Read Patamona Romans 5 Bible Online

Romans 5 - Patamona bible

Romans 5

¹Ailon tetok kùuya'nokon uya ikasa kùkonekasak kon Katù pokonpe pàk nen uchi, echitonpa pe we'nàtok Katù pokonpe yesappe we'nà'nokon sàlà kùyepulu Jesus Christ yai.

²Ailon tetok winà kùnessak kon ya sàlà, wakù pe Katù wettok yak, yau we'nà'nokon nai'nùk sàlà pe yak. Tùutauchinpasan kùmyamlo enpen we'nàtok, Katù yapulàtok pùkkù pe we'nà'nokon pàk!

³Màlà neken pen, wettalumattàntok kon yau nàlà tùutauchinpasan kùmyamlo. Masapùla wettalumattàntok uya ipàlikatok nepù ittu'nokon pàk.

⁴Molopai pàlikantok uya meluntà pe kùma kon màlà molopai meluntà pe wenansak màlà kùlepanài'nokon enpen we'nàtok ke.

⁵Sàlà enpen we'nàtok màlà enkuttànài pen, masapùla Katù uya pùnùnmantok tùuya tùsak màlà kùyewan kon yak, Wakù Akkwalù yai, mùkkàlà Katù uya kùlepatok kon ike yai.

⁶Masapùla attu'mùla ipùikattànài pùla we'nà'nokon yau, Christ welikùppù màlà àli ton ponaloppe, Katù nanùmùppù ikuttok tùuya yattai pe yattai.

⁷Sa'man pe kulu wakù kappon ponaloppe ànù'là welikù wechi màlà. Yattai pùla tùulon wechi là meluntà pe itewan, wakùiwa kulu kappon ponaloppe tùwelikù pàk.

⁸Tùse Katù uya eke pe kulu kù'nùnmatok tùuya yekamappù màlà. Makui yau lùppù we'nà'nokon tùse Christ welikùppù màlà kùponalok kon pe.

⁹Imùnù winà nen uchi sàlà, ikasa kùyanùnsak Katù pokonpe, màlà yentai palà wepùikattàn nokon màlà Christ winà Katù we'naikatok àsà pe winàpai.

¹⁰Masapùla Katù yeyaton pe we'nàppà'nokon màlà, tùse kùkusak kon ya màlà tùwechi yakon non pe Tùmu Jesus Christ welittok yai. Màlàpàk sàlà pe Katù wechi yakonnon pe we'nà'nokon pàk, eke peiwa kulu wepùikattàntoppe iwechi màlà Christ wemapù winà.

¹¹Molopai màlà neken pe pùla iwechi, utauchinpan nokon man Katù yau kùyepulu Jesus Christ yai, mùkkàlà kùku'nàippù'nokon Katù wechiyakonnon pe.

¹²Makui wewomùppù màlà wolù yak tewinan kappon winà, molopai weli'nàtok uyàpùppù makui pàkàlà. Sàlà kasaichi weli'nàtok uyàpùppù màlà tamù'nawolon kon kappon yamùk pona. Masapùla tamù'nawolon kon kappon yamùk wemakuimasak pàk.

¹³Law wapiya makui wechippù màlà wolù yau. Tùse wemakuimansak yau “Law ikkwàsak auya nai'nùk”te pùn.

¹⁴Tùse Adam wemapùppù motapai Moses motak, kappon yamùk wemapùppù weli'nàtok yo'no, mùkyamlo Adam wemakuimappù kasa iwemakumasak kon pen nànen. Adam wechippù màlà mùkkàlà tùuyàpù woton pe nai'nùk yekkwa pe.

¹⁵Tùse lepantok wechi màlà Adam wemakuimatok kasa pùla. Masapùla tewinan kappon wemakuimasak winà tukkan kon welichak yau, màlà yentai palà Katù wettok wakù pe molopai lepantok ya wechi màlà tewinan kappon, Jesus Christ yai. Màlà tùuyàssen tukkan kon pona!

¹⁶Molopai tu'ma Katù uya lepantok màlà tewinan kappon wemakuimasak lùppù yepeppù walai pen itepeppù, tùpatalon. Masapùla ittuntok tewinan kappon makuyi ye'mappùpokon uya talumattàntok nepùppù màlà. Tùse lepantok Katù winàpaino, tukkan makui ye'mappùpokon uya ikasa anùnnàtok Katù pokonpe nepù màlà.

¹⁷Tewinan kappon makuyi pàkàlà kappon yamùk wemapùppù weli'nàtok yo'no, tewinan kappon pàkànsau. Tùse eke peiwa kulu nen uchi màlà tewinan kappon nùkupùppù yepeppù wechi, mùkkàlà Jesus Christ. Tamù'nawolon kon, eke kulu wakù pe we'nàtok, Katù winàpaino yanùnnàinan molopai lepantok ya ikasa we'nàtok yawà yanùnnàinan wechi màlà itepulu pe Christ yai.

¹⁸Màlàpàk uchi tewinan kappon makuyi uya tamù'nawolon kon kappon yamùk pa'nùssak kasa làma, mùkkùlà, Jesus, nùkupùppù iwalai uya tamù'nawolon kon kappon yamùk pùikattà màlà. Katù uya tok yanùntoppe ikasa molopai tok lepa ya tàwàlàlà wema'nàtok ke.

¹⁹Molopai tewinan kappon wessak mayin yawàlà pùla uya tukke kappon yamùk kussak àli ku'nàinan pe, kasa làma tewinan kappon wettok mayin yawàlà uya tukkan kon tùlù màlà ikasa Katù pokonpe.

²⁰Law tùlùppù màlà iwalai pen kuttok wekattoppe. Tùse àli kuttok wekassak yau, Katù wettok wakù pe wekatù màlà eke peiwa kulu.

²¹Màlàpàk uchi, makui wechippù meluntà pe weli'nàtok yak anài pe. Màlà kasa làma Katù wettok wakù pe wechi màlà meluntà pe tùwenasen pe ikasa we'nàtok winà, tàwàlàlà wema'nàtok ne'nài pe Jesus Christ kùyepulu kon yai.