Read Patamona 2 Corinthians 8 Bible Online

2 Corinthians 8 - Patamona bible

2 Corinthians 8

¹Ittu auya'nokon iche ina man, ina tonpa yamùk, wakù pe we'nàtok Katù nùkupùppù Macedonia pon sochi yamùk ponaloppe.

²Eke pe tok ittuppù màlà talumattàntok tok utàppù lùppù yawà ke, tùse tok utauchinpatok wechippù eke pe kulu. Màlàpàk alikyeppe tok wechippù tùwe'lepa kon pàk itesak pe tùwettok kon yapai, yà'là pùla lànen echii'ma'nokon.

³Ittu uya pàk yekama uya sàlà, tok we'lepappù ikuttok tùuya'nokon kaichalà molopai màlà yentai nàlà lànen, alikyeppe tùyiwalà'nokon.

⁴Tok uya ina pawanattàppù lepantok tùuya'nokon yanùntoppe ina uya Katù ponalok kon pùikattàtok yattai yesappe tùwettok kon pe.

⁵Enpen ina wettok ipàk yentai iwechippù màlà! Wapiya tok wettùlùppù tùyiwalà'nokon Itepulu yemyak, molopai nen uchi ina yemyak Katù yeselu winà.

⁶Màlàpàk Titus pawanattàppù ina uya, sàlà wotoko pùyattànàippù, àpùikattàtok kon pe ya yenuka'nùppù pàk sàlà pùnùnmantok auya'nokon wotokoyi.

⁷Tamù'nawolon yau tùulon kon yentai messatàik ailon tetok yau, uselupantok yau molopai pukkeppe we'nàtok yau, tùulon kon ànpùikattàpai ewettok kon yau, molopai ina pùnùnmatok auya'nokon yau. Màlàpàk nàlàichi tùulon kon yentai tùwe'lepasan pe mettàik sàlà we'wotokomantok pùnùnmantok yau.

⁸“Mùkuttàik,” te uya pùla man. Tùse tùulon kon wechi alikyeppe pùikatàn pàk yekama winà, eke pe pùnùnmantok auya'nokon wechi ittuiche wechi sàlà nai'nùk.

⁹Masapùla mùttuyatàik wakù kùyepulu Jesus Christ nùkupùppù tamù'nawolon yesappe lànen tùwechi tùse, àpàkànsau'nokon yà'làlà pùla iwenappù, yà'là pùla iwenatok winà nen uchi tamù'nawolon yesappe ewena kon pa.

¹⁰Molopai eyelupatok kon uya molo man sàlà yau, iitàppù nai'nùk kilichimochi yau amyamlo wechippù màlà wapiya ewe'lepa kon pàk neken pùla, tùse ikupù pàk nàlà eusenumenkappù kon màlà.

¹¹Wotoko yenuka'nùttàk kon! Eusenumenkatok kon ànkuppai winà yenuka'nùssak auya'nokon wettoppe itesappe ewettok kon yawàlà.

¹²Masapùla e'lepapai kulu ewechi kon yau, Katù uya lepantok auya'nokon yanùmù màlà àntùlù itesappe ewettok kon yawà, itesappe pùla là ewettok pen.

¹³Tùulon kon pùikattài'ma àpona'nokon sa'man pe inonka uya pen sàlà. Tùse sàlà pe tukke temamin ke ewechi kon pàk, wakù pe iwechi màlà pùikappe ewechi kon mùkyamlo yà'là pùla nai'nannàk winàkàik. Ipla ewettok kon yau molopai tok wechi tukke itesappe yau, tok uya àpùikattà kon màlà. Sàlà kasa ekkaichalà we'nàtok wechi màlà molo.

¹⁵Iwe'menukasak kasa, “Mùkkàlà tukke ipili'nàippù wechippù tukke itesappe pen màlà. Molopai mùkkàlà tukke pùla ipili'nàipù wechippù tukke pùla kulu là itesappe pen màlà,” tawon. {Exo16.18}

¹⁶Ina tenki nùkayan Katù pàk Titus kussak ya alikyeppe àpùikattàpai'nokon ina kasa kulu pàk.

¹⁷Ina uya tùpawanattàtok yanùmùpù ya neken pen màlà, tùse alikyeppe kulu àpùikattàpai'nokon kulu iwechippù, màlàpàk ichenumenkappù màlà tùyiwalà molopai nùtàyan apyakù'nokon.

¹⁸Ya'là tùwe'wotokoma kon tonpa yeunossan ina. Mùkkàlà tùnamasen tamù'nawolon sochi yamùk tau iwotokoyi Wakù Itekale yekama ya winà.

¹⁹Molopai màlà yentak, sochi yamùk nanùmùppù mùkàlà ina ya'là ittàtoppe pùnùnmantok ponaloppe we'wotokomantok Itepulu Jesus yapulàtoppe kupù yalà ina uya tùse, molopai pùikappe eppai ina wechi yekamase.

²⁰Elanneppe kulu ina man yà'là yekkwa là usàulàmantok nepù tùuya'nokon tukaik sàlà alikyeppe itùsak lùppù lepantok kuttok ina uya pàk.

²¹Masapùla wakù kupù tùuya'nokon iche ina man, Itepulu yenu yau neken pùla, tùse kappon yamùk yenu yau nàlà.

²²Màlàpàk tùwe'wotokoma kon tonpa yeunossan ina tok pokonpe, ina uya ittusak man tukke itekkwa alikyeppe kulu iwechi pùikattàntok pàk. Enpen nen uchi àpàkù'nokon tùwechi pàk, àpùikattàpai'nokon kulu iwechi màlà.

²³Titus mùkkàlà upatùnayi molopai we'wotokoma yakon àkklottawà'nokon, màlà kasa làma tùulon kon tonpawannà yamùk ya'là nai'nannùk. Mùkyamlo wechi màlà sochi yamùk neunokoppù pe, molopai apulàntok ne'nài nan pe Christ ponaloppe.

²⁴Màlà pùnùnmantok auya'nokon yenpoikatàk kon tok winàkàik molopai yà'là wenai là ina uya ayapulàtok kon usentoppe, sochi yamùk uya yentoppe.