Read Patamona Yeunossak kon Wotokoyi 23 Bible Online

Yeunossak kon Wotokoyi 23 - Patamona bible

Yeunossak kon Wotokoyi 23

¹Paul uya Jew yamùk Yepulu yamùk yeneppù, “Utonpa yamùk! Tùwanmùla uyewan man Katù yemloto po wemattok yau sàlà wei tepose,” teppù ya.

²Eke kulu paatele Ananias itesek uya satippe tùwessan Paul piyau kupùppù, iwàtoppe tok uya inta yai.

³Paul uya “Katù uya àwànà màlà. Àmàlà tùwetapansen! Chichiupe tùwessen upàk suwa messaik te pàk, law yawàlà, tùse law yawàlà pùla ewechi màlà tok uya uwàtoppe ikupù auya yau,” teppù Ananias pàk.

⁴Kàyik yamùk Paul piyau tùwessan uya, “Eke kulu sa' paatele mottùnpa auya màlà!” teppù.

⁵Paul uya tok maimu yeikuppù: “Eke kulu paatele pe iwechi ittu uya pùn, utonpa yamùk. Masapùla Katù Maimu uya watesak màlà, ‘Àli pe keselupatàu kappon yamùk yepulu pàk,’ tesak,” tukaik.

⁶Tukkan kon kappon yamùk wechi Sadducee pe molopai Pharisee pe ittusak tùuya yau, Jew yamùk Yepulu yamùk yelupappù Paul uya tùwentaimeik. “Utonpa yamùk, Pharisee Iulà, Pharisee yamùk mule. Talà wechi sàlà uyittu toppe masapùla iwelichak lùppù we'wuluukatok pàk enpen wechi pàk!” teppù ya.

⁷Asse'ne watesak ya yau, Pharisee yamùk molopai Sadducee yamùk wepyattàppù tùusàulàma kon pàk, molopai tok wepantakappù.

⁸Masapùla Sadducee yamùk wechi kappon yamùk we'wuluuka pen màlà weli'nàtok yapai, molopai inchelù yamùk pùla iwechi màlà, wapùla akkwalù yamùk pùla, tawonnan pe, tùse Pharisee yamùk uya ailon teppù tamù'nawolon pàk.

⁹Màlàpàk wentaimepà'nàtok wenappù eke peiwa, molopai Law pàk enupannan tonpa yamùk, Pharisee yamùk tonpa we'wuluukappù molopai tok yekamappoppù ya meluntà pe. “Iwalai pen yepolo kùuya'nokon pùla man pùsàlà kàyik yau! Yattai pùla Akkwalù wapùla Inchelù uselupappù pe iwechi màlà ipokonpe!” tukaik.

¹⁰Usàulàmantok wenappù màlà àsà pe. Molopai Eke Achin nan yepulu usenalipappù màlà Paul kalapàtù tok uya yeselùkek iwechi pàk. Màlàpàk soicha yamùk kupùppù ya tok utàtoppe tok kùlottak Paul yense molopai yatoppe tùuya'nokon soicha yamùk yùwuk tak.

¹¹Màlà yewalupàyi tau Itepulu Jesus wechippù màlà Paul piyau, molopai, “Kesenalipai, uyekamasak auya man talà Jerusalem po, molopai màlà kasa làma ikupù auya màlà Rome po,” teppù ya Paul pàk.

¹²Iwemassak pe Jew yamùk wessepoloppù tamùkke molopai tùnkupù kon woton konekappù tok uya. Katù yemlotopo wateppù tok uya “Ina uta'lettà pen màlà molopai yà'làlà inchi ina uya pen, Paul wàkapù tok uya ponalà,” teppù tok uya.

¹³40 yentai màlà tok wechippù sàlà konekan nan nùssan.

¹⁴Màlàyau tok utàppù eke paatele yamùk molopai eke ton tùnamasan piyak, “Sà kasa we'nà'nokon tesak ina uya man. Ina uta'lettà pen màlà Paul wàkapù tùuya'nokon ponalà,” teppù tok uya.

¹⁵“Màlàpàk amyamlo molopai Jew yamùk yepulu ton amaimu kon yeunotàk kon, Roman, eke soicha yamùk yepulu piyak, Paul nettoppe tok uya apyakù'nokon, molopai màlà yentak lùiwa yà'là là ànùttupai ewechi kon iwinàpai pe tukaik mesennakatàik. Tùse ina wekonekasak wechi màlà iwàtoppe tùuya'nokon sàlà yepolo ya wapiya,” teppù tok uya.

¹⁶Tùse Paul poitolù, ipachi mule uya iwànà màlà te yetappù, màlàpàk iitàppù soicha yamùk patassek yak molopai yekamappù ya Paul pàk.

¹⁷Màlàyau Paul uya soicha yamùk yepulu tonpa kà'mappù molopai ipàk, “Pùsàlà umoine yakà eke eyepulu piyak, ipàk inekama molo man,” teppù.

¹⁸Molopai yalàppù ya eke soicha yamùk yepulu piyak, “Yachisak Paul ukà'mai molopai uyekamappoi pùsàlà umoine nettoppe uya apyak, masapùla eyelupatok ya wechi molo pàk,” teppù ya.

¹⁹Eke soicha yamùk yepulu uya yalàppù itemyatù pàk, miya yalàppù ya tewincha molopai yekamappoppù ya, “Yà'là enekama molo nai upàk?” tukaik.

²⁰“Jew yamùk wekkussak man eyekamappo toppe tùuya'nokon ewanawà Paul ya toppe Jew yamùk Yepulu ton piyak, yà'là là iwalai ànùttupai Jew yamùk Yepulu ton wechi pe tukaik tùwetapamùi'ma'nokon,” teppù ya.

²¹“Tùse tok kùsetai, masapùla 40 yentaino kon kàyik yamùk molo man, tùuso'namù woton kon imàmuku pàk, iwànà tùuya'nokon ponalà. Tok uya, ‘Tàwà Katù uya ina pa'nùppù màlà sàlà kupù ina uya pùla iwechi yau. Ina uta'lettà pen màlà molopai yà'làlà inchi ina uya pen Paul wànà ina uya ponalà,’ tesak man. Tok wekonekasak man sàlà pe ikupù pàk molopai yà'là tesak là auya màmuku pàk,” teppù ya.

²²Eke soicha yamùk yepulu uya, “Upàk sàlà yekamasak auya kùsekamai ànù'là pàk,” teppù, molopai umoine yeunokoppù ya.

²³Màlàyau asa'là soicha yamùk yepulu yamùk kà'mappù ya, “200 pe soicha yamùk yepokà Caesarea pona tùutà woton kon, 70 pe kawale yesak ton molopai 200 pe tùpple ke'nan kon molopai ekonekatàk kon iitàtoppe 9 o'clock ewalupàttau.

²⁴Kawale yamùk yepotàk kon Paul wettok ipo woton kon, molopai yatàk kon wakù pe nulà Kopùna Felix piyak,” teppù ya.

²⁵Màlàyau Eke soicha yamùk yepulu uya kaleta menukappù sà kasa:

²⁶“Iulà, Claudius Lysias, kaleta menukayan tùnamasen Kopùna Felix piyak. Wakù pe na' messan?

²⁷Jew yamùk uya pùsàlà kàyik yachippù molopai iwànàiwappù tok uya. Roman pe iwechi ittuppù uya, màlàyau soicha yamùk pokonpe utàppù imokkase.

²⁸Yà'là pe là iwechi pàk àli pe tok uselupa ipàk ànùttupai wettai, màlàpàk Jew yamùk Yepulu ton piyak yalàppù uya.

²⁹Màlàyau yà'làlà iwalai pen kussak ya pùla iwechippù, tùwelittok pe itepeppù pe wapùla patikichi tak tùtùtoppe. Tùse ittuppù uya àli pe uselupantok iwinàkàik wechi usekamappopà'nàtok pe neken, tok law pàk.

³⁰Iwànà pàk Jew yamùk wekkupù yekamasak upàk yau, tewinanpa teunottai apyak. Ipàk tùuselupasan pàk, iwinàkàik àli pe tùuselupatok kon nettoppe eyemloto pona .

³¹Màlàyau soicha yamùk uya tùnkupù kon kupùppù màlà. Tok uya Paul yalàppù, màlà yewalupàyi tau Antipatris pona:

³²Iwemassak pe soicha yamùk wennapoppù tùpatassek kon yak, molopai kawale yesak ton nàmùppù tok uya, ya'là tùutàsan pe.

³³Tok uya yalàppù Caesarea pona, molopai kaleta imenukasak lùppù tùlùppù tok uya Kopùna yemyak molopai Paul tùlùppù tok uya itemyak.

³⁴Kopùna uya kaleta yeneppù molopai Paul uyàsak i'nai là pata yapai yekamappoppù ya, Cilicia poino pe iwechi ittusak tùuya yau,

³⁵“Eyeta uya màlà ewinàkàik tùuselupasan welepansak yau,” teppù Kopùna uya. Màlàyau Herod patassek yau Paul wettoppe tennài ke ikupùppù ya.