Read Patamona 2 Corinthians 3 Bible Online

2 Corinthians 3 - Patamona bible

2 Corinthians 3

¹Sàlà na' nùsetayan ina utapulà tu'ma tùpàkù'nokon kasa làmà? Tùulon kon kappon yamùk kasa ka' ina uya apulàntok kaletayi iche kulu ina nai apyakù'nokon lù wapùla apyapai'nokon?

²Amyamlo là mùkyamlo ina kaletayi, imenukasak lùppù ina yewan pàk, tamù'nawolon kon nùttu molopai tok nene pe.

³Yenpoikasak auya'nokon man kaleta Christ winàpaino pe ewechi kon, ina wotokoyi yepeppù pe. Imenukappù màlà kaleta menukatok palu ke pùla molopai tàk pàk pùla, tùse kappon yewan yamùk pàk Wakù Akkwalù tàwàlà tùwemassen Katù winàpaino ke.

⁴Ina uya sàlà te màlà masapùla ailon tetok ina uya wechi Katù yau pàk Christ yai.

⁵Masapùla yà'làlà pùla man ina yau ina kupù woton sàlà wotoko ku'nài pe tùmeluntàlù ke ina wettoppe. Meluntà itesak pe ina nai'nùk màlà tùuyàssen Katù winàpai.

⁶Masapùla mùkkàlà uchi mùkkàlà ina ku'nàippù meluntà pe emennak ikupù tùuya tetok Katù uya ponaloppe ina we'wotokomatoppe, imenukasak lùppù law winàpaino pen, tùse Akkwalù winàpaino. Imenukasak lùppù màlà weli'nàtok ne'nài, tùse Akkwalù mùkkàlà wema'nàtok ke lepanài.

⁷Tùse màlà uya weli'nàtok nepùppù. Law menukappù màlà tàk pàk, màla kasa làma Katù yakkwayi usenpoikappù màlà itùsak yau. Katù yakkwayi waliwomùppù lànen tùse, Moses yenpata pon akkwa wechippù màlà meluntà pe kulu Israel yamùk uya tenu kon kupù ipàk pùla iwechippù.

⁸Màlà yentai lùiwa ken na' uchi wakù pe kulu wotoko Akkwalù yau nai'nùk wechi pen?

⁹Law kappon yamùk talumatàtok iwinà wechippù màlà tùnamasen pe, tùnamasen peiwa wotoko iwalai ne'nài wechi màlà!

¹⁰Masapùla ekeiwa namantok wechi molo pàk, namantok akkwa pe kulu iwessak lùppù pena waliwomùpù man te là ina uya.

¹¹Masapùla namantok wechippù malalà iko'mansak lùppù yau yau, eke peiwa namantok wechi màlà molo tàwàlàlà tùwemassen yau!

¹²Màlàpàk enpen tùwettok kon yesappe tùwechi kon pàk, ina usenalipa pùla iwechi màlà.

¹³Moses walainon pen ina, mùkkàlà tenpata waputànàippù Israel yamùk uya akkwa useulanka molopai iwaliwomù yene tukaik.

¹⁴Tok usenumenkatok utakkosak kulu wechippù màlà. Molopai sàlà tepose tok usenumenkatok waputtàsak màlà lùppù kaleta yamùk penalok ikupù tùuya tetok Katù uya yawon uya man. Masapùla Christ yau neken màlà yamappù màlà.

¹⁵Sàlà pe lànen Law yene tok uya yau, màlà waputtànài tok usenumenkatok waputtàyan lùppù.

¹⁶Tùse ànù'là welattàsak Itepulu winàkàik pe iwechi yau, waputtànài yamasak màlà.

¹⁷Itepulu uchi mùkkàlà nai'nùk Akkwalù molopai Itepulu Yakkwalù wettok imotau yau, iwemokkasappe we'nàtok wechi màlà molo.

¹⁸Tamù'nawolon kon kùmyamlo uchi mùkyamlo Itepulu yakkwayi yenpoikannan itenpata wapu pùla echii'ma, molopai ikasa tùwemyakamasan tàwàlàlà tùwessen akkwa pokonpe. Itepulu winàpai nùyàssai'nùk, uchi mùkkàlà Akkwalù.