Read Patamona Romans 4 Bible Online

Romans 4 - Patamona bible

Romans 4

¹Yà'là te'nokon ken uchi Abraham, kùtamo kon pàk? Yà'là yeneppù ya ken?

²Ikasa iwettok yak yanùnsak Katù pokonpe inkupùssan winà yau, iitapulàtok ipàk wechippù sàlà molo. Tùse iitapulà là Katù yemloto po pùn.

³Yà'là tawon ken Katù Maimu? “Abraham uya ailon teppù Katù pàk, molopai ailontetok ya pàkànsau Katù uya yanùmùppù ikasa,” te yau? {Gen 15.6}

⁴Kappon mùkkàlà te'masen iwe'wotokomasak yau, ye'matok màlà lepantok pe là tesassen pen, tùse itepeppù màlà.

⁵Inkupù pàkàlà là Katù uya kappon yanùmù pen màlà, tùse ailon tetok ya tùpàk pàkàlà làkku àli sa'ne kappon yanùnnài mùkkàlà ikasa.

⁶Sàlàichi màlà David nekamappù kappon utauchinpatok pàk tùuselupa yau, mùkkàlà Katù nanùmùppù ikasa tùwessen pe iwotokoyi winà.

⁷“Tùutauchinpasan kulu mùkyamlo Katù usentuppasak ipàk lùssan Law maimu ikkwàssak lànen tok uya tùse molopai Katù nùwaputtàpù imakuyi,” tukaik.

⁸“Tùutauchinpasen kulu mùkkàlà kappon Itepulu nùpattàppù imakuyi!” tukaik. {Psa 32.2}

⁹Sàlà utauchinpantok David uselupappù lùppù ipàk ken na' màlà Jew yamùk yattàtok yeselu yawolon kon neken ponalok? Kane. Tùulon ponalok nàlà màlà. Masapùla yekama'nokon nepàssan, “Abraham uya ailon teppù Katù pàk molopai ailontetok ya pàkànsau Katù uya yanùmùppù ikasa tùwessen pe,” tawon.

¹⁰Yà'là yattai ken sàlà wekkupùppù? Abraham yattà Jew yamùk yattàtok yeselu yawàlà wapiya ka'lù wapùla ite'mappùtak? Iwapiya, ite'mappùtak pùla.

¹¹Màlà ye'mappùtak yattàppù màlà, molopai sàlà kupùppù màlà yentok ipàkàlà pe. Masapùla ailontetok Abraham uya pàk Katù uya yanùmùppù ikasa tùwessen pe yattà wapiya yekamanài. Màlàpàk Abraham mùkkàlà tamù'nawolon kon ailon tawonnan Katù pàk kàipùnù, tok yattàsak Jew yamùk yeselu yawàlà pùla lànen tùse. Mùkyamlo yanùnsak kon kàipùnù pe.

¹²Yattàsak kon kàipùnù nàlà mùkkàlà, yattàsak kon neken nà pen, tùse kùkàipùnù kon Abraham uya ailon tetok tattà wapiya yeselu yawàlà tùwemassan kàipùnù.

¹³Katù uya Abraham molopai ipayan yamùk pàk wolù wechi màlà tok ponaloppe teppù màlà. Sàlà wekkupù màlà, Law yawàlà Abraham wechi pàk pùla, tùse ailon tesak ya pàk, màlà winà Katù uya nen uchi yanùmùppù ikasa tùwessen pe.

¹⁴Masapùla Law yawon kon neken yemyak ikupù tùuya tetok Katù uya tùsak yau, kappon uya ailontetok wechi yà'là pe pùla eppaino, molopai Katù uya itùlù tùuya tetok wechi wakù pe pùla eppaino.

¹⁵Law màlà Katù we'naikatok àsà pe ne'nài. Tùse enupantok pùla iwechi yau, “Sàlà kùkkuttàu, màlà ikuttàk kon,” tawon làkku, enupantok maimu yawàlà pùla we'nàtok, pùla iwechi màlà.

¹⁶Katù uya ikupù tùuya tetok wechi màlà ailon tetok yapon pe, Katù uya lepantok pe iwechi yentok ipàkàlà pe iwettoppe, tamù'nawolon kon Abraham payan yamùk ponaloppe, Law yawolon kon neken pen, tùse mùkyamlo nàlà ailon tawonnan Katù pàk, Abraham wechippù kasa. Masapùla Abraham mùkkàlà kùkàipùnù kon tamù'nawàlà, tamù'nawolon kon kappon yamùk yenupanài ailon pe we'nàtok pàk.

¹⁷Katù Maimu uya, “Àkonekasak uya sàlà tukkan pata yawon kon kappon yamùk kàipùnù pe, ” te kasa. {Gen 17.5} Màlàpàk kùkàipùnù kon mùkkàlà Katù yenu yau, ailon tawon nùppù ipàk, Katù iwelichak lùppù lepanài wema'nàtok ke molopai emennak ton konekanài yà'là pen yapai.

¹⁸Abraham uya ailon teppù, molopai enpen iwechippù enpen we'nàtok ipàk pùla tùse, molopai màlà kasa iwenappù “Màlà kasa apayan yamùk wettok woton tukke,” teppù ipàk kasa. {Gen15.5}.

¹⁹100 peiwa lànen ikilichimochiyi iwechippù màlà. Tùse ailon tetok ya wattu'mùntappù pen tùwattu'mùntasak pàk molopai Sarah uya mule yepolo pùla iwechi pàk iichenumenka yau.

²⁰Ailon tetok ya wechippù màlà i'napailà, màlàpàk Katù uya ikupù tùuya teppù lùppù pàk ailon te ya pùla iwechippù pen. Ailon tetok ya wenappù meluntà pe, molopai Katù yapulàppù ya.

²¹Masapùla ailon teppù ya kulu màlà Katù uya ikupù tùuya teppù lùppù kupù pàk.

²²Màlàpàk uchi Abraham yanùmùppù Katù uya màlà ikasa tùwessen pe ailon tetok ya yai.

²³Màlà mayin “Katù uya yanùmùppù màlà ikasa tùwessen pe,” tawon menukappù iponaloppe neken pen màlà.

²⁴Tùse kùponalok kon pe nàlà imenukasak màlà. Masapùla ikasa tùwessan pe tanùnsan pe we'nà'nokon pàk, kùmyamlo ailon tawonnan Katù pàk Jesus kùyepulu kon uluukanàippù weli'nàtok yapai wema'nàtok yak pàk.

²⁵Katù uya Jesus tùlùppù màlà iwelittoppe kùmakuyi kon pàkànsau, molopai iwuluukappù màlà wema'nàtok yak ikasa kùyanùntoppe Katù pokonpe.