Read Patamona Romans 6 Bible Online

Romans 6 - Patamona bible

Romans 6

¹Yà'là te'nokon ken uchi? Tàwàlàlà ka' makui yau wema'nà'nokon sàlà lù, Katù wettok wakù pe wekattoppe eke peiwa?

²Kanekku! Weli'nàsakù'nokon sàlà àli winàpai. Yà'là kasa ken màlà yentak wema'nà'nokon àli yau?

³Ittuichi auya'nokon pùla nai Christ Jesus yau ichenpataukasak kon nùssan wechi nàlà iwelittok pùkkù pe?

⁴Usenpataukantok kon winà uchi màlà, kùwu'nattàsakù'nokon ipokonpe molopai iwelittok pùkkù pe we'nà'nokon, Christ uluukappù nai'nùk weli'nàtok yapai wakù kulu kùkàipùnù kon meluntàlù winà, kasa làma kùmàlà nàlà , wemapù màlà emennak wema'nàtok yau.

⁵Màlàpàk tewin wenansak ipokonpe weli'nà'nokon iwelikùppù kasa yau, màlà kasa làma tewin wenannokon màlà ipokonpe, kùwuluuka kon wema'nàtok yak iwuluukappù kasa yau.

⁶Masapùla sàlà ittu'nokon man, penalok àli ton kùyeselu kon tùlùppù inmattatoppe Christ pokonpe pulusuk po, àli eselu wannà meluntàlùkkatoppe, makui yapyoto pe we'nà'nokon tukaik.

⁷Ittu'nokon man iwelichak kon kappon yamùk pàk meluntà pe tùwessen pe pùla makui wechi.

⁸Weli'nàsakù'nokon Christ pokonpe yau, ailon te'nokon man wema'nà'nokon nàlà ipokonpe pàk.

⁹Masapùla ittu'nokon man Kùlaik wuluukappù weli'nàtok yapai wema'nàtok yak molopai iwelittu'ma pen màlà. Weli'nàtok meluntàlù pùla nen uchi iwechi màlà itepoi.

¹⁰Christ welichak yau, iwelikùppù màlà àli pàkànsau tewin itekkwa molopai tamù'nawolon ponaloppe. Tùse nulà man sàlà pe, molopai Katù ponaloppe neken iwemapù màlà.

¹¹Màlà kasa làma eusenumenka kon màlà àpàkù'nokon iwelichappe àli pàk tùse nulà Katù pàk Christ Jesus ponaloppe ewechi kon yau.

¹²Eyesak kon tùumattasen pe nai'nùk yepulu pe àli kùsettak. Àli eyeselu kon wettok makui ànkupai maimu yawàlà ewechi kon pa àpun kon yepulu pe kùsettak.

¹³Màlà tùse pùla àpùkkù kon kùsapulàtàu àli ponaloppe, àli pàkànsau yapulàtoppe. Tùse làkku Katù yemyak ettùtàk kon, kappon yamùk inesak kon weli'nàtok yapai wema'nàtok yak kasa molopai tamù'nawàlà ettùtàk kon itemyak wakù iwalai ponaloppe ayapulàtoppe.

¹⁴Makui eyepulu kon pe kùsettak, masapùla Law maimu yawàlà tùwemassan pen amyamlo. Tùse wakù pe Katù wettok yo'no làkku tùwemassan.

¹⁵Yà'là kupù'nokon ken uchi? Àli kupù'nokon ka'lù, masapùla Law maimu yo'no pùla we'nà pàk tùse wakù pe Katù wettok yo'no we'nà pàk lù? Kanekku!

¹⁶Mùttuyatàik, imaimu yawàlà ewettok kon poitolù ton amyamlo, ewechi kon, makui maimu yawàlà ewechi kon yau, weli'nàtok ne'nài pe nai'nùk, wapùla ikasa we'nàtok Katù pokonpe ne'nài maimu yawàlà.

¹⁷Tùse tenki tepai'nokon Katù pàk, masapùla pena àli yapyoto pe ewechippù kon màlà, tùse sàlà pe ailon, yeposak lùppù enupantok, enepoloppù kon yau, maimu yawàlà ewechi kon tamù'nawàlà eyewan kon ke.

¹⁸Àmokkappù kon màlà àli, eyepoi ewechippù winàpai, wakù pe we'nàtok, ikasa we'nàtok yapyoto pe nen uchi ewenasak kon màlà.

¹⁹Uselupayaik kappon nùttu yau, masapùla atu'mùla ewechi kon pàk. Pena tamù'nawàlà eyesak kon tùlùppù auya'nokon màlà àli eyeselu kon, miyaiwa àli pe ayanàippù kon i'napailà yapyoto pe. Màlà kasa làmaichi sàlà pe tamù'nawàlà eyesak kon itùtàk kon, esuken we'nàtok yapyoto pe.

²⁰Makui yapyoto pe ewechi kon yau, wakù pe we'nàtok ikasa we'nàtok yapyoto pe pùla ewechippù kon màlà.

²¹Yà'là ken uchi wakù mepotantàu màlà yamùk sàlà pe ipàk mekkuli'mayatài'nùk kupù auya'nokon winàpai? Weli'nàtok yak anàinan.

²²Tùse sàlà pe àmokkasak kon man àli pe we'nàtok winàpai. Molopai Katù yapyoto ton amyamlo, sàlà uya esuken wema'nàtok yak ayasak kon nai'nùk. Molopai iwenukapù pe tàwàlàlà wema'nàtok yepolo auya'nokon màlà itepeppù pe.

²³Masapùla àli yepeppù màlà weli'nàtok. Tùse Katù uya lepantok màlà tàwàlàlà wema'nàtok Kùlaik Chisek, kùyepulu kon yai.