Read Patamona Romans 10 Bible Online

Romans 10 - Patamona bible

Romans 10

¹Utonpa yamùk, uyewan wettok iche kulu mà màlà utonpa yamùk Israel yamùk wepùikattà tà. Tùwàpùlemasen Iulà tok pona.

²Ittu uya màlà Katù ponaloppe pe kulu emappai tok wechi tùse tok uya ittu pùla iwechi nai'nùk.

³Yà'là uya là Katù nanùmù yeppe kappon kupù ikasa ipokonpe ittusak tok uya pùla iwechippù, molopai tùyiwalà'nokon ikasa ekonekapai tok wechippù. Màlàpàk uchi tà Katù uya ikasa kappon yamùk kuttok yawà yanùmù tok uya pen.

⁴Masapùla ailon pe Law nekama wechi ittunan kùmyamlo Christ yau, tamù'nawolon kon ailon tawonnan tùpàk nen uchi wettoppe yanùnsappe ikasa Katù pokonpe.

⁵Sàlà uchi màlà Moses nùmenukappù ikasa anùnnàtok Katù pokonpe Law maimu yawàlà we'nàtok winà pàk, “Kappon Law wettok iche ku'nài wemapù màlà imaimu yawàlà,” {Lev 18.5}.

⁶Tùse sàlà uchi màlà wa teppù lùppù ikasa anùnnàtok Katù pokonpe ailon tetok yai pàk. Eyewan kon yau uchi, ànùk utà epùn pona kùkatàu Christ nesse non pona, te ya.

⁷“Ànùk utà ken i'nak non yak?” kùkatàu nàlà, {Deu 30.13} Christ nesse weli'nàtok yapai, te ya. {Deu. 13}

⁸Sàlà uchi màlà wa tetok ya, “Itekale mei pùla man, antau'nokon molopai eyewan kon yau,” {Deu 30.14}. Màlà ailon tetok yekale ina nekamayai'nùk, te ya pe iwechi.

⁹Anta kon ke, “Chirst wechi Itepulu pe,” yekama auya'nokon molopai ailon te auya'nokon eyewan kon yau Katù uya iwuluukappù weli'nàtok yapai pàk yau, ewepùikattà kon màlà.

¹⁰Masapùla ailon tawonnan kùmyamlo kùyewan kon yau molopai ikasa kùyanùnsak kon man Katù pokonpe. Kùnta kon ke àli pe we'nàtok yekamannan kùmyamlo Katù pàk molopai wepùikattànsakù'nokon man.

¹¹Masapùla Katù Maimu uya, “Ànù'là ailon tawon ipàk wekkuli'ma pen màlà,” te màlà. {Isa 28.16}

¹²Masapùla tùpatalà we'nàtok pùla iwechi màlà Jew yamùk molopai Jew yamùk pen kùlottau. Katù mùkkàlà, mùkkàlà lùppù tamù'nawolon kon Yepulu, molopai eke pe tamù'nawolon kon tesek yesà'nàinan lepanài.

¹³Masapùla, “Tamù'nawolon kon Itepulu yesek yesa'nàinan wepùikattà màlà.” { Joel 2.32}

¹⁴Tùse atta ken tok uya itesek yesatù ailon tesak tùuya'nokon ipàk pùla echii'ma? Molopai atta ken ailon te tok uya ipàk, itekale yetasak tùuyanokon pùla echii'mai? Molopai atta ken tok uya yeta, itekale yekama ànù'là uya pùla là tùse?

¹⁵Molopai atta ken uchi itekale yekama, itekale yekamannan yeunossak pùla iwechi tùse? Katù Maimu uya, “Wakù kulu màlà Wakù Itekale ne'nàinan pùta!” te màlà. {Isa 52.7}

¹⁶Tùse tamù'nawolon kon uya Wakù Itekale yanùnsak pùla iwechi màlà. Isaiah uya suwa teppù, “Uyepulu Katù, ànùk uya ken ailon tesak nai ina yekale pàk?” {Isa 53.1}

¹⁷Màlàpàk uchi ailon tetok màlà tùuyàssen itekale yeta winà, molopai itekale tùuyàssen Christ yekama yai.

¹⁸Tùse tekamappoyaik, ailon ken na' màlà tok uya itekale yetappù pùla iwechi? Ewaik, tok uya yetappù. Katù Maimu uya “Tok maimu utàppù màlà tamù'nawàlà wolù yawàlà, tok maimu utàppù tamù'nawàlà non pon kon piyak,”te kasa {Psa 19.4}

¹⁹Molopai tu'ma tekamappoyaik, Kappon yamùk Israel pon kon uya ken na' ituppù pen? Moses uchi mùkkàlà wapiyalok yei'nài, “Àkùlùmàlunpa kon uya màlà kappon yamùk kulu pen kappon yamùk pàkànsau. Asakolopa kon uya ittunnan pen kappon yamùk ke,” {Deu 32.21}.

²⁰Molopai Isaiah uya tùwe'namaik pùlà, “Uyiwannan pen uya uyepoloppù màlà. Uyekamapponnan pen piyak usenpoikappù màlà, ” {Isa 65.1}

²¹Tùse Israel pàk, “Uyemyatù yenkappù uya màlà wei tùko'mankaik mayin yawolon kon pen molopai tùyiwalà'nokon eppai nokon kappon yamùk winàkàik.” {Isa 65.21}.