Read Patamona 1 Corinthians 8 Bible Online

1 Corinthians 8 - Patamona bible

1 Corinthians 8

¹Sàlà, ailon pen katù yemyak itùsak lùppù kùyali yekale pàk uselupa. Ittu'nokon man tamù'nawàlà ittutok yesappe we'nà. Ittutok màlà kappon ku'nài eke pe tukaik itapulàtoppe, tùse uchi'nùnmantok màlà pùikattànài pe ku'nài.

²Kappon yà'làlà ittu tùuya pe nekamayai'nùk uya ittu pùla iwechi màlà ittutok tùuya kasa.

³Tùse kappon Katù pùnùnmanài mùkkàlà Katù nùttu.

⁴Màlàpàk uchi kùyali ailon pen katù yemyak itùsak lùppù napù yau, ittu'nokon man ikonekasak katù wechi yà'là pe pùla kulu i'nailàlà. Molopai tewinan neken Katù wechi molo.

⁵Masapùla, “katù” tukaik lànen tesassan wechi molo kau wapùla non po tùse, molopai tukke lànen pùsamlo “katù yamùk” molopai “itepulu yamùk” wechi molo.

⁶Tùse molo man kùponalok kon tewinan neken Katù, Kùkàipùnù kon, tamù'nawolon yà'làlà konekanàippù, molopai iponaloppe wema'nàtokù'nokon. Molopai molo man tewinan neken Itepulu, Jesus Christ, tamù'nawolon yà'làlà wekonekappù iwinà lùppù, molopai wema'nàtokù'nokon iwinà.

⁷Tùse tamù'nawolon kon uya sàlà ittu pen nai'nùk. Tùulon kon kappon yamùk pona ailon pen katù wechippù takkwalù ke màlà. Màlàpàk sàlà pata weyu tepose màlà yekkwa ton kùyali napù tùuya'nokon yau, ailon pen katù yemyak itùsak lùppù pe tok uya yekama, tok usenumenkatok wechi attu'mùla màlà tùwanmùla pùla tok wechi molopai àli pe iwechi tok pona.

⁸Tùse kùyali uya mei pùla Katù piyak kùnepù kon pen màlà. Yà'là kasa là ku'nà uta'letàn nokon pùla iwechi uya pen màlà, wapùla wakù peiwa là we'nà uta'letàn nokon yau pen.

⁹Elanneppeichi ettàk kon, masapùla inapù auya yeselùkek iwechi kon pàk, attu'mùnon ailon tetok yau wepippo tùwemakuimatok kon yak tukaik.

¹⁰Masapùla ànù'là attumùn ichenumenkatok uya ittunnan pe echii'ma auta'lettà kon ailon pen katù yùwùk tau yene yau, sàlà uya ken na' imeluntàlùnpa kùyali ailon pen katù yamùk yemyak itùsak lùppù nattoppe ya pen?

¹¹Màlàpàk pùsàlà attu'mùn àtonpa kon, Christ welikùppù iponaloppe lùppù umattasak màlà ittutok auya'nokon winà.

¹²Molopai sàlà kasa àtonpa kon attu'mùn ichenumenkatok usenumenkatok ikkwàssak auya'nokon yau, Christ winàkàik ewemakuimasak kon pe iwechi màlà.

¹³Màlàpàk, unanù uya utonpa wemakuimatoppe ikussak yau, kamo pun yantukka uya pen màlà iwemakuima tukaik.