Read Patamona Romans 11 Bible Online

Romans 11 - Patamona bible

Romans 11

¹Tekamappoyaik uchi, Katù uya ken na' tùponalok kon kappon yamùk nulunpappù? Kanekku! Israel tonpa nen Iulà, Abraham pa, Benjamin winàpaino kon tonpa.

²Katù uya tùponalok kon kappon yamùk nulunpasak pùla man, mùkyamlo inanùmùsan iwepyattà motapai. Mùttuyatàik Katù Maimu uya màlà Elijah uya Katù pawanattàppù Israel winàkàik.

³Molopai “Uyepulu, amaimu yenpoikannan wànàppù tok uya molopai àponalok lepantok patassek yalakkappù tok uya, molopai Iulà neken uchi mùkkàlà iwà'nànsak lùppù, molopai uwànàiche tok man,” tukaik. {1Ki 19.10}

⁴Yà'là tukaik ken Katù uya yeikuppù? “7,000 pan kon kappon yamùk kussak uya man uponaloppe ailon pen tùulon katù Baal itesek yemloto po iwepeimasak kon pen,”tukaik uchi. {1Ki 19.18}

⁵Màlà kasa làma uchi man sàlà pe. Tukkan kon kulu pen molo man Katù nanùmùssan tùusentuppatok pàkànsau.

⁶Anùnnàtok ya màlà ichentupatok yaino, kappon nùkupùppù yentakan pen. Masapùla Katù uya anùnnàtok wessak kappon nùkupùppù winà yau, ichentuppatok wechippù ailon pe usentuppantok pe pùla eppaino sàlà.

⁷Yà'là nen ken uchi? Israel uya tùnùwa kon yepoloppù pen màlà. Tukkan kon pen yeponnannùssan yanùmùppù Katù uya màlà, tok tonpassan tùulon kon wenappù panattàppe Katù uya tùkà'matok kon winàpai.

⁸Iwe'menukasak nai'nùk kasa, “Katù uya e'molonùppe tok wettoppe tok kupùppù. Màlàpàk sàlà tepose tok uya yene pùla iwechi tenu kon ke. Tok uya yeta pùla iwechi tùpana kon ke.” {Isa 29.10}

⁹Molopai David uya suwa te, “Tàwà uchi tok yeipa nelattài male yeipa pe molopai tok pùlannài pe, tàwà tok nekkawai'mai, tàwà tok talumattà nechii!

¹⁰Tàwà tok yenu newalumamài, tok uya yene yentai iwettoppe, molopai tok wettopppe tànài pe tàwàlà.” {Psa 69.22,}

¹¹Yekamappo uya sàlà, Jew yamùk wettatai'masak yau ken na' tok wekawai'mappù tùumattatok kon yak? Kanekku! Masapùla àli kussak tok uya pàk, wepùikattàntok uyàssak màlà Jew yamùk pen winàkàik, Jew pe nai'nùk kùlùmàluntoppe tok pàk.

¹²Jew uya àli kuttok uya eke kulu wakù pe we'nàtok nessak wolù yawon kon pona man. Molopai tok uya àli kuttok uya wakù pe we'nàtok nessak Jew yamùk pen pona man. Eke pe iwa wakù pe we'nàtok wechi màlà tamù'nawàlà Jew yamùk uyàssak yau nàlà!

¹³Eyelupayatàu uchi Iulà sàlàpe Jew yamùk pen. Jew yamùk pen piyak yeunossak pe wechi yawàlà uwotokoyi kupù uya sàlà tok ponaloppe.

¹⁴Masapùla utonpa yamùk ànkùlùmàlunpapa wessaik tok wepùikattàtoppe.

¹⁵Masapùla tok nulunpasak yau wolù yawon kon kappon yamùk wenappù màlà Katù pokonpe echiwechiyakonpe. Yà'là pe ken uchi iwechi tok yanùnsak yau? Iwelichak mùnappoka nulà we'nàtok yak kasaichi iwechi màlà.

¹⁶Masapùla pùlomù kloimasak pilikasak wapiya kul tùsak Katù piyak yau, tamù'nawolon tamonkenan wechi màlà iponaloppe esuken. Molopai yei mik tùsak Katù yemyak yau, yei panta yamùk nàlà màlà iponalok.

¹⁷Imainanpasak olive panta yamùk tonpa wekkwàtùppù man, molopai imainanpasak pen panta ki'masak man ipatappù yak. Amyamlo Jew yamùk pen wechi màlà imainanpasak pen olive yek kasa. Molopai nen uchi Jew yamùk meluntàlù molopai wakù wema'nàtok pùkkù pe ewechi kon màlà.

¹⁸Màlàpàk uchi mùkyamlo iwepantalùkkasak kon yei panta kasa nai'nannùk atalumayi kon pe kùkkuttàu. Ittutàk kon ipanta lùssan neken nen amyamlo, imik yachinnan pen amyamlo, ayachinài'nokon màlà imik.

¹⁹Tùse là, “Ewaik, tùse ipanta yamùk utakitukkappù màlà upatassek pe,” te auya'nokon.

²⁰Sàlà màlà ailon. Iitakitukkappù màlà masapùla ailon te tok uya pùla iwechi pàk, molo lùppù apatassek kon yau ewechi kon tùse ailon tesak auya'nokon pàk. Tùse katapulàtàu, tùse esenalippatàk kon làkkù.

²¹Masapùla Katù uya Jew yamùk kupùppù molo pùla iwessak yau màlà ipùkkù kulu yei panta walainon, moloichi ewechippù kon eppaino sàlà.

²²Imasa yentàk kon wakù pe molopai àsà pe Katù wechi. Àsà pe iwechi mùkyamlo iwepantalalùkasak kon pàk, tùse wakù pe iwechi àpàkù'nokon wakù pe iwettok ichentupatok yau lùppù ewechi kon yau. Tùse yau pùla ewechi kon yau amyamlo nàlà wepantalùka màlà.

²³Molopai Jew yamùk uya nàlà, ailon tukaik pùla tùwettok kon nonkasak yau, tok mùnapo màlà tok patappù yak, masapùla Katù mùkkàlà tapàikketù kenan tok mùnappotukkatoppe tùuya.

²⁴Amyamlo Jew yamùk pen mùkyamlo imainanpasak pen olive yek panta walainon molopai iwekkwàssak kon, molopai nen uchi, yei yeselu kasa pùla, imainanpasak olive yek pàk eki'masak kon. Jew yamùk mùkyamlo imainanpasak olive yek walainon molopai sa'man pe ma'le nen iwechi màlà Katù pona, pùsamlo Jew yamùk, iwekkwàsak kon yei panta ki'matukka yau imainanpasak olive yek pàk.

²⁵Tùttusen pen ailon molo man, utonpa yamùk, ittu auya'nokon iche wettok. Pukkeppe ewechi kon pe yekama auya'nokon tukaik àkupù kon ya màlà. Sàlà uchi màlà kappon yamùk Israel pon kon wettok sa'man pe itewan wechi tàwàlà tùwessen pe pùla. Tùse iche we'nàtok kaichalà Jew yamùk pen kùlottapai wessepolo Katù piyak ponalà neken iwechi.

²⁶Molopai sàlà kasa uchi tamù'nawàlà Israel yamùk wepùikattà màlà. Katù Maimu uya, “Pùikattànài uyàpù màlà Zion poi, tamù'nawolon àli pe we'nàtok yama ya màlà Jacob payan winàpai.

²⁷Ailon pe wechi màlà tok pàk molopai usentuppasak tok pàk,” te kasa {Isa 59.20, 21, Isa 27.9 Jer 31.33, 34}

²⁸Masapùla Wakù Itekale nulunpasak tok uya pàk, Jew yamùk mùkyamlo Katù yeyatonnon àpàkànsau'nokon, amyamlo Jew yamùk pen. Tùse Katù uya anùnnàtok pàkàlà, Katù wechiyakonnon mùkyamlo tok tamo yamùk pàkànsau.

²⁹Masapùla Katù mùkkàlà tùusenumenkatok mùyakanmanài pen ànùk yanùmù tùuya pàk wapùla ànùk lepatok tùuya mokkanài pen.

³⁰Amyamlo Jew yamùk pen, pena Katù Maimu yawàlà pùla ewechippù kon. Tùse sàlà pe Katù usentuppatok yanùnsak auya'nokon man, masapùla Jew yamùk wessak Katù Maimu yawàlà pùla pàk.

³¹Màlà kasa làma Katù usentuppatok yanùnsak auya'nokon pàk, Jew yamùk wechi Katù Maimu yawàlà pùla màlà, Katù usentuppatok yanùntoppe tùuya'nokon.

³²Masapùla Katù uya tamù'nawolon kon kappon yamùk kusak màlà mayin yawàlà pùla we'nàtok nachippù pe, tùusentuppatok yenpoikatoppe tùuya tamù'nawàlà tok pàk.

³³Tukkan kulu màlà Katù yemamin! Apàikeppe iwettok molopai pukeppe iwettok màlà eke kulu! Ànùk wechi ken ichenumenkatok ittuiche? Ànùk uya ken ite'mappù ye'mappùkapàtù?

³⁴Katù Maimu uya, “Ànùk ken Itepulu Katù usenumenkatok ittunài? Ànùk ken yenupanàippù? teppù {Isa 40.13}

³⁵Ànùk uya là ken Katù lepappù yà'làlà ke Katù nentakanma woton pe?” teppù {Job 41.11}

³⁶Masapùla tamù'nawolon yà'làlà iwekkussak lùppù wechi màlà iwinon pe, mùkkùlà yai molopai iponaloppe. Tàwà uchi apulàntok molopai namantok iponaloppe nechii tàwàlàlà. Emen.