Read Patamona Romans 12 Bible Online

Romans 12 - Patamona bible

Romans 12

¹Màlàpàk utonpa yamùk, Katù usentuppatok kùpàkù'nokon pàkàlà, apawanattàyatàu Iulà, Katù yemyak nulà, nulànan tùttusen Katù yemyak kasa ettùtàk kon iwotokoyi yak esuken molopai yauchinpanài yeppe. Sàlà uchi màlà ailon kulu namantok molopai yapulàtok àntùlù kon.

²Sàlà wolù yawon kon yeselu pàk làma kettàu, tùse tàwà Katù amyakanmatàu ayawà'nokon tamù'nawàlà eusenumenkatok kon wemyakanmatok winà. Màlà yattai nen uchi Katù yeselu ittu auya'nokon màlà, màlà wakù pe nai'nùk, molopai yauchinpanài pe nai'nùk, molopai màlà ikasa imaimu yailà neken nai'nùk.

³Masapùla Katù uya ulepatok wakù pàkànsau eyelupa kon uya sàlà. Ànù'là yentai ewechi kon pe kùsekamatàu. Tùse esenumenkatàk kon kulu molopai echittutàk kon esentàk ailon tetok auya'nokon Katù uya elepappù kon ike yawàlà.

⁴Tewin kùyesak kon wechi kasa, tùse tukkan ipùkkù molopai tamù'nawàlà ipùkkù pe tùwessan màlà tùpatalon kon iwotokoyi.

⁵Màlà kasa làma Christ yau màlà tukke we'nà tùse tewin itesak we'nà'nokon molopai tamù'nawolon kon tonpawannà yamùk wechi màlà pùkkùwannà pe.

⁶Katù uya lepansakù'nokon màlà tùpatalo'nan tapulàsan lepantok ke wakù pe tùwettok yawàlà. Kùlepatok kon wechi Katù Maimu yekamatok pe yau, ikuppai'nokon uchi màlà ailon tetok itesappe we'nà nai'nùk yawàlà.

⁷Tùulon kon yapyoto pe iwechi yau, tàwà ne'wotokomai. Enupantok pe iwechi yau enupanài pe nechiik.

⁸Ewan meluntàlùttànài pe iwechi yau, tàwà ewan meluntàlùttànài pe nechiik. Yà'là pùnon sa'ne lepanài pe iwechi yau tàwà ne'lepaik tùusàulàmaik pùla, ànù'là kappon apàikkeppe tùwessen, ne'wotokomai wakù pe, tùusentuppasen, nùkupùi tùutauchinpaik.

⁹Tàwà ailon pe kulu euchi'nùnmatok kon nechii, àli pe nai'nùk eyewanma kon pe, wakù pe nai'nùk kupù pàk ettàk kon.

¹⁰Echi'nùnmatàk kon eke pe tùuchinùnmaik we'nà Christ yau yenpoika pe kulu, molopai àtonpa kon tùnamaik ettàk kon.

¹¹E'wotokomatàk kon sa'man pe molopai emya'neppe kettàu. Itepulu Jesus ponaloppe e'wotokomatàk kon tùuweleutaik pùla tamù'nawàlà eyewan kon ke.

¹²Tàwà enpen ewettok kon àkuttàu tùutauchinpaik, ewettalumattàtok kon ipàlikatàk, molopai àpùlematàk kon tàwàlà.

¹³Yà'làlà pùla nai'nannùk Katù munkà tùmainanpaik ettàk kon, molopai kaklan yamùk yewonnùttàk àwùk kon tak.

¹⁴Atalumattànnan mùpùlematàik wakù ke tok mùpùlematàik tok kùppa'nùttàu.

¹⁵Matauchinpatàik tùutauchinpasan pokonpe, mesewankono'matàik tùusewankono'masan pokonpe.

¹⁶Echitonpa pe ettàk kon tamù'nawolon kon pokonpe. Ànù'là kappon yentai kekkuttàu, katapulàtàu, tùse entuppa'nokon yanùntàk kon ewechiyakon kon pe. Pukeppe ewechi kon pe kùsekamatàu.

¹⁷Ànù'là uya àli kupù ewinàkà'nokon yau, àli kùsentakanmatàu àli ke .Wakù pe tamù'nawolon kon nùttu kupùiche mettàik.

¹⁸Tamù'nawolon ànùttu kon wakù mùkuttàik tamù'nawolon kon kappon yamùk pokonpe echitonpa pe ewemapù kon pa.

¹⁹Kese'matàu, utonpa yamùk, tùse làkku tàwà Katù we'naikatok nùkupùi. Masapùla Katù Maimu uya, “Use'ma màlà, molopai e'mantok uya màlà upyawon te Itepulu Katù uya,” te kasa {Deu 32.35.}

²⁰Tùse làkku Katù Maimu uya, “Eyeyaton kon wechi iwan pe yau, mewettàik, iwe'nakklipasak yau mùwoppatàik. Masapùla sàlà kupù auya'nokon winà enkek apok yalàn pilipù auya'nokon màlà ippai pona,” te kasa. {Pro 25.21,22}

²¹Àli eyentaikatakù'nokon, tùse àli làkku mentaikatàik wakù ke.