Read Patamona Yeunossak kon Wotokoyi 22 Bible Online

Yeunossak kon Wotokoyi 22 - Patamona bible

Yeunossak kon Wotokoyi 22

¹“Utonpa yamùk, Ukàipùnù yamùk, sàlà pe uwenai uselupa yetatàk kon!” tukaik.

²Hebrew maimu yau telupa kon ya yeta tùuya'nokon yau, eppana kulu tok wenappù molopai Paul uselupappù lùppù màlà:

³“Jew Iulà, iwentusak lùppù Tarsus Cilicia pon po, tùse ichemokkasak talà Jerusalem po, Gamaliel nenupappù. Kùtamo kon yamùk law yawàlà kulu, molopai Katù yemyak wettùsak kulu sàlà akasa'nokon sàlà pe.

⁴Kappon yamùk sàlà Wakù Itekale yeselu ku'nài nan talumattàppù uya màlà tok welikù ponalà. Kàyik yamùk molopai nossan yamùk yachippù uya màlà molopai tok tùlùppù uya patikichi tak.

⁵Eke kulu paatele molopai Jew yamùk Yepulu yamùk uya yekama màlà àpàkù'nokon ailon pe uselupa. Kaleta menukasak yamùk yepoloppù uya màlà tok winàpai, Jew yamùk ailon tawonnan Jesus pàk Damascus pon kon piyak. Màlàpàk utàppù miyalà Damascus pona tok yachise tok nettoppe Jerusalem pona tok taulonpàsse, tok talumattà toppe,” tukaik.

⁶“Utà yau Damascus winàkàik uyàpù tùse, inakattapailù wei wena pe akkwa kulu ulenpamùppù màlà asse'ne kaupai uyawàlà.

⁷Wekkawai'mappù non pona molopai mayin yetappù uya, ‘Saul, Saul! Yà'là pe ken uchi iwechi pàk utalumattà auya màlà?’ te ya upàk.

⁸‘Ànùk ken uchi àmàlà, uyepulu?’ tukaik yekamappoppù uya. ‘Jesus Iulà, Nazareth pon mùtalumattàyai'nùk,’ teppù ya upàk.

⁹Kàyik yamùk uya'lon kon uya akkwa yeneppù màlà, tùse tok uya uyelupanài maimu yetappù pen.

¹⁰Yekamapoppù uya màlà, ‘Yà'là kasa wechi Uyepulu?’ tukaik. Molopai Itepulu Jesus uya upàk, ‘E'wuluukakà, molopai itàkà Damascus pona, molopai molo tamù'nawàlà Katù nùkupùppù ànkupù pe yekama màlà àpàk,’ teppù.

¹¹Yene uya pùla iwechippù màlà, masapùla akkwa pe akkwa wechi pàk, màlàpàk uya'lon kon uya uyalàppù uyemyatù pàk Damascus pona.

¹²“Màlà pata yau kàyik wechippù màlà molo Ananias itesek, wakù, Katù pokonpe tùwemassen molopai law yawàlà tùwessen, Jew yamùk, Damascus pon kon nùnama.

¹³Iyàpùppù màlà upyak, molopai iweleutappù satippe upyau, ‘Utonpa Saul, yenkà tu'ma!’ teppù ya. Màlà yattai kulu yentukkappù uya màlà, molopai yeneppù uya.

¹⁴‘Kùtamo kon Katùyi uya ayanùnsak man teselu ittu pa, molopai wakù, ikasa tùwemassen yenepa molopai ichelupa yetapa,’ teppù ya upàk.

¹⁵‘Masapùla àmàlà wechi màlà yekamanài pe tamù'nawolon kon kappon yamùk pàk, màlà eneneppù molopai enetappù.

¹⁶Màlàpàk, yà'là pe iwechi pàk tachin pe ewechi màlà? E'wuluukakà, molopai esenpataukakà, molopai amakuyi wekolùka toppe Itepulu yesek yesakkà,’ ” teppù ya upàk.

¹⁷“Wennapoppù màlà Jerusalem pona molopai wàpùlema Katù yùwùk tau tùse we'neppà'nàtok walai yeneppù uya,

¹⁸màlà yau Itepulu yeneppù uya màlà, ‘Esemittàpakà, molopai Jerusalem inànkà asse'ne masapùla kappon yamùk talon kon nà uya uyekamatok auya yanùmù pen màlà,’ teppù ya upàk.

¹⁹‘Uyepulu, tok nùttuyan utàppù wepili'nàtok itak tak molopai ailon tawonnan àpàk yachippù uya molopai tok ippoppàtùppù uya,’ tukaik, imaimu yeikuppù uya.

²⁰‘Stephen eyekale yekamanài wànà yau molo wechippù màlà iche wettok kasa tok wechi pàk, molopai iwànài nan pon mainanpa pàk,’ teppù uya.

²¹‘Itàkà, eyeunoko uya sàlà mei Jew yamùk pen kùlottak,’ teppù ya upàk.

²²Kappon yamùk uya yetappù wateya ponalà, màlà tùpo tok wessa'molùppù tùwentaimepàtù kon pàk eke pe, “Yatàk kon! Iwàtàk kon! Iwemappù iche pùla we'nà man!” tukaik.

²³Tok wentaimepàtùppù màlà molopai tùpon kon woliuwoliumappù tok uya molopai non yenu'mapàtùppù tok uya kakàik.

²⁴Màlàpàk Roman, eke soicha yamùk yepulu uya Paul yatoppe yekamappù soicha yamùk yùwùk tak, molopai tok uya ippoppàttoppe ikupùppù ya, yà'là pe iwechi pàk Jew yamùk wentaimepàtù iwinàkàik ittutoppe.

²⁵Tùppoppàttoppe taulonpàssak tùse, Paul uya soicha yamùk yepulu satippe molo tùwessen pàk, “Ikasa ken na' iwechi màlà Roman pe tùse ippoppàtù, yà'làlà inkupùppù tùttuik pùla yau?” teppù.

²⁶Sàlà yetasak tùuya yau soicha yamùk yepulu utàppù Eke tepulu piyak molopai yekamappoppù ya, “Yà'là pe ewechi màlà? Mùkkàlà kàyik mùkkàlà Roman!” tukaik.

²⁷Màlàpàk eke soicha yamùk yepulu utàppù Paul piyak molopai yekamappoppù ya, “Yekamakà upàk, Roman na' àmàlà?” tukaik. “Ewaik,” tukaik Paul uya imaimu yeikuppù.

²⁸Eke soicha yamùk yepulu uya, “Eke pe pùlayatta ke tùuse'maik Roman pe wenappù màlà,” teppù. “Tùse Roman Iulà wentuppù motapai,” tukaik Paul uya yeikuppù.

²⁹Asse'ne kàyik yamùk Paul yekamappopà'nài nan woton kon utamappù iwinàpai, molopai eke soicha yamùk yepulu usenalipappù Paul wechi Roman pe ittusak tùuya yau molopai yaulonpàssak tùuya pàk.

³⁰Eke soicha yamùk yepulu wechippù yà'là pe là iwechi pàk Jew yamùk uselupa àli pe Paul winàkàik ànùttupai, màlàpàk iwemassak pe imùkka toppe ikupùppù ya molopai Jew yamùk Eke ton paatele yamùk yepulu ton molopai tamù'nawàlà Jew yamùk Yepulu yamùk wessepotoppe ikupùppù ya. Màlàyau Paul yalàppù ya tok yemlotopona.