Read Patamona 1 Corinthians 11 Bible Online

1 Corinthians 11 - Patamona bible

1 Corinthians 11

¹Ukasa emattàk, Christ kasa wemassai'nùk kasa.

²Ayapulàyatàu Iulà masapùla tamù'nawolon yau uyittu auya'nokon pàk molopai enupantok unepoloppù lùppù ke eyenupasak kon uya kupù auya'nokon pàk.

³Tùse ittu auya'nokon iche wessaik Christ wechi tamù'nawolon kon kàyik yamùk ippai pe, molopai nossan ippai pe kàyik wechi, molopai Christ ippai pe Katù wechi.

⁴Ànù'là kàyik tùppai wapu ke tùwàpùlemasen wapùla Katù Maimu yenpoikanài uya màlà tùppai kuli'ma.

⁵Molopai ànù'là nossan tùppai wapu ke pùla tùwàpùlemasen wapùla Katù Maimu yenpoikanài uya màlà tùppai kuli'ma, ippai nasak lùppù kasa iwechi màlà.

⁶Molopai nossan uya tùppai waputtà pùla iwechi yau, tàwà tùnsek yattài. Molopai kuli'manài pe nossan uya tùnsek yattàsak wapùla tùppài nasak wechi yau, tàwà tùppai waputtài.

⁷Kàyik uya tùppai waputtà pen kulu màlà, masapùla Katù kasa molopai inamatok ne'nài pe iwechi màlà. Tùse nossan wechi màlà kàyik namatok ne'nài pe.

⁸Masapùla kàyik konekappù nossan yapai pen màlà tùse nossan konekappù làkku màlà kàyik yapai.

⁹Kàyik konekappù nossan ponaloppe pen màlà, tùse nossan konekappù làkku màlà kàyik ponaloppe.

¹⁰Màlà kasaichi iwechi pàk, molopai inchelù yamùk pàkànsau nossan uya màlà tùppai waputtà, tepotolù ke tùwechi yekamanài pe.

¹¹Walà tùse, Itepulu yau, nossan wechi tùyiwalà kàyik winàpai pen màlà, wapùla kàyik wechi tùyiwalà nossan winàpai pen.

¹²Masapùla nossan konekappù màlà kàyik yapai. Màlà kasa làma kàyik wentuppù màlà nossan yai. Tùse tamù'nawolon màlà tùuyàssen Katù winàpai.

¹³Ittutàk kon uchi eyiwalà'nokon. Ikasa na' iwechi màlà nossan wàpùlema Katù pàk ippai wapu pùla echiima yau?

¹⁴Wema'nàtok yau ku kuli'mak walawok wechi tùnsek ke tùwessen tà.

¹⁵Tùse nossan wechi kusan pe inchek yau, itema'nomù là màlà. Inchek màlà iwapu pe itùsak lùppù.

¹⁶Anù'là wechi sàlà pàk e'naikapai yau, sàlà kasa neken màlà tamù'nawàlà Katù sochiyi yamùk tau màlà yamùk wekkupù, tùpatalon eselu woton pùla iwechi màlà.

¹⁷Sàlà tekamayai'nùk àpàkù'nokon, ayapulà kon uya pen sàlà. Masapùla ewepilippàttok kon uya eke pe kulu mattanù'nàsak man wakù yentai.

¹⁸Wapiya, ewepilichak kon sochi tak yau iwepantapàssappe àkklottau'nokon ewechi kon yekale tetayaik, molopai itonpa pe tùulon kon nà wechi ailonpe pe tùttuyaik.

¹⁹Wakù pe iwechi màla, tùpatalà àkklottau'nokon ewettok kon uya màlà ànùk wechi kulu là ikasa Katù yenu yau yentoppe yenpoika.

²⁰Màlàpàk tamùkke ewepilichak kon yau, Itepulu ittui'ma ata'lettàse tùuyàssan pen amyamlo.

²¹Masapùla auta'lettà kon yau, eyiwalà'nokon tùuta'lettàsan amyamlo ànù'là tùmàmusse pùla, tùulon wapàkkassak tùwessen molopai tùulon wetùnsak.

²²Pata poichi auta'lettà kon patassek pùnon amyamlo? Molopai àwuku kon inchitok auya'nokon yau pùnon? Wapùla Katù sochiyi ku'nàinan ka' amyamlo atalumayi kon pe lù molopai kappon yamùk yà'là pùla nai'nannùk ànkuli'mapaino kon? Yà'là te uya ken sàlà àpàkù'nokon? Sàlà pàkànsau na' ayapulà kon uya màlà? Kane, ayapulà kon uya pen sàlà.

²³Masapùla àpàkù'nokon tekamatainùk màlà Itepulu winàpai unepoloppù. Itepulu Jesus uya teimippo yewalupàyi tau, pùlomù pusak yanùmùppù màlà.

²⁴Tenki te tùpo ipilipàtùppù ya, molopai, “sàlà màlà upun àponalok kon, sàlà mùkuttàik uyittutok auya'nokon ipàkàlà pe,” teppù ya.

²⁵Màlà kasa làma kok yanùmùppù ya màlà uta'lettàn tùpo. “Sàlà kok màlà emennak ikupù tùuya tetok Katù uya umùnù yau, sàlàichi mùkuttàik, inchi auya'nokon kaichalà uyittutok auya'nokon ipàkàlà pe,” teppù ya.

²⁶Masapùla yà'là yekkwa yattai là sàlà pùlomù pusak napù auya'nokon yau, molopai sàlà kok yapai tinchisen inchi auya'nokon yau, Itepulu welikùppù yekama pe ikupù auya'nokon màlà iyàpù ponalà.

²⁷Màlà kasaichi iwechi pàk ànù'là Itepulu ittu pe pùlomù pusak na'nài molopai tinchisen inchinài sàlà kok yapai ikuttok yawàlà tùnamase pùla echii'ma wechi àli pe màlà Itepulu Jesus pun molopai imùnù winàkàik.

²⁸Tàwà kappon nùsenei, tewan iwai pùlomù pusak napù tùuya wapiya molopai sàlà kok yawon inchi tùuya wapiya.

²⁹Masapùla ànù'là tùuta'lettàsen molopai sàlà kok yawon inchinài Itepulu yesak ittui'ma pùla uya, talumattàntok nepù màlà tùpona.

³⁰Màlà kasaichi iwechipàk tukke e'neppe ewechi kon nai'nùk molopai attu'mùla molopai nàlà tùulon kon u'matùppù man.

³¹Wapiya usennà molopai kùyewan kon iwa kùuya'nokon yau, talumattàntok yo'no we'nà'nokon pen màlà.

³²Tùse Itepulu uya ekamappon molopai talumattàn ya yau, ikupù ya màlà wolù yawon kon pokonpe kùtalumattà tukaik.

³³Màlàpàk uchi, utonpa yamùk, ewepilichak kon tamùkke Itepulu Jesus ittu pe tùnassen nasse yau, àtonpa kon mùmàmuttàik.

³⁴Molopai ànù'là wapàkkassak yau, tàwà nùta'lettài tùpata po, Katù uya atalumattà kon tukaik ewepilipù kon tamùkke pàk. Tùulon kon upàk enekamappoppù kon yeleutanùpù uya màlà uyàssak yau suwa mettàik tetoppe uya.