Read Patamona 1 Corinthians 1 Bible Online

1 Corinthians 1 - Patamona bible

1 Corinthians 1

¹Sàlà kaleta màlà Paul, Katù yeselu winà ikà'masak lùppù Christ Jesus ponaloppe yeunossak winàpaino molopai kùtonpa kon Sosthenes winàpaino.

²Katù sochiyi Corinth pon piyak, mùkyamlo iwekonekasak kon wakù pe Christ Jesus yau molopai ikà'masak kon esuken tok wettoppe piyak, tamùkke tamù'nawolon kon kappon yamùk pokonpe mailàlà Kùyepulu kon Jesus Christ yesek yesa'nàinan, tok yepulu molopai kùyepulu kon.

³Tàwà Katù Kùkàipùnù kon molopai Itepulu Jesus Christ elepai'nokon tùwinàpaino wakù pe we'nàtok molopai echitonpa pe we'nàtok ke.

⁴Tenki tawon Iulà Katù pàk tàwàlà àpàkànsau'nokon, masapùla wakù kussak ya àponalok kon pe Christ Jesus yai pàk.

⁵Masapùla mùkkàlà yau tamù'nawolon yesappe ewenasak kon man, tamù'nawolon yau, tamù'nawàlà euselupatok kon yau molopai tamù'nawàlà ittutok auya'nokon yau.

⁶Masapùla Christ yekale wechi ailon pe kulu yenpoikappù màlà ayau'nokon.

⁷Màlàpàk i'nai yekkwa là lepantok Wakù Akkwalù winàpaino pùla ewechi kon pen màlà, Kùyepulu kon Jesus Christ usenpoika màmuku pàk ewechi kon yau.

⁸Meluntà pe àkupù kon ya màlà iwenukapù ponalà, iwalai pen nà pùla ewechi kon pa Kùyepulu kon Jesus Christ weyu yattai.

⁹Katù, àkà'manàippù'nokon echitonpa pe ewechi kon pa tùmu Jesus Christ Kùyepulu kon pokonpe, mùkkàlà wechi màlà ailon pe.

¹⁰Apawanattàyatàu Iulà utonpa yamùk, Kùyepulu kon Jesus Christ yesek yau, tamù'nawàlà tewin ichenumenkatok ewechi kon pa wepantakantok wechi molo àkklottau'nokon tukaik, echitonpa pe ettàk kon tewin neken ichenumenkatok.

¹¹Utonpa yamùk, Chloe tonpa yamùk uya yekamasak man upàk, usàulàmantok wechi molo àkklottau'nokon.

¹²Sà kasa te uya uya wate. Tewinan nà uya, “Paul ya'lon Iulà” te, tùulon uya, “Apollos ya'lon Iulà” te, tùulon uya, “Cephas, Peter tukaik tesassen ya'lon Iulà” te, molopai tùulon uya, “Christ ya'lon Iulà” te.

¹³Ipantakapàssappe na' màlà Christ wechi? Paul wànàppù na' màlà pulusak po àponalok kon pe? Eusenpataukappù kon ken na' Paul yesek yau?

¹⁴Tenki ukayaik Katù pàk eyenpataukasak kon uya pùla iwechi pàk, tùse Crispus molopai Gaius tawonnan neken.

¹⁵Ànù'là uya eusenpataukappù kon uyesek yau te pen màlà.

¹⁶Ewaik, Stephanas yùwùk tawon kon yenpataukappù uya nàlà màlà, tùse ànù'là yenpataukappù uya ittu uya pùla man.

¹⁷Masapùla Christ uya uyeunoko enpataukanse pùn, tùse Wakù Itekale yekamase, kappon pukketù winon mayin ke pùla, màlà kasa iwechi yau Christ welittok pulusuk po meluntàlù pùla iwena tukaik tamù'nawàlà.

¹⁸Masapùla Christ welittok pulusuk po yekale màlà wo'mattantok mùkyamlo tùumattasan pona, tùse kùmyamlo iwepùikattàsak kon pona Katù yapàikketù pe iwechi màlà.

¹⁹Masapùla Katù Maimu uya, “Pukkek ton pukketù mattanùpù uya màlà, tenupasan uya ittutok yenu'ma uya màlà,” tesak màlà. {Isa 29.14}

²⁰Màlàpàk uchi, i'nailà mùkkàlà pukkek kappon? Wapùla tùusenuppasen? Wapùla pukkeppe tùuselupasen sàlà yattai? Katù uya sàlà wolù pukketù wechi wo'mattantok pe yenpoikasak màlà!

²¹Masapùla Katù uya tùpukketù yai kappon yamùk kupùppù wolù pukketù yau tùttutok tok uya pùla. Tùse làkku Katù wekkupùppù “Mùkyamlo ailon tawonnan ‘wo'mattantok’ itekale pàk pùikattà uya màlà,” tukaik.

²²Jew yamùk mùkyamlo tensan yekkwa pen iche tùwessan molopai Jew yamùk pen mùkyamlo pukkek iwannan.

²³Tùse ina mùkyamlo Christ welikùppù pulusuk po yekale yekamannan, Jew yamùk wettatai'matok ipona, molopai wo'mattantok Jew yamùk pen pona;

²⁴tùse mùkyamlo Katù nùkà'massan pona, asakklàma Ichu yamùk molopai Greek yamùk pona, Christ wechi Katù meluntàlù pe molopai ipukketù pe.

²⁵Masapùla Katù wo'mattatok wechi màlà pukkeppeiwa kappon pukketù yentai, molopai Katù wettok attu'mùla wechi màlà meluntà peiwa kappon yamùk meluntàlù yentaino.

²⁶Utonpa yamùk, yà'là kasa là ewechippù kon ittutàk kon àkà'ma kon yau. Tukke pùla ewechippù kon pukkeppe wapùla meluntà pe wapùla eke ton kappon yamùk munkà pe.

²⁷Tùse Katù uya yà'là pe pùla tùttusen wolù yau yanùmùppù màlà pukkeppe tùwessan wekuli'matoppe, molopai attu'mùla tùttusen wolù yau yanùmùppù màlà meluntà ton wekuli'matoppe.

²⁸Wolù yau tenpàssan eke ton kappon yamùk munkà pe pùla yanùmùppù ya màlà molopai tenpàssan, molopai yà'là pe pùla wolù yawon kon nekama molo tùwessen mattanùttoppe tùuya.

²⁹Sàlà uya tewinannà kappon utapulà pùla iwechi Katù yemloto po yekama màlà.

³⁰Tùse Katù uya enessak kon man Christ Jesus ponaloppe we'nàtok yak, molopai Katù uya Christ kussak man ittutok kùuya'nokon pe. Mùkkàlà Christ winà Katù pokonpe ikasa kùtùlù kon màlà, esuken molopai kùpùikattà kon àli kuttok winàpai.

³¹Màlàpàk uchi, iwe'menukasak kasa, “ Tàwà ànù'là tùutapulàsen nùtapulài Itepulu yau.” {Jer 9.24}