Read Patamona 2 Corinthians 9 Bible Online

2 Corinthians 9 - Patamona bible

2 Corinthians 9

¹Emenukatok kon uya ipàkànsau pùla man, Katù ponalok kon pùikattàtok pàk.

²Tùttuyaik alikyeppe ewechi kon pùikappe ewettok kon pàk. Molopai ayapulàsak kon uya man Macedonia pon kon pàk. Tok pàk yekamappù uya, nùtàtainùk kilichimochi yau amyamlo Achaia pon kon weppyattàppù ewe'lepa kon pàk molopai alikyeppe ewettok kon uya tukkan kon tok tonpa yamùk yewan yapàssak man.

³Pùsamlo tonpawannà yamùk teunossaik ina uya ayapulàtok kon wechi iwoton pe pùla là sàlà yau tukaik, tùse iwekonekasappe pùikattàntok yau ewechi kon pa, wa ewechi kon teppù uya kasa.

⁴Masapùla Macedonia pon kon uyàssak uya'là molopai iwekonekappù pùla eyeposak kon tok uya pe iwechi yau, ina wekkuli'ma kulu màlà! Masapùla enpen ina wechippù àpàkù'nokon. Ewekkuli'ma kon nàlà nen màlà.

⁵Màlàpàk tùkussen pe kulu iwechi pàk pùsamlo tonpawannà yamùk tùpawanattàyaik tok utàtoppe uwapiya molopai lepantok konekase itùlù teppù auya'nokon lùppù. Molopai nen uchi iwekonekasappe lepantok wettoppe e'lepapai we'nàtok yau itùsappe, àntùpai pùla là echiima itùsappe pùla.

⁶Sàlàichi ittutàk kon, ànù'là tukke pùla nàppànyai'nùk uya màlà mala lùkkwà itepelu yepolo molopai ànù'là tukke nàppànyai'nùk uya màlà tukke nàlà itepelu yepolo.

⁷Tàwàichi tamù'nawolon kon ne'lepai tùusenumenka kasa, tùusewankono'maik pùla wapùla eyeka'nonka kon pàk pùla. Masapùla Katù mùkkàlà tùutauchinpaik tùwe'lepasen pùnùnmanài.

⁸Molopai Katù wechi màlà iche ewettok kon yentai elepanài'nokon pe. Iche kulu ewettok kon yesappe ewechi kon pa molopai tamù'nawolon yà'là yekkwa là wakù wotoko kupù kon pa.

⁹Iwe'menukasak kasa, “Lepantok tùuya yamùk tùnài mùkkàlà yà'làlà pùnnon piyak màttawàlà, ichentupatok màlà tùuko'mansen tàwàlàlà.” {Psa.112.9}

¹⁰Mùkkàlà kùyali yenappà ke ipànnài lepayai'nùk molopai itu ke, uya màlà elepa kon iche ewettok kon yawàlà kùyali yenappà ke molopai iwepeta toppe ikùpù ya màlà eke peiwa wakù ànkupùppù kon winà.

¹¹Tàmù'nawolon yesappe ewena kon màlà tamù'nwolon yawàlà, tùulon kon lepa kon pa alikyek pe kulu tàwàlà. Molopai ewe'lepatok kon ina yai uya màlà tenki tetok Katù pàk nepù.

¹²Sàlà yamùk ànkupù kon uya neken là Katù ponalok kon pùikattàsak pen màlà. Tùse tukkan kon uya nàlà màlà tenki te Katù pàk.

¹³Sàlà kupù auya'nokon yau kappon yamùk uya Katù yapulà màlà ailon tetok auya'nokon molopai Christ yekale maimu yawàlà ewettok kon winà. Molopai eke pe tok lepasak auya'nokon pàk molopai tamù'nawolon kon nàlà lepasak auya'nokon pàk Katù yapulà tok uya.

¹⁴Màlàpàk tok nàpùlemayan àpona'nokon tùwakùli kon pe kulu ewechi kon pàk, masapùla eke wakù pe we'nàtok Katù nùtùlùpù ayau'nokon tùwessen pàk.

¹⁵Tenki te pai'nokon man Katù pàk yekama yentaino lepantok ya pàk.