wechippù, molopai wei kaichalà tok usenupappù màlà Katù Maimu pàk, Paul nekamappù wechi ailon pe kulu yentoppe tùuya'nokon.

¹²Tukke tok uya ailon teppù Jesus pàk tukkan kon tùnamasan Greek yamùk, nossan yamùk molopai kàyik yamùk.

¹³Tùse Jew yamùk Thessalonica pon kon uya itekale, Katù Maimu yekamappù Paul uya Berea po nàlà yetasak tùuya'nokon yau, tok uyàpùppù màlà motak molopai tok uya molon kon nà yaimelunpappù àsà pe tok wettoppe.

¹⁴Màlà yattai asse'ne Paul yeunokoppù ailon tawonnan uya palau pona, tùse Silas molopai Timothy tawonnan wechippù lùppù Berea po.

¹⁵Kàyik yamùk Paul yanài nan utàppù ya'là Athens pona. Molopai tok wennapoppù Berea pona Paul maimuppù pokonpe Silas molopai Timothy uyàtoppe ipyak asse'ne.

¹⁶Silas molopai Timothy tawonnan màmuku pàk tùwechi Athens po yau, Paul usewankono'mappù màlà tùulon kon katù yamùk pe tukaik ikonekasak kon ke pata wanùssak yene tùuya pàk.

¹⁷Màlàpàk Jew yamùk wepilittok itak tau Jew yamùk molopai Jew yamùk pen Katù namannan pokonpe tok uselupappù tùweseippàsse. Molopai makiti tau, wei kaichalà tùuyàssan pokonpe.

¹⁸Mùkyamlo Epicurean yamùk molopai Stoic yamùk enupan nan yeippàtùppù ya nàlà màlà. Tùulon kon uya, “Yà'là teiche ken uchi pùsàlà ittunài pen wechi màlà?” teppù. Tùulon kon uya tu'ma, “Katù yamùk tùulon pata yawon kon pàk ichelupa kasa man,” teppù. Tok uya wa teppù màlà masapùla Paul uselupa Jesus pàk molopai iwe'wuluukappù weli'nàtok yapai pàk, pàk.

¹⁹Màlàyau Paul nepùppù tok uya màlà wepili'nàtok patassek Areopagus itesek yak, molopai tok uya, “Ina ànùttupai man attalai sàlà emennak enupantok meselupayai'nùk ipàk.

²⁰Tùulon kon sàlà yamùk ina netayai'nùk nùsetayan ina neta pe pùla, molopai yà'là te ya là ànùttupai ina man,” teppù.

²¹Masapùla tamù'nawolon kon kappon yamùk Athens pon kon molopai kaklan yamùk molo tùwemassan mùkyamlo àko'manpai man yà'làlà emennak yekama pàk molopai yeta pàk nàlà.

²²Paul wà'mùssakkappù màlà Areopagus yamùk wepilichak yemloto po molopai: “Athens pon kon! Tamù'nawolon yawàlà katù yamùk naman nan pe eppai ewechi kon tenyaik.

²³Masapùla usalà apata kon yawàlà yau, tentai àwàpùlema kon patassek, molopai tepotai molo imenukasak, ‘Tùtusen pen Katù pàk,’ tawon. Mùkkàlà màpùlemayatài'nùk ipàk, ittu auya'nokon pùla là tùse, mùkkàlà yekama uya sàlà àpàkù'nokon,”

²⁴“Katù sàlà wolù molopai tamù'nawolon yau nai'nùk konekanàippù, mùkkàlà epùn molopai non tawon Yepulu, molopai kappon yamùk namùppù tapùi yamùk tau tùwemassen pen.

²⁵Màlà tùse pùla yà'làlà kappon nepoloppù tùwe'wotokomase iche tùwessen pen, masapùla wema'nàtok molopai we'netukkantok molopai tamù'nawolon tùnài pe tùwechi kappon yamùk yemyak pàk.

²⁶Tewinan kàyik winà tamù'nawolon kon kappon yamùk tùpatalo'nan kon konekappù ya. Molopai tok wemattoppe ikupùppù ya sàlà non po mailàlà. Tùmàlà pe tok wemattoppe màlà yattai ikupùppù ya molopai màlà pata kupùppù ya tok wemattok yau pe.

²⁷Sàlà kupùppù ya màlà tùwa toppe tok uya tappàttoppe molopai tepotoppe tok uya. Tùse Katù mùkkàlà meyon pen kùwinàpai'nokon.

²⁸Masapùla ‘Mùkkàlà yau tùwemassan kùmyamlo, tùwelaikasan, molopai talà tùwessan.’ Kaleta menukanài nan uya ‘Imunkà yamùk nàlà kùmyamlo,’ teppù kasa.

²⁹Imunkà yamùk pe we'nà'nokon pàk, Katù wechi kolù wapùla chilùpa, wapùla tàk là, kappon nùkonekappù tùnùttu yawàlà kasa iwechi pe yekama'nokon kùsettak.

³⁰Pena Katù uya màlà yenpàtùppù kappon yamùk uya ittu pùla iwechi yattai, tùse sàlà pe Katù uya tamù'nawolon kon kappon yamùk mailon kon nà là, welattàtoppe àli teselu kon winàpai yekamasak man.

³¹Masapùla tamù'nawolon kon kappon yamùk sàlà non pon kon ittutok tùuya wakù pe tùwettok yau yattai konekasak ya màlà, mùkkàlà kàyik tùnanùmùppù winà. Sàlà yenpoikappù ya màlà tamù'nawolon kon pàk, mùkkàlà kàyik wuluuka tùuya weli'nàtok yapai winà!” teppù Paul uya.

³²Paul uselupa we'wuluukantok weli'nàtok yapai pàk yeta tùuya'nokon yau, tùulon kon uya imottùnpappù, tùse tùulon kon uya, “Ina sàlà pàk euselupa tu'ma enetapai man,” teppù.

³³Molopai màlà Paul uya tok nàmàppù.

³⁴Tùulon kon kappon yamùk wenappù itonpa pe, molopai ailon teppù tok uya. Tok kùlottau Dionysius, Areopagus pon wechippù màlà molopai nossan Damaris itesek, molopai tùulon kon.