Read Patamona Yeunossak kon Wotokoyi 8 Bible Online

Yeunossak kon Wotokoyi 8 - Patamona bible

Yeunossak kon Wotokoyi 8

¹Saul wechippù màlà mùkyamlo Stephen wànà pàk iwàtàk tawonnan kùlottau. Màlà wei yattai àsà talumattàntok wepyattàppù sochi tawon kon Jerusalem po winàkàik. Tamù'nawàlà ailon tawonnan wetta'nùsak wechippù màlà pata Judea molopai Samaria tawon yawàlà, tùse yeunossak kon neken wechippù Jerusalem po.

²Tùulon kon wakù ton kàyik yamùk uya Stephen u'nattàppù, tok kalawùppù eke pe tùwentaimepàse.

³Tùse Saul wechippù sochi mattanùpùiche. Tapùi kaichalà tùutà pe ailon tawonnan wolopàtùppù ya asakklàma kàyik yamùk molopai nossan yamùk molopai tok tùlùppù ya patikichi tak.

⁴Ailon tawonnan iwetta'nùssak kon utàppù mailàlà itekale yekama pe.

⁵Philip utàppù màlà pata Samaria yak molopai Christ yekale yekamappù ya tok pàk molo.

⁶Tukkan kon kappon yamùk uya Philip nekama yetappù. Molopai yà'làlà tensan yek pen yamùk kupù ya yene tùuya'nokon yau tamù'nawolon kon wechippù iichelupa enetapai.

⁷Àli ton akkwalù yamùk wepakkappù tukkan kon kappon yamùk yapai eke pe tùwentaimepàtù kon pe. Tukkan kon iitokkassak kon molopai tùusasan pen kappon yamùk uchipittàpàtùppù nàlà.

⁸Molopai molo eke pe utauchinpantok wechippù màlà pata yau.

⁹Màlà pata yau piyassan walai kàyik wemapùppù màlà Simon itesek. Mùkkàlà uya kappon yamùk Samaria pon kon yenumenkasak wechippù yà'làlà kuttok tùuya ke. Ànù'là eke, pe tukaik iwekkupùppù.

¹⁰Molopai tamù'nawolon kon màlà pata yawon kon, eke ton nà molopai echikili ton nà uya Simon yetappù i'napailà kulu. “Katù meluntàlù mùkkàlà, tùttusen ‘Eke Meluntà’ pe,” teppù tok uya.

¹¹Tok yenumenkasak ya wechippù màlà tachin pe piyassan kasa tùwettok ke molopai tok wepilippàtùppù ipyak.

¹²Tùse ailon tesak tùuya'nokon Philip nekama Wakù Itekale Katù wettok Itepulu pe molopai Jesus Christ yesek pàk yau, tok usenpataukappù màlà asakklàma kàyik yamùk molopai nossan yamùk.

¹³Simon uya nàlà ailon teppù. Molopai tùusenpatauka tùpo mei pùla Philip piyau iwechippù. Molopai ichenumenkasak wechippù, yà'làlà tensan yekkwa ton pen wakù ton wekkupù yene tùuya pàk.

¹⁴Yeunossak kon Jerusalem pon kon uya kappon yamùk Samaria pon kon uya Katù Maimu yanùnsak yetappù. Màlàyau tok uya Peter molopai John yeunokoppù tok piyak.

¹⁵Tùwelepansak kon yau, tok wàpùlemappù ailon tawonnan pona, Wakù Akkwalù yepotoppe tok uya.

¹⁶Masapùla Wakù Akkwalù uttàsak ànù'là pona pùla iwechippù molo. Tok usenpataukasak neken wechippù Itepulu Jesus yesek yai.

¹⁷Màlàyau Peter molopai John tawonnan uya temyatù kon nonkappù tok pona molopai tok uya Wakù Akkwalù yepoloppù.

¹⁸Simon uya, Wakù Akkwalù ke tok lepasak pe yeneppù, yeunossak kon uya temyatù kon nonkasak tok pona yau. Màlàyau Peter molopai John tawonnan lepaiche iwechippù pùlayatta ke.

¹⁹Molopai tok pàk, “Sàlà meluntà ke nàlà kùlepakà, ànù'là uyemyatù nonkatok uya ipona uya Wakù Akkwalù yepotoppe,” teppù ya.

²⁰Tùse Peter uya imaimu yeikuppù, “Tàwà àpùlayattayi nùmattai àpokonpe, masapùla Katù uya lepantok ye'ma auya pùlayatta ke pe yekamasak auya pàk!

²¹Apatassek woton pùla man ina wotokoyi yau, masapùla eyewan ikasa pùla man Katù yenu yau.

²²Elattàkà sàlà àli ikupù pàk ewekkussak nai'nùk winàpai molopai àpùlemakà Itepulu pàk, àpàk iichentuppa toppe, màlà kasa eusenumenkasak pàk.

²³Masapùla kùlùmà ke awanùssak tenyaik molopai makui poitolù pe messaik,” teppù ya.

²⁴Simon uya Peter molopai John tawonnan pàk, “Àpùlematàk kon tàwà upona Katù usentuppatoppe upàk sàlà yamùk meselupatàunùk wekkuppù upona tukaik,” teppù.

²⁵Tùuselupakapù kon molopai Itepulu maimu yekama tùpo, Peter molopai John tawonnan wennapoppù Jerusalem pona. Te'ma kon tawàlà tok uya Wakù Itekale yekamappù tukke pata yamùk Samaria pon kon yawàlà.

²⁶Itepulu inchelùyi uya Philip yelupappù, “Itàkà south winon asantak, wontaik yawolonnà Jerusalem poi Gaza pona tùutàsen tak,” tukaik.

²⁷Màlàyau Philip utàppù. Molopai Ethiopia pon yepoloppù ya te'ma tau. Pùsàlà wechippù màlà eke itepulu pe, Kuwin Candace itesek Ethiopia pon yemamin yesappe. Iitàppù màlà Jerusalem pona Katù yapulàse molopai inamase.

²⁸Tùwemeiku yau tùkanwa yau chichiu pe iwechippù Katù Maimu yenpoikanài Isaiah kaletayi yene pe iitàppù màlà.

²⁹Wakù Akkwalù uya Philip pàk, “Itàkà molopai mei pùla mechiik màlà kanau piyau,” teppù.

³⁰Philip utàppù aitun pe molopai Isaiah kaletayi yapai Katù Maimu yenei'ma yekama ya yetappù ya. màlàyau yekamappoppù ya. “Mùttuyan ken na' màlà mayin menyai'nùk?” tukaik.

³¹“Atta ken uchi ittu uya, tùse ànù'là uya neken yekama upàk yau ittu uya?” tukaik imaimu yeikuppù ya. Màlàyau Philip kà'mappù ya iwenuttoppe molopai iweleutatoppe tùpyak kanau yak.

³²Màlà Katù Maimu inene wechippù màlà sà kasa, “Iwàtoppe yasak kalinilu kasa iwechippù, kalinilu mule kasa eppana tùwessen tùppok yattà tùse iwechippù. Ichelupappù pen.

³³Iwekuli'ma yawà ikottùmappù tok uya. Ànù'là uya ipayan yekama pe pùla iwechi màlà, masapùla sàlà non po iwemattok wenukassak man,” tukaik.

³⁴Ethiopia pon itepulu uya Philip pàk, “Yekamakà upàk ànùk pàk Katù Maimu yepoikanài uya watesak sàlà, tùpàk ka'lù, wapùla tùulon pàk?” teppù.

³⁵Philip wessamolùkappù tùuselupa pàk; sàlà Katù Maimu Isaiah kaletayi yawon yapai tùpyattàse, Wakù Jesus yekale yekamappù ya màlà ipàk.

³⁶Asantawà tùutà kon pe tok uyàpùppù patassek tuna wettok yau yak, molopai Ethiopia pon itepulu uya, “Sàlà kunaik tuna. Yà'là uya ken uchi uyeleutanùpù usenpataukatok winàpai?” teppù.

³⁷Philip uya wateppù ipàk, “Eusenpataukaichi màlà ailon te auya tamù'nawàlà eyewan ke yau,” teppù ya. “Ailon ukayaik, Jesus Christ wechi Katù Mumu pe pàk,” tukaik imaimu yeikuppù ya.

³⁸Ethiopia pon itepulu uya tùkanwa weleuta toppe ikupùppù molopai asakklàma Philip molopai Ethiopia pon itepulu tawonnan uttàppù tuna kak, molopai Philip uya yenpataukappù.

³⁹Tuna kapai tok wepalùkasak yau, Itepulu Yakkwalù uya Philip yalàppù. Ethiopia pon itepulu uya yentu'mappù pen, tùse iitàppù te'ma tawà tùutauchinpa pe.

⁴⁰Philip usenpoikappù màlà Azotus po; molopai itàppù màlà tamù'nawàlà pata yawàlà Wakù Itekale yekama pe, tùwelepamù Caesarea pona ponalà.