Read Patamona Romans 1 Bible Online

Romans 1 - Patamona bible

Romans 1

¹Sàlà kaleta nùyàssan apyakù'nokon Paul winàpai. Mùkkàlàichi mùkkàlà Jesus Christ yapyoto molopai yeunossak lùppù. Inanùmùppù mùkkàlà molopai inkà'mappù Wakù Itekale tùponalok yekamatoppe ya.

²Wakù Itekale tùlù uya màlà teppù màlà pena Katù uya tùmaimu yenpoikannan yai, molopai imenukappù màlà Wakù Katù Maimu yau.

³Sàlà Wakù Itekale màlà Imu, kùyepulu kon Jesus Christ yekale. Kappon pe tùwechi yau David pa pe iwechippù.

⁴Tùse Wakù Akkwalù uya Jesus, Katù Mumu wechi meluntà yesappe yekamasak, weli'nàtok yapai iwe'wuluukasak winà. Jesus Christ kùyepulu kon.

⁵Mùkkàlà yai màlà Katù uya ukupùppù tùneunoko pe, Christ yesek pàkànsau, kappon yamùk tamù'nawolon pata yamùk yawolon kon Jew yamùk pen nà nen yatoppe uya ailon tetoppe tok uya, molopai Katù Maimu yawàlà tok wettoppe.

⁶Amyamlo nàlà mùkyamlo tok tonpa Katù nùkà'massan Jesus Christ ponalok kon pe.

⁷Màlàpàk kaleta menuka uya sàlà tamù'nawàlà apyakù'nokon Rome pon kon Katù nù'nùnma ton molopai inkà'massan esuken tùwessan pe. Tàwà Katù Kùkàipùnù kon molopai Kùyepulu kon Jesus Christ elepai'nokon wakù pe we'nàtok molopai echitonpa pe we'nàtok ke.

⁸Wapiya, tenki tawon Iulà ukàipùnù Katù pàk Jesus Christ yai, tamù'nawàlà àpàkànsau'nokon. Masapùla tamù'nawolon kon wolù yawon kon kappon yamùk uya ailon tetok auya'nokon yekale yetasak pàk.

⁹Katù uya yekama màlà wa ukayai'nùk wechi ailon pe, mùkkàlà iponaloppe we'wotokomatok tamù'nawàlà uyewan ke Imu yekale yekama pàk. Eyittu kon uya tàwàlàlà wàpùlema yattai'ne.

¹⁰Katù tekamappoyaik tàwàlàlà, akakklanpatok kon uya yattai ke ulepatoppe teselu yau.

¹¹Masapùla eyenpai'nokon kulu wessaik wakù Katù winàpaino pùlemantok ke elepatok kon pe uya Katù Yakkwalù yai meluntà pe ewena kon pa.

¹²Suwa te uya nai'nùk, asak essattai amyamlo molopai Iulà tukaik we'meluntàpantok kon pe ekkaichalà, ailon tetok uya winà molopai ailon tetok auya'nokon winà.

¹³Sàlà mùttutàik utonpa yamùk, tukke itekkwa akakklanpa kon uya tepàssak uya man. Tùse utàtoppe pùla yà'làlà uwakkà'nài. Àkklottau'nokon kappon yamùk ànpùikattàpai wechippù tok uya nàlà ailon tetoppe, tùulon kon Jew yamùk pen kùlottau ikupùppù uya kasa.

¹⁴Masapùla tùttuyaik, tamù'nawolon kon kappon yamùk pùikattàtok uya pe iwechi màlà, Greek yamùk molopai Greek yamùk pen, pukkek ton molopai pakko ton.

¹⁵Màlàpàk àpàkù'nokon nàlà Wakù Itekale enekamapai kulu wessaik amyamlo Rome po tùwemassan.

¹⁶Masapùla wekkuli'ma pùla man Wakù Itekale pàk. Masapùla Katù yapàikketù màlà tamù'nawolon kon ailon tawonnan tùpàk pùikattànài, wapiya Jew yamùk molopai nàlà Jew yamùk pen.

¹⁷Masapùla Wakù Itekale màlà Katù uya kappon yamùk yanùmù ikasa tùpokon pe yekamanài. Ailon tetok yawolon neken màlà, iwepyattàtok motapai iwenukapù ponalà. Katù Maimu uya, “Mùkkàlà iwekonekasak lùppù ikasa Katù pokonpe ailon tetok yai wemapù màlà,” te kasa. {Hab 2.4}

¹⁸Katù we'naikatok usenpoikasak man epùn winàpai. Iyàssak màlà tamù'nawolon àli ton molopai àli pe kappon yamùk wettok pona, mùkyamlo àli pe tùwettok kon yeselu ke ittutoppe pùla ailon wakkàssai'nannùk pona.

¹⁹Tùttusen yeppe Katù yekale yekamasak màlà kappon yamùk pàk. Katù uya màlà yenpoikasak tok pàk.

²⁰Tùwenukassen pen màlà Katù yapàikketù molopai iteselu tùusensen pen. Tùse wolù konekappù motapai, Katù uya yà'là kasa là sàlà yamùk wechi yenpoikasak màlà tamù'nawolon tùnkonekappù winà. Màlàpàk mùkyamlo kappon yamùk we'waputàtok pùla iwechi màlà.

²¹Katù ittunnan mùkyamlo, tùse yapulàtok molopai inamatok iponalok tùnnan pen. Tenki tawonnan pen mùkyamlo. Tok usenumenkatok wenasak màlà itenpù pe. Molopai tok usenumenkatok wenasak pakko pe molopai ewalupà pe.

²²Pukkek pe tiuchittusan tùse pakko ton.

²³Tùwelichen pen Katù yapulànnan pen mùkyamlo molopai inamannan pen, yà'làlà ikonekasak kon kappon tùwelichen kasa, tolon yamùk kasa, kamo yamùk kasa molopai ululu pe tùusasan kasa, màlà yapulànnan mùkyamlo.

²⁴Màlàpàk Katù uya tok tùsak màlà àli ton tewan kon wettok ànkuppai kuttoppe tok uya. Molopai àli ton kuli'mannan ku'nài nan mùkyamlo tùke'nokon tùtonpa kon pokonpe.

²⁵Ailon Katù yekale nonkannan mùkyamlo kasei pàkànsau. Màlà Katù nùkonekappù ponaloppe tùwe'wotokomasan, tùwepeimasan mùkyamlo yapulà pe, Katù làkku màlà yamùk konekanàippù tapulàik molopai tùnamaik pùla, mùkkàlà tàwàlàlà tapulàsen pe nai'nùk woton! Emen.

²⁶Kapon yamùk nùkupù wenai Katù uya tok nonkasak màlà, kuli'manài àli ànkuppai tok wettok tùke'nokon kuttoppe tok uya. Molopai nossan yamùk uya nàlà ikasa tesak kon yapulàtok tùuya'nokon mùyakanmappù àli pe yapulàtok yak.

²⁷Màlà kasa làma walawotichi yamùk uya ikasa nossan yamùk yapulàtok nonkappù molopai tok uya àli ànkuppai kulu tùwettok kon tùke'nokon kupù tùwalai nokon pokonpe. Walawotichi yamùk wechi walawotichi yamùk pokonpe tùwekuli'mase pùla, molopai màlà yepeppù pe wettalumatàntok yepolo tok uya màlà ikasa pùla kulu tùwessak kon wenai.

²⁸Màlà pe neken pùla kappon yamùk uya Katù tùttuik we'nàtok yekale nulunpasak tanùnse pùla pàk, tok tùsak ya màlà àli pe tok usenumenkantok yemyak, àli ton tùnkupù kon pen kuttoppe tok uya.

²⁹Yà'là yekkwa ton nà àli pe we'nàtok kon yeselu ke tok wanùssak màlà, i'napailà imakuyippù pe we'nàtok, tùuseka'nonkaik we'nàtok ke, molopai kùlùmà ke, e'wàpai we'nàtok ke, wepanta'mantok ke, àsà pe we'nàtok ke molopai ennakantok etapankà tawonnan. Tùulon pantomù pàk tùuselupasan mùkyamlo.

³⁰Àli pe tùuselupasan tùtonpa kon pàk yeta ya pùla, Katù yeya'nomannan. Yà'làlà ànkuppai nokon tùyiwalà'nokon teselu kon yawà, tùtonpa kon yentai tùwekkussan molopai tamù'nawolon ittunài pe tukaik tùwekkussan, àli kuttok yawàlà woton kon pàk tùusenumenkasan, tùsan kon, tùkàipùnù kon maimu yawolon kon nà pen.

³¹Pakko ton, ikupù tùuya'nokon teppù tùuya'nokon lùppù ku'nàinan pen, tùusentupasan pen molopai àsàpe tùuselupasan.

³²Àliton eselu yamùk wenai Katù uya weli'nàtok ke talumattàntok yekale ittui'ma, tok wechi lùppù sàlà yamùk kupù pàk, molopai tùulon kon meluntàpannan mùkyamlo tok uya nàlà ikuttoppe.