Read Patamona 1 Corinthians 10 Bible Online

1 Corinthians 10 - Patamona bible

1 Corinthians 10

¹Ittu auya'nokon iche wessaik utonpa yamùk, kùtamo kon yamùk wechippù màlà tamù'nawàlà katuppluk yo'no molopai tamù'nawàlà tok utàppù palau yawà.

²Tamù'nawàlà tok usenpataukappù màlà katuppluk yau molopai palau kau Moses ya'lon kon pe.

³Tamù'nawàlà tok uya màlà lùppù akkwalù yeipa napùppù.

⁴Molopai akkwalù uku inchippù, masapùla tok uya inchippù màlà akkwalù Tàpu ta'là'nokon ittàsak yapai. Molopai màlà Tàk wechippù màlà Christ pe.

⁵Walà tùse Katù yauchinpasak tamù'nawolon kon nùiwa lànen uya pùla iwechippù. Màlàpàk tok yàkàpù solokappù màttawà wontaik yawà.

⁶Sàlà yamùk wekkupùppù màlà yentok kùuya'nokon ipàkàlà pe, kùyewan kon tùlù àliton kuttok yak tukaik, tok wechippù kasa.

⁷Ailon pen katù yamùk kùsapulàtàu, tùulon kon tok tonpa yamùk wechippù kasa. Iwe'menukasak uya, “Kappon yamùk weleutappù ata'lettàse molopai tinchisen inchise, molopai tok we'wuluukappù àli pe amanùnse,” te kasa. {Exod 32.6}

⁸Àli, imakuyippù kupù'nokon kùyesak kon ke kùsettak, tùulon kon wechippù kasa. Molopai tewin wei yau 23,000 pe tok welikùppù.

⁹Ittuntok yak itepulu tùlù kùsettakù'nokon, tùulon kon uya ikupùppù kasa, molopai tok u'matùppù àkài yamùk kamo pe.

¹⁰Molopai kàsàulàmatàu, tùulon kon wechippù kasa, molopai tok u'matùppù màlà mattanù'nài inchelù kamo pe.

¹¹Sàlà yamùk wekkupùppù màlà yentok kùuya'nokon ipàkàlà pe, molopai màlà yamùk menukappù màlà kùyekamapponài'nokon pe. Masapùla wema'nà'nokon man pata weyu wenukattok uyàpù winàkàik iwechi yau.

¹²Màlàpàk meluntàk àwà'mùssakkasappe ittu auya yau, tùttuik mechiik ewekkawai'ma tukaik.

¹³Tamù'nawolon ittuntok ewinàkàik nùyàssai'nùk màlà tuulon kon kappon yamùk winàkàik tùuyàssen yekkwa. Tùse Katù mùkkàlà ikupù tùuya teppù tùuya lùppù ku'nài. Molopai emeluntàlù yentai kulu là eyittutok uyàttoppe àpona ikupù ya pen màlà. Molopai i'nai kasa là eyittutok yamùk winàpai ewepetok yawà woton yekama ya màlà.

¹⁴Màlàpàk utonpa yamùk, ailon pen katù yamùk winàpai ettàk kon.

¹⁵Ittunnan kappon yamùk pokonpe uselupa kasa uselupa sàlà, ailon pe wate uya ittutàk kon eyiwalà'nokon.

¹⁶Tenki tawonnan kùmyamlo ipùlemasak kon pàk. Màlà wechi màlà Christ welikù mùnù pùkkù pe we'nà yekamanài pe. Molopai pùlomù pusak ipilika'nokon nai'nùk wechi Christ pun pùkkù pe we'nà yekamanài pe.

¹⁷Masapùla tewin pùlomù pusak wechi pàk, kùmyamlo tukkan kon wechi màlà tewin. Masapùla tewinan pùlomù pusak napù'nokon nai'nùk tamùkke.

¹⁸Israel yamùk pàk esenumenkatàk kon. Mùkyamlo ku ipottàtoppe itùsak lùppù pùkkù yannàinan tà, masapùla ipùkkù pe tùwechi kon pàk.

¹⁹Ailon pen katù yemyak itùsak lùppù wechi màlà yà'là pe kulu te uya na' nai'nùk wapùla ailon pen katù wechi màlà ànùppe te uya ka'lù?

²⁰Kane! Tùse Katù ittunan pen wechi màlà tùtùsen tùnnan pe àli akkwalù yamùk yemyak, Katù yemyak pùla. Molopai àli akkwalù yamùk pùkkù pe ewechi kon iche pùla nen wessaik.

²¹Itepulu kokù yapai inchi auya'nokon molopai àli akkwalù yamùk kokù yapai tu'ma pen nen màlà. Asaklàma, Itepulu uta'lettà yapon molopai àli akkwalù yamùk uta'lettà yapon tawonnan po auta'lettà kon pen nen màlà.

²²Itepulu kùlùmàpaiche ka' we'nà'nokon nai'nùk lù? Meluntà pe ka' itentai we'nà'nokon nai lù?

²³Tamù'nawolon wechi màlà tùkussen pe tùse tamù'nawàlà wakù pe iwechi pen màlà. Tamù'nawolon wechi màlà tùkussen pe tùse tamù'nawolon wechi kulu là meluntàlùnpanài pe pen màlà.

²⁴Tùulon kon tenumenkaik, tok tùttuse we'nà'nokon nechiik wakù pe, pàk wannà neken nà tùusenumenkaik pùla.

²⁵Makitti tau tichilanmasen kampà mantàik, ikasa wapùla ikasa pùla tùusenumenkaik pùla.

²⁶Masapùla, “Non molopai tamù'nawàlà yawon kon màlà Itepulu ponalok.”

²⁷Ailon tawon pen uya àkà'masak kon uta'lettàntok yak molopai itàpai ewechi kon yau, yà'làlà eyemloto kon pona ichalattàsak inattàk kon, eusenumenka kon pàk yà'làlà pe iwechi tekamappopàsse pùla.

²⁸Tùse àpàkù'nokon ànù'là uya, “Sàlà màlà ailon pen katù yemyak itùsak lùppù,” te yau kù'nattàu, mùkkàlà kappon yekamanàippù àpàkù'nokon usenumekatok pàkànsau. Molopai usenumenkantok pàkànsau.

²⁹Eusenumenkatok pen tùse mùkkàlà làkku. Màlàpàk, yà'là peichi iwechi pàk welaikatok miyakanma uya àli pe tùulon kappon usenumenka pàk?

³⁰Tenki tei'ma Katù pàk uyeipa napù uya, yà'là pe iwechi pàk ànù'là uya uyàulàma tenki tukaik là yanùmù uya tùse?

³¹Yà'làlà kupù auya'nokon yau, auta'lettà kon wapùla àwuku kon nà inchi auya'nokon pe iwechi yau, tamù'nawolon ikuttàk kon Katù yapulà auya'nokon pe.

³²Ànù'là wettatai'matok ipona woton kùkkonekatàu, Jew yamùk pe là iwechi wapùla Jew yamùk pen nà wapùla Katù sochiyi tawon kon nà.

³³Ukasa. Tamù'nawolon yau tamù'nawolon kon pàk wakù pe welaikaiche tùwessen Iulà unkupù yau. Masapùla wakù pe neken nà uwinàkàik we'nà iche wechi pen, tùse tamù'nawolon kon pàkànsau, tok wepùikattà toppe.