Read Patamona 2 Corinthians 13 Bible Online

2 Corinthians 13 - Patamona bible

2 Corinthians 13

¹Sàlà màlà icholùwano itekkwa pe uyàpù akaklanpase'nokon. “Yàlà yekkwa là uselupantok ànù'là winàkàik yekama màlà asa'lon kon wapùla àsolùwawon kon kappon yamùk uya,” Katù Maimu uya wa te kasa.

²Yakon itekkwa pe apyau'nokon wettainùk yattai eyekamappotantàu Iulà. Wa te tuma uya sàlà apyau'nokon pùla nen uchi echiima. Wennapposak yau mùkkyamlo wapiya iwemakuimasak kon nùssan pàk usentuppa pen màlà.

³Christ uselupa uyai yekamanài iche ewechi kon màlà. Eyittu kon tùuya yau atu'mùn pen mùkkàlà, tùse tùmeluntàlù yenpoikanài àkklottau'nokon.

⁴Masapùla iwànàppù màlà pulusuk po atu'mùla iwettok yau, tùse tùwemapù pàk iwechi màlà Katù meluntàlù winà. Màlà kasa làma atu'mùla ina wechi Christ yau tùse, Katù meluntàlù winà ina wemapù màlà ipokonpe àpùikattà kon ina uya yau.

⁵Echittutàk kon ailon tetok yau ewechi kon pe iwechi. Ittuichi auya'nokon pùla nai Christ Jesus wechi ayau'nokon, eyittutok kon yentaikasak auya'nokon pe neken iwechi yau?

⁶Molopai yeunossak kon pe ina wechi yenpoikasak ina uya ittu auya'nokon pe tùttuik enpen wessaik.

⁷Ina nàpùlemayan Katù pàk àli kupù auya'nokon tukaik. Iwalai kupù auya'nokon wakù pe ina we'wotokomasak yekama toppe neken auya'nokon iche pùla ina man. Tùse iwalai kupù auya'nokon iche ina man ina uya ikupù pùla kasa là iwessak tùse.

⁸Masapùla yà'làlà kupù ina uya ailon winàkàik yentai iwechi màlà, tùse yà'làlà kupù neken ina uya iponalok pe.

⁹Ina nùtauchinpayan atu'mùla ina wechi tùse meluntà pe ewechi kon pàk. Molopai ina wàpùlematok wechi màlà wakù pe tamù'nawàlà ewenatok kon pe iku'nài pe.

¹⁰Màlà pàkànsau sàlà yamùk menuka uya sàlà apyau'nokon pùla echiima, miyalà uyàssak yau àsà pe usàulàma tukaik. Itepulu yapàikketù intùlùppù upyak anapulàpai wessaik meluntà pe ama tok kon pe uya, atalumattàtok kon pe pùla.

¹¹Iwenukapù pe Utonpa yamùk, eichilà man! Apawanattàtok kon uya yetatàk kon, tamù'nawàlà wakù pe nai'nùk winàkàik itàtàk kon, tewin ichenumenkatok ettàk, echitonpa pe emattàk kon. Molopai Katù pùnùnmantok molopai echitonpa pe we'nàtok yesak wechi apyau'nokon màlà.

¹²Itepulu yesek yau uchi tùutauchinpaik messepotàik.

¹³Tamù'nawàlà Katù ponalok kon “Wakù pe na' messatàu” nùkayan.

¹⁴Tàwà uchi Itepulu Jesus Christ wettok wakù pe, molopai Katù uya pùnùnmantok, molopai Wakù Akkwalù pokonpe echitonpa pe we'nàtok apyau'nokon nechii.