Read Patamona Ephesians 2 Bible Online

Ephesians 2 - Patamona bible

Ephesians 2

¹Pena ewelichak kon wechippù màlà, Katù Maimu yawàlà pùla ewettok kon molopai amakuyi kon pàkàlà.

²Màlà yattai wolù yawon kon yeselu kupùpppù auya'nokon màlà, kawon kon yepulu, Àli maimu yawàlà ewechippù kon, Katù Maimu yawàlà pùla tùwessan yepulu mùkkàlà.

³Tamù'nawolon kon kùmyamlo wechippù tok kasa màlà, àli pe usenumenkantok kon wettok iche kupùppù'nokon kùwakùli kon pe. Tùulon kon kasa, tamù'nawàlà kùmyamlo nàlà wechippù màlà Katù we'nàikatok yo'no.

⁴Tùse Katù usentupatok màlà eke kulu, molopai kù'nùnmatok kon ya eke kulu.

⁵Weli'nàsak wechippù mayin yawàlà pùla we'nàtok yau tùse kùnepùppù ya màlà nulà we'nàtok yak Christ wuluuka tùuya winà. Katù wettok wakù pe winà mà ewepùikattàsak kon màlà tà.

⁶Molopai Christ Jesus yau kùwuluukasak kon Katù uya màlà Itepulu pe iwettok pùkkù pe we'nàtokkonpe chichiu pe ipyau epùn po.

⁷Sàlà kupùpù Katù uya màlà ewanawolok yattai eke kulu wakù pe tùwettok, pùnùnmantok tùuya yau tùnekamappù kùpàkù'nokon Christ Jesus yau yekama toppe tùuya.

⁸Masapùla Katù wettok wakù pe winà ewepùikattàsak kon màlà ailon tetok auya'nokon yai. Eyiwalà'nokon ànkupùppù kon pen màlà tùse Katù uya lepantok.

⁹Yà'làlà ipàkàlà autapulàtok ipàk woton pùla iwechi màlà, ewe'wotokomatok yepeppù pe pùla iwechi.

¹⁰Katù mà mùkkàlà kùkonekanàippù kon tà. Molopai Christ Jesus yau emennak pe we'nàtoppe kùkonekappù kon ya màlà, wakù kùnkupù kon woton pe inkupùppù pena, kuttokkonpe wema'nà yawà.

¹¹Amyamlo Jew yamùk pen ewentutok kon winà, Jew yamùk yattàtok yawà yattàsak kon pen tukaik Jew yamùk nesatù ton. Mùkyamlo Jew yattàtok yawà yattàsak kon tukaik tùusesassan. (màlà esak pàk tùkussen kappon yamùk yemyatù ke.) Yà'là kasaichi ewechippù kon wapiya ittutàk kon.

¹²Màlà yattai mei Christ pàk ewechippù kon màlà. Toto yamùk pe, Israel yamùk tonpa pe pùla. Itùlù tùuya teppù Katù uya lùppù tùponalok kon pàk pùkkù pe ewechippù kon pen. Sàlà non po ewemapùppù kon enpen we'nàtok pùla, molopai Katù pùla.

¹³Tùse sàlà pe, Christ tonpa pe ewechi kon màlà, amyamlo mei iwessak kon nùssan nessak man mei pùla Christ Jesus mùnù winà.

¹⁴Masapùla Christ uya màlà echitonpa pe we'nàtok nepùppù kùpyakù'nokon, Jew yamùk molopai Jew yamùk pen kupù tùuya tewin winà. Tùke là tok pantakanài molopai tok ku'nài esseyaton pe ikkwàtùppù ya.

¹⁵Law, Moses winàpaino yeleutanùpùppù ya, inenupa molopai sà ikukkà tetok ya pokonpe, tùpatalon kon kappon yamùk konekappù ya tùmàlà tùyau tewin tok wettoppe, echitonpa pe.

¹⁶Tùwelikù pulusuk po winà Christ uya esseyaton pàk we'nàtok yeleutanùpùppù màlà. Tùwelikù pulusuk po winà nàlà asa'lon kon tùpatalo'nan kon kappon yamùk kupùppù ya tewin molopai tok mùnappoppù ya Katù piyak.

¹⁷Màlàpàk Christ uyàpùppù màlà. Wakù Itekale echitonpa pe we'nàtok yekamaik tamù'nawolon kon pàk. Amyamlo Jew yamùk pen Katù winàpai mei iwessak kon pàk, molopai Jew yamùk mei pùla tùpàk iwessak kon pàk.

¹⁸Christ yai màlà tamù'nawolon kon kùmyamlo, asakklàma, Jew yamùk molopai Jew yamùk pen uyàttok wechi màlà tewinan Wakù Akkwalù yai Kùkàipùnù kon yemloto pona.

¹⁹Màlàpàk uchi amyamlo wechi toto yamùk pe pùla nen uchi màlà meyon kon pe pùla. Tùse Katù ponalok kon tonpa pe nen uchi ewechi kon molopai Katù munkà yamùk tonpa pe ewechi kon.

²⁰Amyamlo nàlà yamùsak màlà yeunossak kon molopai Katù Maimu yenpoikannannùssan nùnonkappù po, Christ Jesus ipana'mu yawon iwakapuli pe.

²¹Mùkkàlà uchi mùkkàlà tamùsen yamùk yachinài tamùkke, wakù esukenan Katù Yùwùk pe itùsak, Itepulu yapulàtok iwinà pe.

²²Christ yau itonpa pe ewechi kon màlà. Amyamlo nàlà yamù màlà tamùkke tamù'nawolon kon tùulon kon pokonpe Wakù Akkwalù winà tapùi Katù wemattok itau pe.