Read Patamona Galatians 4 Bible Online

Galatians 4 - Patamona bible

Galatians 4

¹Tùse sàlà ittutàk kon. Walawok muleppù tùkàipùnù yemamin yanùmù woton tùkussen appyoto kasa mule pe iwechi yau, tamù'nawolon yesappe lànen iwechi tùse.

²Tennàinan ke iwechi màlà molopai tenupanàinan ke, ikaipùnù nùkupùppù wei ponalà neken.

³Màlà kasa làma we'nàppà'nokon. Sàlà wolù yeselu yapàikketù yappyoto pe.

⁴Tùse iwalai iweyu uyàssak yattai, Katù uya Tùmu yeunokoppù. Iwentuppù màlà nossan yai molopai law yo'no,

⁵mùkyamlo law yo'no tùwessan pùikattàse, Katù munkà pe wenantok kon pe.

⁶Masapùla tùmunkà pe ewechi kon pàk Katù uya Tùmu Yakkwalù yeunokoppù màlà kùyewan kon yak, Akkwalù mùkkàlà yekamapponài “Ukàipùnù, Ukàipùnù,” tukaik.

⁷Màlàpàk Katù yai apyoto pe làma ewechi pen nen uchi màlà tùse imu pe. Molopai imu pe ewechi pàk, àkàipùnù yemamin yanùntok auya woton.

⁸Pena Katù ittu auya'nokon pùla ewechi kon yau, katù yamùk iwalai non pen yappyoto pe ewechippù kon màlà.

⁹Tùse sàlà pe Katù mùttuyatàik, wapùla, màlà yentak Katù eyittuyatàu, yà'là pe ken uchi iwechi pàk ennappopai ewechi kon màlà attu'mùnon molopai italumayichan eselu yamùk yak? Itappyoto pe tu'ma ka' eppai messatàu miyalà lùppù lù?

¹⁰Tùpatalo'nan wei yamùk yapulànnan amyamlo, kapùi yamùk, pata weyu yamùk molopai kilichimochi yamùk!

¹¹Usenalippayaik, yà'là woton pe pùla àpàkù'nokon we'wotokomasak yeselùkek iwechipàk.

¹²Apawanattàyatàu Iulà, utonpa yamùk, ukasa enatàk kon. Akasa'nokon wenasak pàkànsau. Yà'làlà iwalai pen kussak auya'nokon uwinàkàik pùla man.

¹³Mùttuyatàik e'neppe wechi pàk itekale yekamappù uya àpàkù'nokon wapiya.

¹⁴E'neppe wechi yau uyenpàtù auya'nokon pùn wapùla unulunpa auya'nokon pùn, uye'netù pe tùwessen upun yau pàkàlà wanittà pe wechi tùse. Tùse làkku kùyanùntantàu Katù inchelùyi yanùmù auya'nokon kasa, kùyanùntantàu Christ Jesus yanùmù auya'nokon kasa!

¹⁵Yà'là pe ken autauchinpatok kon wechippù nai? Yekama uya sàlà màlà kasa ikupù auya'nokon yau eyenu kon mokkappù sàlà auya'nokon eppaino, molopai itùlù kon pa uyemyak.

¹⁶Eyeyaton kon pe na' wenasak nai ailon yekama uya winà?

¹⁷Tùulon kon kappon yamùk mùkyamlo tùusennakasan kulu ayachitok kon pe neken tùuya'nokon tukaik, tùse wakù ponaloppe pùla. Uwinàpai apantakaiche'nokon tok wechi màlà molopai tùponalok kon pe neken ewechi kon pa.

¹⁸Wakù pe iwechi màlà kappon yamùk wechi kulu eyiche yau wakù pàkàsau. Tùse tàwàlàlà apyau'nokon neken nà wechi yau pùla.

¹⁹Mule yamùk u'nùn ton amyamloàponalok kon pe sa' e'nek wechi'monsak walai yau tu'ma wessaik, Christ yeselu yanùmù auya'nokon eyewan kon yak ponalà.

²⁰Apyau'nokon kulu eppai wessaik sàlà pe, tùulon pe eyelupatoppe uya. Utaimelunpasak kulu man àpàkù'nokon.

²¹Masa yekamatàk mùkyamlo law yo'no eppai nokon, yà'là tessak là na' law uya yekamappù pùla nai àpàkù'nokon?

²²Iwe'menukasak màlà Abraham wechippù asa'lon kon imunkà, tewinan apyoto nossan yaino molopai yakon apyoto pen nossan yaino, tukaik.

²³Appyoto nossan wentuppù màlà imu ke wentunsek kasa là, tùse apyoto pen nossan wentuppù màlà imu ke Katù uya ikupù tùuya teppù lùppù winà.

²⁴Sàlà yamùk wechi màlà yentok ipàkàlà pe, pùsamlo nossan yamùk mùkyamlo asa'lon ikupù tùuya teppù Katù uya yekamannan. Tewinannà mùkkàlà Sinai Tùpù winàpaino, tùumunkàtasen appyoto ton pe. Pùsàlà mùkkàlà Hagar.

²⁵Hagar mùkkàlà Sinai Tùpù Arabia pon yekamanài molopai nàlà Jerusalem sàlà pe nai'nùk. Masapùla appyoto pe man tùmunkà yamùk pokonpe.

²⁶Tùse Jerusalem epùn po nai'nùk mùkkàlà appyoto pen, molopai kùsan kon mùkkàlà.

²⁷Masapùla iwe'menukasak màlà: “Entaimekà tùutauchinpaik, àmàlà wentuntoppe wechi'monsak ittunàippù pen! Masapùla nossan inonkasak lùppù umunkàta màlà tukke nossan tùtayappù ke tùwessen yentai,” teppù. {Isa 54.1}

²⁸Tùse utonpa yamùk, amyamlo mùkyamlo Isaac kasa Katù uya ikupù tùuya teppù lùppù munkà.

²⁹Màlà yattai mùkkàlà mule wentunsek kasa iwentusak lùppù uya, Akkwalù meluntàlù winà iwentusak lùppù talumattàppù, molopai wa lùppù man sàlà pe.

³⁰Tùse yà'là tesak ken Katù Maimu uya nai? “Apyoto nossan molopai imle yenpakkakà. Masapùla apyoto nossan mule uya tùkàipùnù yemamin pùkkù yepolo pen màlà apyoto pen nossan mule pokonpe,” tesak ya man.

³¹Màlàpàk nen uchi, utonpa yamùk, appyoto nossan munkà pen kùmyamlo, tùse appyoto pen munkà.