Read Patamona 1 Corinthians 4 Bible Online

1 Corinthians 4 - Patamona bible

1 Corinthians 4

¹Màlàpàk uchi, ina yene kappon yamùk uya màlà Christ yapyoto ton pe, molopai Katù nùwotokoyittàssan, tùttusen pen ailon yenpoikannan pe ikussak kon pe.

²Màlàpàk mùkyamlo iwotokoyittàsak kon wechi màlà ailon pe tok wechi tùttusan pe.

³Yà'là pe pùla iwechi màlà “Suwa man ” te auya'nokon yau, wapùla kappon winà là kottù yau wechi yau. Uyiwalà là yà'là kasa wechi ittuiche tùwessen pen Iulà.

⁴Tùwanmùla nen usenumenkatok man, tùse màlà uya yà'là là àli ku'nàippù pe pùla ukupù pen màlà. Itepulu nen mùkkàlà uyittunài.

⁵Màlàpàk yà'làlà kùkkottùmatàu iwalai iweyu wapiya, Itepulu uyàpu imàmuttàk. Ewalupàttau yonansappe tùwessen nepù ya màlà akkwa yak molopai kappon yamùk usenumenkatok tok yewan yawon yenpoika ya màlà. Màlà yattai Katù winàpaino apulàntok yepolo tok uya màlà tewin pà'ne.

⁶Utonpa yamùk, sàlà yamùk tesak uya màlà Iulà molopai Apollos tawonnan pàk ittutok auya'nokon ipàkàlà pe. Ina winà eusenupa kon pa, yà'là te là “Imenukasak yawàlà neken ekkà itentak pùla” tawon uya ittu kon pa. Molopai nen uchi ànùk yekkwa kappon wechi tùulon yentai te auya'nokon tukaik.

⁷Masapùla ànùk ken tùpatalà, tùulon kon yentai ewechi kon pa àkuttantàu? Yà'là ken molo nai itesappe ewettok kon enepoloppù kon pen? Molopai yepolo tùpo yà'là pe iwechi pàk autapulà kon màlà yeponàippù pen kasa.

⁸Tamù'nawolon iche ewettok kon yesappe mekkassatàik. Temamin ke ewenakassak kon man! Ina pùla echii'ma Kin yamùk pe ewenasak kon man! Kin pe kulu là ewechi kon iche wessaik, kin pe nàlà ina wettoppe àpokonpe'nokon!

⁹Masapùla Katù uya ina, yeunossak kon nonkasak màlà àkàmlàk, kappon yamùk tùsak tok welittoppe nai'nùk kasa. Tamù'nawolon kon nene pe ina kussak màlà wekkuli'mantok yak, inchelù yamùk molopai kappon yamùk là nene pe.

¹⁰Christ pàkànsau pakko ton pe ina kupù nai'nùk, tùse pukkek ton pe ewechi kon màlà Christ yau. Attu'mùnon ina molopai teya'nomasan tùse meluntà ton amyamlo. Tùnamasan amyamlo, molopai ina tùnamasan pen.

¹¹Sàlà wei tepose ina iwan pe man molopai ina ne'nakklipayan. Pon poipà yau ina man. Ina ippoppàssak man. Ipatassek pùla ina man.

¹²Temyatù kon ke sa'man pe tùwe'wotokomasan ina. Tùpa'nùssak kon yau wakù pe tùwessan ina tùpa'nùnàippù kon pàk. Tùwettalumattà kon yau, ina ipàlikannan.

¹³Ina pàk uselupan àli pe yau, màlà yei'nài nan ina àsà pe pùla. Sàlà tepose àlitta kasa ina man non po, wolù yàliyi yekkwa ina.

¹⁴Sàlà menuka uya nai'nùk àkuli'mapai'nokon wechi pàk pùla, tùse eyekamappo kon pe u'nùn ton kulu umunkà yamùk kasa.

¹⁵Masapùla 10,000 pe lànen eyenupannan Christ pàk yesappe ewechi kon, tùse tukke àkàipùnù kon wechi pen. Masapùla àkàipùnù kon pe wenasak màlà itekale winà.

¹⁶Màlàpàk apawanattàyatù Iulà uyeselu kasa eyeselu kon nechii, kùpatakatàik.

¹⁷Sàlà kasa iwechi pàk Timothy teunossaik apyakù'nokon, umu u'nùn pe unkupù, ailon pe tùwessen mùkkàlà Itepulu yau. Christ Jesus yau wemattok yekama tukka ya màlà àpàkù'nokon, enupantok uya tamù'nawàlà i'nailàlà sochi yamùk tau kasa iwechi ittu kon pa.

¹⁸Tùulon kon nùtapulàyan àkklottau'nokon, apyakù'nokon uyàpù pen kasa tùttuik.

¹⁹Itepulu Jesus yeselu pe iwechi yau, uyàpù màlà apyakù'nokon tachin pe kulu tùpo pùla, molopai nen uchi yà'là kupù pùsamlo tùutapulàsan kappon yamùk uya yene uya màlà uyiwalà, molopai yà'là yekkwa meluntà wechi tok piyau tok uselupatok yau neken pùla!

²⁰Masapùla Katù wettok Itepulu pe màlà uselupantok neken pen, tùse meluntà.

²¹Yà'là kupù uya làkku ken iche messatàu? Eyippottok kon uya nepù uya ka' màlà uyàpù yau lù wapùla à'nùnmatok kon uya molopai wakù pe yakkwalù?