Read Patamona Yeunossak kon Wotokoyi 24 Bible Online

Yeunossak kon Wotokoyi 24 - Patamona bible

Yeunossak kon Wotokoyi 24

¹5 pe wei tùpo Eke kulu paatele yepulu Ananias itesek utàppù Caesarea pona, tùnamasan eke ton tonpa yamùk molopai tok ponaloppe tùuselupasen Tertullus pokonpe. Tok wechippù Kopùna Felix itesek yemloto po. Molopai Paul winàkàik tok uselupappù.

²Màlà tùpo Paul kà'mappù màlà molopai Tertullus wepyattàppù Paul pàk tùuselupa pàk sà kasa: “Tùnamasen kulu Felix! Pukkek pe ewettok uya tachin pe wema'nàtok echitonpa pe nessak man ina ponaloppe, molopai tukke iche we'nàtok kon kussak auya man kùpata wettoppe wakù pe.

³Ina sàlà yanùnnài nan tùutauchinpaik, mailàlà molopai tàwàlàlà.

⁴Tachin pe kulu eweyu ananùnpai pùla wessaik, màlàpàk eyekamappo uya sàlà wakù pe ewechi pa molopai ina nekama yeta pa malalà.

⁵Pùsàlà kàyik ittusak ina uya man, àli sa'molùkanài pe. Utaimelunpantok sa'molùkasak ya màlà Jew yamùk kùlottau tamù'nawàlà wolù polo, molopai Nasalin yamùk tukaik tesassan yepulu mùkkàlà.

⁶Katù yùwùk kopoiche nàlà nettai molopai ina nachitai. [Mùkkàlà ànùttupai ina wechippù ina law winà.

⁷Tùse eke soicha yamùk yepulu Lysias uyàpùppù, imokkappù ya ina winàpai àsà pe.

⁸Màlàyau iwinàkàik tùuselupasan uyàttoppe eyemlotopona ikupùppù ya.] Pùsàlà kàyik yekamapposak auya yau, àmàlà pe tamù'nawolon ittu auya màlà iwinàpai, ina uselupatok kon iwinàkàik,” tukaik.

⁹Jew yamùk uya nàlà Paul winàkàik, “Tamù'nawolon inekama màlà iwalai,” teppù.

¹⁰Màlàyau Kopùna uya Paul uselupa toppe ikupùppù, molopai Paul uya wateppù, “Tùttuyaik sà kasa messaik tawon pe ewechippù sàlà pata yau tukke kilichimochi, molopai utauchinpayaik uselupa pàk uwenai eyemloto po.

¹¹Ànùttupai ewechi kon yau, utàppù màlà 12 pe wei yentai pùla Jerusalem pona Katù yapulàse molopai inamase.

¹²Jew yamùk uya ànù'là pokonpe usàulàma yepoloppù Katù yùwùk tau pen, wapùla kappon yamùk yaimelunpa uya yepoloppù pen tok wepilittok itak tau, wapùla i'nailàlà Jerusalem po.

¹³Wapùla tùuselupatok kon uwinàkàik yenpoikatok tok uya ailon pe pùla iwechi màlà sàlà pe.

¹⁴Sàlà yekama uya àpàk: Ina tamo yamùk Katùyi namanài Iulà, molopai yapulànài Iulà, màlà Wakù Itekale Yeselu yawàlà tùwesse, màlà iwalai pen tetok tok uya. Tùse ailon tawon nàlà Iulà tamù'nawolon Law pàk molopai Katù Maimu yenpoikannan kaletayi pàk.

¹⁵Enpen we'nàtok Katù pàk yesappe wessaik, pùsamlo wettok enpen walai làma tamù'nawàlà kappon yamùk asakklàma wakù molopai àli we'wuluuka weli'nàtok yapai pàk.

¹⁶Màlàpàk wakù pe esuken usenumenkatok kupùiche tùwessen Iulà tàwàlàlà, Katù molopai kappon yamùk yemloto po.

¹⁷“Tukke kilichimochi Jerusalem po pùla wemappàtù tùpo, utàppù màlà motak pùlayatta yalàppù uya entuppa'nokon ponaloppe molopai untùlù tùse Katù ponaloppe.

¹⁸Sàlà kupù uya tùse uyepoloppù tok uya màlà Katù yùwùk tau, wekolùkantok yawàlà wettok yenuka'nàppù uya tùpo. Tukkan kon kappon yamùk pùla iwechippù màlà upyau, molopai utaimelunpantok pùla.

¹⁹Tùse Asia pon kon tonpa Jew yamùk wechippù màlà molo; mùkyamlo làkku nen uyàpù màlà eyemlotopo eselupase, yà'làlà uwinàkàik tùuselupatok kon wechi molo yau.

²⁰Wapùla tàwà pùsamlo kàyik yamùk talà nai'nan nùk nekamai, yà'là yekkwa àli kussak uya yepoloppù tùuya'nokon, Jew yamùk yepulu ton yemloto po wechi yau.

²¹Tùse tewin neken, wateppù uya Jew yamùk Yepulu ton yemloto po echii'ma: ‘Sà kasa messaik mùkapàssatàik sàlà pe ailon tawon pe wechi pàk iwelichak we'wuluuka weli'nàtok yapai pàk!’ ” teppù uya.

²²Màlàyau Felix, Wakù Itekale Yeselu ittunài uya tetasen yakkoloppù, “Unkuppù yekama uya màlà eke soicha yamùk yepulu Lysias itesek uyàssak yau,” teppù ya tok pàk.

²³Soicha yamùk yepulu, Paul yesappe tùwessen kupùppù ya, yentoppe ya, tùse tùyiwalà Paul wettoppe ikupùppù ya molopai itonpa yamùk uya iche kulu iwettok yepotoppe.

²⁴Tachin pe kulu tùpo pùla Felix uyàpùppù tùnoppù Drusilla pokonpe. Jew pe inoppù wechippù. Paul uyàttoppe yekamappù ya molopai ichelupa yetappù ya ailon tetok Jesus Christ pàk, pàk.

²⁵Tùse Paul wechi tùuselupa pàk lùppù ikasa we'nàtok pàk, iwalàwannà esak pe, molopai Katù piyak wepili'nàtok ittuntoppe ya pàk tùse, Felix usenalipappù màlà. Màlàyau, “Itàkàichi àkà'ma tu'ma uya màlà, àkà'matok uya yattai yeposak uya yau,” teppù.

²⁶Màlà yattai nàlà Paul uya tùlepa pùlayatta ke pe tekamaik enpen iwechippù màlà; màlàpàk ikà'mapàtùppù ya echipalà molopai ichelupappù ipokonpe.

²⁷Asa'là kilichimochi tùpo, Porcius Festus uya Felix patassek yanùmùppù. Kopùna pe iwenappù. Felix wechippù tùwakùli kon pe Jew yamùk uya tùkupù iche. Màlàpàk Paul yempakkappù ya pen patikichi tapai.