Read Patamona 2 Corinthians 6 Bible Online

2 Corinthians 6 - Patamona bible

2 Corinthians 6

¹Tamùkke Katù pokonpe tùwe'wotokoma kon yawàlà ina apawanattàyatàu. Wakù pe we'nàtok Katù winàpaino yanùmù auya'nokon yà'là woton pe pùla là tukaik.

²Imasa Katù uselupatok, “Iche wettok yattai eyetappù kon uya àpùikattà kon uya iche ewechi kon yattai, àpùikattàppù kon uya,” tukaik. {Isa 49.8} Àpàkù'nokon tekamayaik, sàlàichi màlà yanùnntok yattai, sàlàichi màlà wepùikattàntok weyu!

³Ànù'là uya iwalai pen yepolo ina wotokoyi yau iche pùla ina man, màlàpàk ànù'là wakàtùiche ina wechi pen sàlà.

⁴Tùse làkku tamù'nawolon ina nùkupù yau Katù yapyoto ton pe ina wechi yenpoikannan ina, talumattàntok yau, sa'man ton yau, molopai utaimelunpantok pàlikatok yau.

⁵Ippopà'nàtok yau, patikichi tau we'nàtok yau, molopai kappon yamùk we'naikasak yenpatau, sa'man wotoko yau, we'nùnnà pùla we'nàtok yau molopai wapàkka'nàtok yau.

⁶Wakù pe we'nàtok yau, pukkeppe we'nàtok yau, pàlikantok yau, molopai usentuppantok yau, Wakù Akkwalù yau, molopai ailon pùnùnmantok ina uya yau,

⁷ailon pe uselupantok yau, molopai Katù yapàikketù yau. Wakù pe we'nàtok yau wepanta'mantok ike yesappe kamik pen mùyak yau, molopai kamik mùyak yau iwapu.

⁸Namantok yau molopai kuli'mantok yau; àli pe uselupantok tùpàkù'nokon yau molopai wakù pe tapulàtok kon yau. Kasei ton tukaik tesattok kon yau, tùse ailon pe ina wechi.

⁹Tùttusan pe, tùse ànùk pen kasa ina wechippù, iwelikù kasa, tùse ina wemapù. Ippoppàssappe, walà tùse iwàsak pùla.

¹⁰Tùusewankono'mase tùse tàwàlà tùutauchinpaik, itemamin pùla tùse tukkan kon ma ina uya temamin ke, yà'làlà pùla tùse tamù'nawolon yesappe.

¹¹Ina tonpa yamùk Corinth pon kon! Ina uselupasak man àpokonpe'nokon ailon pe yà'làlà tonanse pùla, ina uya tewan kon yakkokasak man eke pe.

¹²Ina uya tamùkke we'natok àpokonpe'nokon pùnùnma ewinàpai' nokon pùla man, tùse amyamlo nù'nùnmayan ina winàpai.

¹³Uselupayaik umunkà yamùk pe ewechi kon kasa, à'nùnmatok kon ina uya yekkwa yenpoikatàk ina winàkàik. Eyewan kon yakkokatàk kon eke pe kulu.

¹⁴Tamùkke ailon tawonnan pen pokonpe echipatùnayi pe kettàu. Yà'là kasa ken iwalai molopai iwalai pen we'wotokoma tamùkke? Yà'là kasa ken akkwa molopai ewalupà wemapù tamùkke?

¹⁵Atta ken Christ molopai Belial, Settan tawonnan usenumenka tamùkke ekkaichalà? Yà'là ken molo nai ailon tawon molopai ailon tawon pen nùkupù ekkaichalà?

¹⁶Atta ken tamùkke Katù yùwùk wechi ailon pen katù yamùk pokonpe? Masapùla tàwàlà tùwemassen Katù yùwùk kùmyamlo! Katù uya tùyiwalà, “Tok piyau wemapù màlà molopai tok kùlottawà wechi màlà, tok Katùyi pe wechi màlà, molopai upemonkonù pe tok wechi màlà,” teppù màlà. {Lev 26.12; Jer 32.38; Ezk 37.27}

¹⁷“Màlàpàk tok winàpai àitàk kon, molopai epantakatàk kon tok winàpai. Molopai àli pe nai'nùk kùsappàttàu, molopai ayanùmù kon uya màlà” nùkayan Itepulu. {Isa 52.11; Ezk 20.34,41}

¹⁸“Àkàipùnù kon pe wechi màlà, molopai umu yamùk pe molopai uyenchi ton pe ewechi kon, te Itepulu Katù Mùkkàlà neken Meluntà uya màlà.” {Sam 7.14; 2 Sam 7.8}