Read Patamona 1 Corinthians 5 Bible Online

1 Corinthians 5 - Patamona bible

1 Corinthians 5

¹Sàlà pe imakuyippù pe tesak kon ke anùkyan là wessa'man àkklottau'nokon, àli pe kulu man, ailon Katù ittunnan pen kùlottau tùwekkussen pen màlà. Masapùla yekamasak man upàk kàyik wemapù tùkàipùnù noppù pokonpe.

²Itepalan pe mekkussatàik! Eusewankono'ma kon pùlan pe'nai? Tàwà mùkkàlà, màlà yekkwa ku'nàippù yenpakka nechii àkklottapai'nokon.

³Kappon pe apyau'nokon wechi pùla tùse, uyakkwalù yau apyau'nokon wessaik molopai mùkkàlà màlà yekkwa àli ku'nàippù pàk ikasa pùla man tekassak uya màlà, molo apyau'nokon wechi kasa kulu.

⁴Kùyepulu Jesus yesek yau ewepilichak kon yau molopai Iulà wechi apyau'nokon uyakkwalù yau, molopai Kùyepulu kon Jesus meluntàlù wechi molo yau,

⁵Settan yemyak pùsàlà kàyik mùtùtàik ipun umattatoppe, yakkwalù wepùikattàtoppe Itepulu Weyu yattai.

⁶Ikasa pùla iwechi màlà autapulà kon yau. Ittuichi auya'nokon pùla nai malalon lùkwà yapuluwetanùtok ike we'wotokomasek tamù'nawàlà pùlomù yau.

⁷Ipoippà apuluwetanù'nài imokkakà, emennappe nen uchi ewechi kon pa apuluwetanù'nài pùla, messatài'nùk kasa kulu. Masapùla Christ kùponalok kon Usentakantok kaliniluyi lùkkwà wàsak pàk.

⁸Màlàpàk uchi uta'lettàntok ikuppai'nokon ipoippà apuluwetanù'nài pàk pùla, àli pe molopai wakù pe pùla we'nàtoppe ku'nài. Tùse làkku yapuluwetanù'nài pùn pùlomù pusak pàk, esuken we'nàtoppe molopai ailon pe we'nàtoppe kunài pùlomù pusak.

⁹Kaleta umenukappù yau àpàkù'nokon, “Tesak kon ke imakuyippù ton kappon yamùk pokonpe kettàu,” teppù uya.

¹⁰Sàlà wolù yawon kon nà tesak kon ke imakuyippù pe tùwessan, wapùla tùuseka'nonkasan, wapùla amak ton wapùla ailon pen katù yemloto po tùwepeimasan te uya pen. Màlà kasa nen iwechi yau sàlà wolù nàmà auya'nokon màlà.

¹¹Tùse làkku Kappon, àtonpa kon ailon tawon pe tùusesassen echii'ma àli ku'nài tesak ke, wapùla tùuseka'nonkasen, wapùla ailon pen katù yemloto po tùwepeimasen, wapùla àli pe tùulon winàkàik tùuselupasen, wapùla tùwetùnsen, wapùla amappe tùwessen pokonpe kettàu te uya nen màlà. Mùkkàlà yekkwa là pokonpe kata'lettàtàu.

¹²Yà'là woton pe ken sochi tawon kon pen nà kottùma uya? Sochi tawon kon ailon tawonnan neken ku walai mùkyamlo ànkottùma kon?

¹³Katù uya nen màlà sochi tawon kon pen talumattà. “Àli kappon yenpakkatàk àkklottapai'nokon”te Katù Maimu uya kasa. {Deu17.7; Deu 19.19; Deu 21.21; Deu 22.21; Deu24.7}