Read Patamona 2 Corinthians 7 Bible Online

2 Corinthians 7 - Patamona bible

2 Corinthians 7

¹Sàlà yamùk Katù uya ikupù tùuya tetok wechi màlà kùponalok kon pe, utonpa yamùk! Màlàpàk uchi esuken wenanpai'nokon makui pùla, tamù'nawolon yà'làlà àli pe nai'nùk kupù yeleutanùpù winà, molopai yà'làlà kùyesak kon wapùla kùyakkwalù kon ku'nài àli pe nonkapai'nokon. Màlàpàk uchi tamù'nawàlà wettùn nokon sàlà Katù yemyak masapùla inama pàk.

²Eyewan kon yau ina i'nùnmatàk kon. Iwalai pen là kussak ina uya pùlà man. Ànù'là mattanùssak ina uya pùla man, wa pùla ànù'là yenkuttà ina uya pùn.

³Sàlà te uya nai'nùk atalumattà kon pe pùla. Masapùla wa teppù uya wapiya kasa, ina pùnùn pe kulu messatàik màlàpàk tamùkke tàwàlà we'nà'nokon man wema'nà'nokon yau wapùla weli'nà'nokon yau.

⁴Enpen kulu wessaik àpàkù'nokon, kùyauchinpayatàik. Tamù'nawolon ina talumattàtok yau meluntà pe ina man. Wanùssak man utauchinpantok ke.

⁵Masapùla Macedonia pona ina welepansak yau ina wàlàkkapù pùn. Wettalumattàntok molopai utaimelunpantok wechippù molo i'nailàlà. Usàulàmantok wechippù molo tùulon kon pokonpe, molopai usenalipantok wechippù ina yewan yau.

⁶Tùse Katù tùusewankono'masan yewan ipittànài, ina yewan ipittàtai Titus uyàttok winà.

⁷Iyàttok winà neken pùla là, tùse itewan ipittàppù nàlà auya'nokon winà. Ina pàk yekamappù ya uyenpai kulu ewechi kon, molopai i'napailà eusewankono'ma kon. Molopai ewekonekasak kon uwenai ewechi kon pàk utauchinpatok wettoppe eke pe lùiwa.

⁸Masapùla ukaletayi uya là eyewankono'masak kon tùse, usewankono'ma pùla man imenukasak uya pàk. Wapiya là usewankono'masak tùse ukaletayi uya eyewankono'mappù kon, tùse tachinpe kulu pùla lùkkwà neken nà.

⁹Tùse sàlà pe utauchinpayaik eyewankono'masak kon uya pàk pùla, tùse eusewankono'matok kon uya eyeselu kon mùyakanmasak pàk Katù wettok iche kasa. Màlàpàk uchi yà'là kasa là ina winà ewettalumattàsak kon kulu pùla iwechi màlà.

¹⁰Usewankono'mantok Katù winàpaino màlà wemyakanmatok ne'nài wepùikattàntok yak. Molopai àli pe là usenumenkantok ne'nài wemyakanmansak pàk pen. Tùse wolù yawon usewankono'mantok màlà weli'nàtok ne'nài.

¹¹Yentàk kon, Katù winàpaino usewankono'mantok uya ayau'nokon àkussak kon. Àli pe pùla ewechi enenpoikapai kulu ewechippù kon. Eusewankono'mappù kon molopai ewessakalopappù kon. Alikyeppe ewechippù kon mùkkàlà àli ku'nàippù talumattà pàk. Eusekamasak kon man yà'làlà iwalai pen pùla ewechi kon sàlà yau.

¹²Emenukappù kon uya là man, tùse ànù'là iwalai pen ku'nàippù pàkànsau là pùla wapùla iwalai pen pàkànsau nettalumattàyai'nùk pàk pùla. Tùse làkku Katù yemlotopo eyiwalà'nokon yene kon pa ina pùnùnmatok auya'nokon.

¹³Sàlà yamùk winà ina yewan umeluntàtappù màlà. Ina yewan umeluntàtasak pilipù pe, Titus utauchinpasak yene tùuya'nokon yau ina nùtauchinpatai. Masapùla tamù'nawàlà amyamlo uya ichenumenkatok yàlàkka'nùssak pàk.

¹⁴Ayapulàppù kon uya ipàk, molopai ukuli'masak auya'nokon pùla man. Tamù'nawàlà ina nekamatainùk àpàkù'nokon kasa iwechi màlà ailon pe. Màlà kasaichi ayapulàtok kon ina uya Titus pàk uya ailon pe iwechi yenpoikasak nàlà màlà.

¹⁵Màlàpàk à'nùnmatok kon ya nenayan meluntà peiwa, tamù'nawàlà alikyeppe enupantok ya maimu yawàlà ewechippù kon yenumenka tùuya yau, yanùmùppù auya'nokon tùusenalippaik molopai tùplànài'nùnse.

¹⁶Utauchinpayaik kulu àpàkù'nokon enpen wechi pàk tamù'nawolon yau.