Read Patamona Romans 15 Bible Online

Romans 15 - Patamona bible

Romans 15

¹Kùmyamlo meluntà pe nai'nannùk ailontetok yau, wechi màlà attu'mùn pùikattànnan pe molopai iche we'nàtok nokon neken kasa tùwessan pe pùla.

²Masaichi we'ma'nàpai'nokon, kùmàlà pe làkku kùyakontalù kon yenu yailà wema'nàpai'nokon wakù pe iponaloppe, meluntà pe iwenatoppe ailontetok yau.

³Masapùla Christ là wechippù iche tùwettok kasa pen màlà. Tùse iwe'menukasak nai'nùk uya, “Mottùnpantok àmottùnpappù lùppù ike mùkyamlo uya, wettùsak man upona,” te kasa. {Psa 69.9}

⁴Masapùla tamù'nawolon pena imenukasak lùssan màlà kùyenupatoppe ya imenukasak lùppù, pàlikantok molopai Katù Maimu uya ewan meluntàpatok yai enpen we'nàtok yepotoppe.

⁵Molopai tàwàchi Katù, pàlikantok molopai ewan meluntàpatok uyàttok iwinà, àkupùi'nokon esewan kaichalà Jesus Christ ya'là ewechi kon yawà,

⁶tewin itewan, tewin imaimu Katù Kùyepulu kon Jesus Christ Kàipùnù yapulàtoppe.

⁷Àtonpa kon yanùntàk kon, Christ uya ayanùnsak kon nai'nùk kasa Katù yapulàtok ipàkàlà pe.

⁸Masapùla tekamayaik àpàkù'nokon Christ wenappù mà Jew yamùk yattàsak kon yapyoto pe tà Katù wechi ailon pe yekama pe ikupù tùuya teppù lùppù tùnamasan Jew yamùk tamo yamùk pàk kusse ailon pe iwettoppe.

⁹Molopai Jew yamùk pen uya Katù yapulàtoppe ichentuppatok pàkàlà. Iwe'menukasak kasa, “Màlàpàk ayapulà uya màlà Jew yamùk pen kùlottau, eyesek yapulà pe elen kupù uya,” tukaik. {2Sa 22. 50, Psa 18.49}

¹⁰Molopai tu'ma, “Atauchinpatàk kon Jew yamùk pen. Katù nanùmùssan iponalok kon kappon yamùk pokonpe,”te ya. {Isa 11.10}

¹¹Molopai tu'ma, “Itepulu Katù yapulàtàk kon tamù'nawolon kon Jew yamùk pen, Itepulu Katù yapulàtàk kon tamù'nawolon kon kappon yamùk!” te ya. {Psa117.1}

¹²Molopai tu'ma Aichaya uya, “Jesse pa uyàpù màlà, iwuluuka màlà Jew yamùk pen yepulu pe iwettoppe, molopai enpen tok wechi màlà ipàk,” te. {Isa11.10}

¹³Tàwà uchi Katù enpen we'nàtok uyàttok iwinà ayanùkkai'nokon tamù'nawolon utauchinpantok ke molopai echitonpa pe we'nàtok ke, ailon te auya'nokon ipàk yawàlà, Wakù Akkwalù meluntàlù winà enpen ewettok kon yau meluntà pe kulu ewechi kon pa.

¹⁴Utonpa yamùk, Iulà uyiwalà nùttuyan wakù pe we'nàtok ke awanùssak kon, tamù'nawolon tùttusan ke molopai kappon yenupanài yeppe ewechi kon àkklottau'nokon.

¹⁵Tùse sàlà kaleta yau we'namatok pùla kulu weppàssaik màlà yamùk pàk eyenu yapontà kon uya pàk. We'nama pùla weppàssaik masapùla Katù uya ulepasak wakù pe we'nàtok ke pàk.

¹⁶Màlàpàk Jesus Christ yapyoto pe tùwe'wotokomasen pe wenasak man Jew yamùk pen ponaloppe. Patele pe wechi kasa tùwe'wotokomasen Iulà, Wakù Itekale Katù winàpaino yekama pàk, Jew yamùk pen tùtoppe tùtùsen pe Katù nanùmù yeppe, itùsappe Katù yemyak tok wettoppe Wakù Akkwalù winà.

¹⁷Màlàpàk uchi Christ Jesus yau utauchinpa kulu sàlà, Katù wotokoyi yau we'wotokoma pàk.

¹⁸Màlàpàk yà'là yekkwa là pàk uselupaiche wechi pen sàlà. Màlà neken Christ nùkupùppù uyai pàk uselupa, Jew yamùk pen nepù uya Katù Maimu yawàlà tok wettoppe pàk, uselupappù lùpù pàkàlà molopai unkupùppù winà.

¹⁹Sàlà kupùppù uya yensappe pùla nai'nùk wapiya, enumenkanài molopai usenalippantoppe ku'nài meluntàlù winà, molopai Wakù Akkwalù meluntàlù winà. Màlàpàk mei pai Jerusalem poi Illyricum pùkkù yak, Wakù Itekale yekamasak uya man tamù'nawàlà, Christ yekale.

²⁰Jesus yekale usekamappù yau pen pata yau Wakù Itekale enekamapaino Iulà tàwàlà, tùulon kon nùpyattàppù pàk we'wotokoma tukaik.

²¹Katù Maimu uya, “Mùkyamlo Jesus yesek yekamappù ipàk pen ton wapiya, uya yene màlà, molopai mùkyamlo yetannannùssan pen uya ittu màlà,” te kasa. {Isa 52.15}

²²Yetasak auya'nokn pàk sàlà pàkànsau echipalà'ne uwakkàtùppù màlà apyakù'nokon uyàpù tukaik.

²³Tùse nen uchi uwotokoyi yenuka'nùssak uya man sàlà yawolon pata yamùk yau, molopai tukke kilichimochi eyense'nokon àippai wessak man.

²⁴Màlàpàk “sàlà pe'ne eyene kon uya” te uya sàlà Spain pona utà yau. Akakklanpasak kon uya malalà tùpo, wepùikattàtok yepolo uya ewinàpai'nokon pàk enpen wessaik utàtoppe màlà pata motak,

²⁵Sàlà pe, utàyaik Jerusalem pona Katù ponalok kon kappon yamùk pùikattàse molo.

²⁶Masapùla ailon tawonnan Jesus pàk Macedonia pon kon molopai Achaia pokon kon utauchinpasak man tùtùsen tùlù pàk yà'là pùnon sa'ne ponaloppe Katù ponalok kon Jerusalem pon kappon yamùk kùlottau nainannùk pùikattàtok.

²⁷Màlà kupù pàk tok utauchinpasak wechippù màlà tùyiwalà'nokon. Tùse mùkyamlo yà'là pùnon sa'ne pùikattà nen tok uya màlà, masapùla Jew yamùk uya wakù Katù winàpaino intùlùppù pùkkù pe Jew yamùk pen masak pàk, màlàpàk uchi Jew yamùk pen uya Jew yamùk pùikattà màlà itesappe tùwettok kon ke.

²⁸Sàlà wotoko yenuka'nùssak uya yau, molopai tamù'nawàlà itùsak lùppù tok ponaloppe tùsak uya tok yemyak yau, Spain pona utà màlà molopai akakklanpa kon uya màlà utà pe màlà motak.

²⁹molopai tùttuyaik uyàpù apyakù'nokon yau, uyàpù tamù'nawolon Christ winàpaino wakù pokonpe.

³⁰Apawanattàyatàu Iulà utonpa yamùk, Kùyepulu kon Jesus Christ winà molopai uchi'nùnmantok Wakù Akkwalù nùtùlù winà. Àwàpùlematok kon yau epanta'matà kon uponaloppe.

³¹Màpùlematàik uyesappe Katù wettoppe ailon tawonnan pen Judea pon kon winàpai, molopai we'wotokomatok Jerusalem po wettoppe auchinpanà pe molonkonnà Katù ponalok kon kappon yamùk pona.

³²Katù yeselu yawàlà welepantoppe apyakù'nokon tùutauchinpaik kulu, molopai uyakwalù tùkà'maik àkklottau'nokon wettoppe.

³³Tàwà uchi Katù, echitonpa pe we'nàtok yesak, tamù'nawàlà apyau'nokon nechii. Emen.