Read Patamona Ephesians 1 Bible Online

Ephesians 1 - Patamona bible

Ephesians 1

¹Sàlà kaleta màlà Paul, Katù wettok iche yawàlà Christ Jesus neunokoppù winàpaino, Katù ponalok kon Ephesus po tùwemassan piyak, mùkyamlo ailon ton tùwemattok kon Christ Jesus yau piyak inmenukappù: [1]

²Tàwàichi Katù Kùkàipùnù kon molopai Itepulu Jesus Christ elepai'nokon wakù pe we'nàtok tùwinàpaino molopai echitonpa pe là we'nàtok ke.

³Tenki te pai'nokon man Katù pàk, Kùyepulu Jesus Christ Kàipùnù pàk! Wakù pe kulu iwessak man kùpàkù'nokon, tamù'nawolon wakù lepantok epùn pon ke kùlepa kon tùuya yawàlà, masapùla Christ ponaloppe we'nà'nokon pàk.

⁴Katù uya kùyanùnkassak kon wechippù màlà tùponaloppe Christ yau, wakù pe esuken we'nàtokkonpe temloto po. Pena wolù wessepolo wapiya pùnùnmantok tùuya pàkàlà,

⁵Katù wekkussak wechippù màlà Jesus Christ yai kùnepù kon tùuya tùpyak pàk tùmunkà yamùk pe. Sàlà wechippù màlà ittauchinpatoppe molopai iche iwettoppe.

⁶Katù yapulàpai'nokon uchi man wakù kulu usentuppantok Katù winàpaino tenumenkaik, Tùmu tù'nùn pe tùnkupù ke lepantok ya tense!

⁷Masapùla Christ mùnù yai wepùikattànsak nokon màlà, kùmakuyi kon pàk usentupansak. Eke kulu màlà wakù pe we'nàtok Katù winàpaino,

⁸Lepansak kon ya nai'nùk ike eke pe kulu! Tamù'nawalon tùpukketù molopai ittutok iche tùwettok yawà, Katù uya ikupù pàk tùwekkupùppù kupùppù, molopai ànù'là nùttu pe pùla tùusenumenkatok yekamappù, tùnkupù yenuka'nùpù pàk man Christ yai.

¹⁰Katù uya ikupù màlà yenuka'nùpù ya iwalai iweyu yattai, tamù'nawolon kon tùnkonekassan nepù Ya tamùkke, tamù'nawolon kon epùn pon kon, molopai non pon kon, màlàyau Christ wechi nen uchi màlà tamù'nawolon yepoi.

¹¹Katù mùkkàlà ikupù tùuya teppù tùuya ku'nài màlàpàk Christ yappyontàppù ya màlà ina yanùntoppe ya.

¹²Sàlà kupùppù ya màlà ina Jew yamùk uya Katù namatok nettoppe iponaloppe molopai wapiya kulu enpen we'nàtok yeponnanùssan pe Christ pàkànsau!

¹³Molopai amyamlo nàlà uya ailon teppù màlà Christ pàk: ailon itekale yetasak auya'nokon yau, Wakù Itekale wepùikattàntok ne'nàippù apyakù'nokon, molopai Katù uya tùponaloppe ewechi kon yentok ipàkàlà tùlùppù màlà àpàkù'nokon Wakù Akkwalù tùlù tùuya apyakù'nokon winà, itùlù tùuya teppù lùppù tùuya.

¹⁴Wakù Akkwalù màlà Katù uya wakù ton kùnepolo kon, itùlù tùuya tùponalok kon piyak teppù yanùmù kùuya'nokon yentok ipàkàlà, Katù uya tùne'mappù yanùmù tùponaloppe weyu ponalà, wakù pe iwettok yapulà toppe.

¹⁵Sàlà wenai, ailon tetok auya'nokon Itepulu Jesus pàk molopai tamù'nawolon kon Katù ponalok kon pùnùnmatok auya'nokon yetasak uya motapai,

¹⁶àpona'nokon wàpùlematok yeleutanùssak uya pùla man Katù pàk tenki te uya yau. Eyittunài'nokon Iulà wàpùlema yau,

¹⁷Kùyepulu Jesus Christ Katùyi Kùkàipùnù wakù pe tùwessen tapulàtok yau, yekamapponài Iulà Wakù Akkwalù uya pukkeppe àkonekatok kon pe molopai Katù ittu kon pa yekamatoppe ya àpàkù'nokon.

¹⁸Eusenumenkatok kon ike utakkokatoppe itakkwayi yene kon pa yekamapponài Iula, màlà enpen we'nàtok yak àkà'masak kon ya nai'nùk ittu kon pa, eke kulu màlà wakù kuttok ya itùlù tùuya teppù ya lùppù tùponalok kon pàk,

¹⁹eke kulu màlà ne'wotokoma yai'nùk kùyau'nokon ailon tawon yau. Sàlà meluntà kùyau'nokon nai'nùk màlà eke kulu meluntà walai

²⁰màlà yapàikatù inapulàppù Christ wuluuka tùuya weli'nàtok yapai yau, molopai yeleutanùpùppù ya kamik pen temyatù winon namantok molopai apulàntok patassek winà epùn po.

²¹Christ Itepulu wechi màlà molo tamù'nawolon kon epùn pon kon itepulu yamùk yepoi, apàikketton, meluntà ton, molopai tamù'nawolon kon tùulon kon itepulu yamùk yepoi. Tamù'nawolon eke ton esek yamùk wolù yawon kon yepoino mùkkàlà molopai ewanawolok tùuyàssen pata yepoino.

²²Katù mùkkàlà tamù'nawolon tùnài Christ pùta yokkoik molopai itùnài sochi yepulu pe tamù'nawolon yepoi.

²³Sàlà Sochi wechi màlà Christ pun pùkkù pe, tamù'nawàlà iku'nài pe tamù'nawolon yanùkkanài pe i'nai yekkwa yawàlà là.