Read Patamona 2 Corinthians 4 Bible Online

2 Corinthians 4 - Patamona bible

2 Corinthians 4

¹Katù uya, tùusentuppatok yau ina lepasak man sàlà wotoko ke. Màlàpàk ina we'nonka pen.

²Tamù'nawolon tonantau tùkussen molopai kuli'manài eselu yamùk ku'nàinan pen ina, ànù'la yennakannan pen, ailon pe Katù Maimu yenpoikannan. Tùse làkku Katù uya màlà ailon pe ina uselupa yene molopai kappon yamùk uya nàlà ailon pe ina wechi ittu.

³Masapùla Wakù Itekale ina nekamayai'nùk wechi yonansappe yau, yonansak màlà mùkyamlo iitassak kon pona.

⁴Sàlà wolù yepulu uya ailon tawonnan pen usenumenkatok yewalumankasak màlà. Wakù Itekale yakkwayi Christ winàpaino yene tok uya tukaik, mùkkàlà uchi Katù usentok.

⁵Masapùla tekale kon yekamannan pen ina, tùse Jesus Christ yekamannan ina Itepulu pe, molopai ina nen uchi ayapyoto kon pe Jesus pàkànsau.

⁶Masapùla Katù uya, “Tàwà akkwa nùlenpamùi ewalupàttapai!” teppù, {Gen 1.3} mùkkàlà lùppù Katù uya takkwayi lenpankasak man kùyewan kon yau, Katù namatok yakkwayi ittutok yakkwayi nettoppe tùuya kùpyakù'nokon, Christ yenpatau ilenpamù.

⁷Tùse sàlà mamin Katù winàpaino yesappe ina man àinà yau, tamù'nawolon meluntà yentaino meluntà wechi Katù ponaloppe yenpoikanài pe, molopai ina ponaloppe pùla iwechi.

⁸Ina yelenmlussak là man sa'man pe sà winà'ne, tùse ina yamoklosak pùla man. Ina yaimelunpa là tùse ina we'nonka pen.

⁹Italumattàsappe, tùse inonkasappe pùla ina man molopai àsà pe lànen iwàpàssappe, tùse ina mattanùssak pùla iwechi.

¹⁰Tàwàlà Jesus welittok pininpannan ina tùyau'nokonkon, Jesus wemattok usentoppe nàlà ina yesak yau.

¹¹Ina wemattok yau, weli'nàtok yak tùtùsan pe ina wechi màlà tàwàlà Jesus pàkànsau, iwemattok usentoppe tùukàtasen ina pun yau.

¹²Sàlà uya weli'nàtok wechi tùwe'wotokoma pàk ina yau tepe iwechi màlà, tùse wema'nàtok wechi tùwe'wotokoma pàk ayau'nokon.

¹³Iwe'menukasak màlà, “Ailon teppù uya màlà, màlàpàk uselupappù màlà,” tawon. {Psa116.10} Màlà yekkwa làma akkwalù ailon tetok ike ke nàlà ina tùuselupasan, masapùla ailon te tùuya'nokon pàk.

¹⁴Masapùla ina nùttuyan mùkkàlà, Itepulu Jesus wuluukanàippù weli'nàtok yapai uya nàlà ina wuluuka pe Jesus pokonpe, molopai ina nepù ya tamùkke àpokonpe'nokon temloto pona.

¹⁵Tamù'nawàlà sàlà yamùk wekkupùppù màlà àpàkànsau'nokon. Molopai wakù pe we'nàtok Katù winàpaino uya tukke molopai tukkeiwa kappon yamùk yepolo. Màlà uya tenki tetok Katù pàk nettoppe eke peiwa yapulà pe.

¹⁶Màlàpàk ina we'nonka pen màlà. Polopo lànen ina ukàta tùse, tau'nokon ina wena màlà emennappe wei kaichalà.

¹⁷Molopai sàlà elekkwà molopai tùuko'mansen tachinpe pen ina nùpàlika talumattàntok uya eke molopai tàwàlàlà tùuko'mansen apulàntok nepù màlà ina ponaloppe, talumattàntok yentaino kulu.

¹⁸Masapùla tensan pe nai'nannùk pàk tenu kon tùsak ina uya pen nai'nùk, tùse yene pùla nai'nannùk pàk làkku. Màlà tensan pe nai'nannùk màlà tùuko'mansan tachinpe pen, tùse tensan pe pùla nai'nannùk màlà tùuko'mansen tàwàlàlà.