Read Patamona 2 Corinthians 11 Bible Online

2 Corinthians 11 - Patamona bible

2 Corinthians 11

¹Upàlika auya'nokon iche tàwà wessaik, pakko pe kasa lànen wechi tùse. Màlà tàwà ikutàk kon!

²Ukùlùmàlunyaik ewenai'nokon Katù kùlùmàlu kasa làma. Masapùla esukenan ema'non kàyik nappàtùppù pen kasa ewechi kon pàk molopai àyàwà'nùpù kon uya tewin itayappù Christ piyak teppù uya ipàk lùppù pe ewechi kon.

³Usenalippayaik àkài uya Eve yennakappù kaseipe ennakantok tùuya ke kasa làma, tamù'nawàlà ailon molopai esuken ewettùtok kon Christ yemyak winàpai eusenumenkatok kon lattà yeselùkek iwechi pàk.

⁴Masapùla ànù'là uyàppù apyakù'nokon molopai tùpatalon Jesus yekale ina nekamappù walai pen yekama tok uya yau, wapùla tùpatalon akkwalù enepoloppù kon walai pen yepolo auya'nokon, wapùla tùpatalon Itekale ananùmùppù kon lùppù walai pen yannùmù auya'nokon yau, sa'man pe pùla yak mettùyatàik.

⁵Tùse mùkyamlo “wakù ton yeunossak kon” ma'le uchittu pùla man.

⁶Iichenupasak pe là wechi uselupatok pe tukkan kon yemlotopo, tùse ittutok uya yesappe wessaik. Tàmù'nawolon yau wakù pe kulu yekamasak ina uya man àpàkù'nokon.

⁷Katù yekale yekamappù uya àpàkù'nokon epe'mùla. Àsà'mùla wenappù eke pe àkuttok kon pe uya. Ikasa pùla na' wessa' màlà?

⁸Tùulon kon sochi yamùk lapumappù uya màlà uye'matok tok uya yekkwatù ke tok winàpai àpùikattàtok kon uya ike pe.

⁹Apyau'nokon wechi yattai molopai yà'làlà iche wechi yau ayaimelunpa kon uya pùn. Masapùla ailon tawonnan Macedonia pon kon uya tamù'nawolon iche wettok nepùppù màlà upyak. Pena iwechippù kasa ewanawà iwechi màlà, ayaimelunpa kon uya pen.

¹⁰Ailon pe Christ wechi pàk ailon yekama uya sàlà ànù'là Achaia yawolon kon pata yamùk yawon kon uya sàlà pàk utapulàtok yau uyeleutanùpù pen màlà.

¹¹Yà'là pe ken uchi iwechi pàk wa te uya sàlà? À'nùnma kon uya pùla ka' iwechi pàk lù? Katù nùttuyan à'nùnma kon uya.

¹²Tùkussai'nùk kupù pàk lùppù wechi màlà, mùkyamlo tùulon kon “yeunossak kon” nuttà toppe uya, tùwe'wotokomatok kon pàk ina kaichalà lùppù tùwechi kon kasa tok utapulàtok winàpai.

¹³Masapùla pùsamlo yekkwa kàyik yamùk wechi màlà ailon pe pùla yeunossak kon pe. Kasei pe tùwessan tùwotokoyi kon pàk molopai tùwepontàsan Christ neunokossan kasa.

¹⁴Enumenkanài pùla iwechi màlà, masapùla Settan lànen mùkkàlà tùwepontàsen pe akkwa inchelùyi kasa.

¹⁵Màlàpàk enumenkanài pe pùla màlà iwechi, itapyoto yamùk wepontà wakù yapyoto yamùk kasa yau. Iwenukattok yattai tùwe'wotokomappù kon yepeppù yepolo tok uya màlà.

¹⁶Tekamayaik tu'ma ànù'là pakko pe wechi pe kùsekamatak. Tùse wa eusenumenka kon yau, tàwàichi kùyanùntàk kon pakko yanùmù auya'nokon kasa, mala lùkkwà là utapulà toppe.

¹⁷Sàlà yau utapulà pe uselupayai'nùk màlà pakko uselupatok walai, Itepulu yapàikketù kasa pùla nai'nùk.

¹⁸Tùpàkù'nokon tukkan kon utapulà wolù yeselu yau pe iwechi yau, Iulà nàlà utapulà màlà.

¹⁹Pukkek pe kulu ewechi kon pàk pakko ton pàlikannan amyamlo.

²⁰Ànù'là apyoto pe àku'nài'nokon pàlikannan amyamlo, wapùla mùkkàlà eyeka'nonkanài'nokon yà'làlà kupù kon pa, wapùla yà'làlà itesak pe ewettok kon mokanài, wapùla tùtalumayi pe eyennài nokon, wapùla eyenpata kon ippo'nài.

²¹Wekkuli'mayaik attu'mùla ina wessak yekama uya sàlà yau pàk! Tùse yà'làlà pàk ànù'là utapulà pe iwechi yau. Utapulàtok nàlà lànen tùse uselupa sàlà pakko kasa.

²²Hebrew yamùk na' mùkyamlo? Iulà nàlà nen mùkkàlà Hebrew. Israel pon kon na' mùkyamlo? Iulà nàlà nen mùkkàlà Israel pon. Abraham payan na' mùkyamlo? Iulà nàlà nen mùkkàlà Abraham pa.

²³Christ yapyoto yamùk ken na' mùkyamlo? Itayaupasak kappon kasa uselupayaik, tùse wakùiwa nen apyoto Iulà! Sa'man peiwa nen we'wotokomasak màlà, patikichi tau wessak tukkeiwa itekkwa. Uyippoppàssak màlà tukke itekkwa. Molopai weli'nàtok piyau mei pùla wessak màlà echipalà'ne.

²⁴Mùyak etoiken itekkwa 39 pa'nan uyippotok yepolopù uya màlà Jew yamùk winàpai.

²⁵Àsolùwau itekkwa uyippoppàtùppù màlà yei ke molopai tewin itekkwa uwàpàtùppù tàk yamùk ke. Àsolùwau itekkwa kanau wekkwàssak tuna po yau wechippù; tewin ewalupà molopai tewin wei tukaik palau kau uko'mamùppù.

²⁶Tukke itekwa utàtok yau tuna'ma uya talumattàntok yau wechippù molopai amak ton kùlottau. Utonpa yamùk là winà àsà yau wechippù molopai Jew yamùk pen winàpai. Àsà wechippù màlà pata yamùk yau, àsà wechippù umà yau, àsà wechippù palau po. Molopai àsà wechippù ailon ton pen wechi yakon non kùlottau.

²⁷We'wotokomassak màlà sa'man pe molopai usetakkasak. We'nùmù pùla wechippù echipalà. Wapàkkassak wechippù màlà molopai we'naklipasak. Iteipa pùla wessak màlà echipalà, ikope molopai ipon pùla wechippù.

²⁸Tùulon nà tekamaik pùla, wei kaichalà usenumenkatok tamù'nawàlà sochi yamùk pàk eme'nek pe kulu upo man.

²⁹Atu'mùla ànù'là wechi yau atu'mùla nàlà tùuchittusen Iulà, ànù'là wenapposak àli pe we'nàtok yak yau, tùutaimelunpasen Iulà.

³⁰Utapulà pe iwechi yau, utapulà màlà màlà yamùk atu'mùla wechi yenpoikannan pàk.

³¹Katù, Itepulu Jesus Kàipùnù mùkkàlà tapulàsen pe nai'nùk tàwàlàlà, nùttuyan kasei pe pùla wechi.

³²Damascus po Kin Aretas yo'no kopùna uya pata mùlatta yesak ton nonkappù uyachi toppe tok uya.

³³Tùse unuttàppù màlà walicha yau, Pata wekupili yaino akoi yai, molopai wepeppù iwinàpai.